ក្រសួងរៀបចំដែនដីបញ្ជាឲ្យ Gold Tower 42 ផ្អាកការសាងសង់ បើមិនឆ្លើយតបនឹងលក្ខខ័ណ្ឌទាំងនេះទេ

• 21 ខែ​វិច្ឆិកា 2019
• Uncategorized @km
• 5 មើល

ក្រសួងរៀបចំដែនដី នគរូបណីយកម្ម និង សំណង់ នៅថ្ងៃទី២០ វិច្ឋិកា​បានចេញលិខិតផ្អាកការដ្ឋានសាងសង់អាគារ Gold Tower 42 បណ្តោះអាសន្ន ហើយ​ត្រូវឆ្លើយតបទៅនឹង​លក្ខខ័ណ្ឌសុវត្ថិភាពមួយចំនួនសិន មុននឹងអាចបន្តការសាងសង់បាន។

នៅក្នុងលិខិតនោះបានបង្គាប់ឲ្យលោក លី សាន់ហ៊ីម តំណាងក្រុមហ៊ុន យ៉ុន វូ (ខេមបូឌា) ជាម្ខាស់សំណង់អាគារមជ្ឍមណ្ឌលពាណិជ្ជកម្ម Gold Tower 42 ត្រូវផ្អាកការសាងសង់បណ្តោះអាសន្នចាប់ពីថ្ងៃចេញលិខិត ហើយត្រូវអនុវត្តតាមលក្ខខ័ណ្ឌដូចខាងក្រោម៖

• ត្រូវរុះរើកន្រ្តកយោងសម្ភារ ដែលនៅជាប់តាមបណ្តោយផ្លូវសាធារណៈ
• ត្រូវរកក្រុមហ៊ុនឯកទេសផ្នែកសុវត្ថិភាពការដ្ឋាន មកធ្វើការវាយតម្លៃ និង បញ្ជាក់អំពីសុវត្ថិភាពការដ្ឋាន

ក្រសួងបានបញ្ជាក់ថា ការដ្ឋាន Gold Tower 42 ដែលមានទីតាំងស្ថិតនៅលើក្បាលដីលេខ ៦០ និង ដីឡូតិ៍លេខ ១៥៤ មហាវិថីព្រះសីហនុ កែងមហាវិថីព្រះមុនីវង្ស អាចបន្តការសាងសង់បានលុះត្រាតែមានលិខិតអនុញ្ញាតពី ក្រសួងរៀបចំដែនដី នគរូបណីយកម្ម និង សំណង់។

កន្លងមក ក៏ធ្លាប់មានករណីធ្លាក់ដែកពីអាគារ Gold Tower 42 ទៅជង់លិចនឹងរថយន្តដែលចតចោលនៅហាងក្បែរការដ្ឋាននោះ ប៉ុន្តែមិនបណ្តាលឲ្យមានគ្រោះថ្នាក់ដល់នរណាម្នាក់ឡើយ ហើយច្បាប់សំណង់កាន់តែរឹតបន្តឹងក្រោយការបាក់រលំអាគារសំណង់នៅក្រុងព្រះសីហនុ។

អាគារ Gold Tower កម្ពស់ ៤២ជាន់ ដែលមានតម្លៃវិនិយោគ ២៤០លានដុល្លារ បានចាប់ផើ្តមសាងសង់តាំងពីឆ្នាំ ២០០៨ ហើយ​បានផ្អាកកាលពីឆ្នាំ ២០១០ អំឡុងវិបត្តិសេដ្ឋកិច្ច និង បានចាប់ផ្តើមសកម្មភាពសាងសង់ជាថ្មីនៅរយៈពេលជិត១ទសវត្សក្រោយ ពោលគឺកាលពីដើមឆ្នាំ ២០១៨ ដោយបានសន្យាថានឹងបញ្ចប់ទាំងស្រុងនៅចុងឆ្នាំ២០២០៕

• ច្បាប់ និងបញ្ញាត្តិ
• នគរូបនីយកម្ម និងស្ថាបត្យកម្ម
• Laws and Regulation
• ច្បាប់ និងបញ្ញាត្តិ
• Urbanization and Architect