អាកាសយានដ្ឋានអន្តរជាតិសៀមរាបអង្គរថ្មី (AIAI) ទទួលវិញ្ញាបនបត្រផែនការមេ
រដ្ឋលេខាធិការដ្ឋានអាកាសចរស៊ីវិល បានប្រគល់វិញ្ញាបនបត្រផែនការមេសាងសង់អាកាសយានដ្ឋានអន្តរជាតិសៀមរាបថ្មី (AIAI) ដែលគ្រោងនឹងបញ្ជប់ការសាងសង់ឆ្នាំ២០២៣ នេះ។
ឯកឧត្តម នាយឧត្តម សេនីយ៍ បណ្ឌិត ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល បានប្រគល់ វិញ្ញាបនបត្រផែនការមេ ដល់លោក លូ វី (Lu Wei) ប្រធានក្រុមប្រឹក្សាភិបាល ក្រុមហ៊ុន Angkor International Airport Investment ដែលកំពុងសាងសង់អាកាសយានដ្ឋានអន្តរជាតិសៀមរាបថ្មី។ នេះបើយោងតាម ហ្វេសប៊ុកផ្លូវការរបស់រដ្ឋលេខាធិការដ្ឋានអាកាសចរស៊ីវិល ថ្ងៃ១៩ មិថុនា ២០២០នេះ។
ពាក្យព័ន្ធនឹងគោលបំណងនៃវិញ្ញាបនបត្រផែនការមេនេះ លោក ស៊ីន ចាន់សិរីវត្ថា អ្នកនាំពាក្យ លេខាធិការដ្ឋានអាកាសចរស៊ីវិលប្រាប់ទស្សនាវដ្ដីសំណង់ និង អចលនទ្រព្យនៅថ្ងៃទី ១៩ ខែ មិថុនា នេះថា ផែនការមេនេះ គឺផែនទីបង្ហាញផ្លូវក្នុងការសាងសង់គម្រោងណាមួយដែលកំណត់ពេលវេលាទំហំផ្លូវ និងទឹកប្រាក់របស់គម្រោងនីមួយៗ។
លោកបានឲ្យដឹងថា “ជាទូទៅ កាតព្វកិច្ចរបស់រដ្ឋត្រូវតែផ្ដល់នូវការទទួលស្គាល់នូវគម្រោងណាមួយ ហើយ គម្រោងនេះស្ថិតនៅក្រោមការតម្រង់ទិសរបស់ទីស្ដីការគណៈរដ្ឋមន្ត្រី។ ដូច្នេះ ហើយ រដ្ឋលេខាធិការអាកាសចរ គ្រាន់តែផ្ដល់នូវការទទួលស្គាល់កម្រិតបច្ចេកទេសប៉ុណ្ណោះ។ បន្ទាប់មក ទីស្ដីការគណៈរដ្ឋមន្ត្រីដែលមានគណៈកម្មការតម្រង់ទិសនឹងយកគម្រោងនេះ ទៅឲ្យរដ្ឋាភិបាលអនុម័តទើបគម្រោងនេះអនុវត្ត ជាផ្លូវការបាន។”
លោក បន្ថែម ថា ៖ “ដោយសារការអនុវត្តហ្នឹង វា fast track បានន័យថា យើងធ្វើបណ្ដើរអនុម័តបណ្ដើរ ។ អញ្ចឹង ដើម្បីកុំឲ្យគម្រោងនេះ មានការយឺតយ៉ាវ ព្រោះអីគម្រោងមេអនុម័តត្រូវការពេលវេលាច្រើន ណាស់ ទាក់ទងនឹងសង្គម បរិស្ថាន ស្ដង់ដារបច្ចេកទេសសុវត្ថិភាព។ ដូច្នេះ ក្រុមហ៊ុន អាចអនុវត្តការងារ បឋម ដូចជា ឈូសឆាយ បង្រាប ដី ការបុកគ្រឹះអីហ្នឹង។ អញ្ចឹង ទម្រាំ គម្រោងមេអនុម័ត ការងារបឋម ទាំងនោះ វាស្ទើរនឹងហើយទៅហើយ ។”
បច្ចុប្បន្ននេះ ក្រុមហ៊ុន បាននិងកំពុងចាប់ផ្តើមដំណើរការសាងសង់ជាធម្មតា។ អាកាសយានដ្ឋានអន្តរជាតិនេះ បានបើកការដ្ឋានកាលពីថ្ងៃទី ១៥ មិនា ២០២០ គ្រោងបញ្ចប់ការសាងសង់ជាស្ថាពរនៅថ្ងៃទី១៤ មិនា ២០២៣ ដោយប្រើពេលវេលាទាំងអស់រយៈពេល ៣៦ ខែ។
នៅក្នុងដំណើរចុះត្រួតពិនិត្យ វឌ្ឍភាពនៃការសាងសង់អាកាសយាន្តដ្ឋានអន្តរជាតិអង្គរថ្មី (AIAI) កាលពីថ្ងៃទី១៥ មិថុនា ២០២០នេះ ក្រុមការងារបច្ចេកទេសរបស់រដ្ឋលេខាធិការដ្ឋានអាកាសចរស៊ីវិល ក៏បានចុះត្រួតពិនិត្យ និងបំពាក់ឧបករណ៍បច្ចេកទេស និងរចនាបថអាកាសយានដ្ឋានផងដែរ។
គួរបញ្ចាក់ផងដែរថា ការសាងសង់ព្រលានយន្តហោះអន្តរជាតិសៀមរាបថ្មីនេះ នឹងចំណាយទុនវិនិយោគប្រមាណ ៩០០ លានដុល្លារ ដែលនឹងសាងសង់លើផ្ទៃដីប្រមាណ ៧០០ ហិកតា រួមជាមួយនឹងផ្ទៃដីនៃតំបន់សេដ្ឋកិច្ចពិសេសចំនួន ១០០០ ហិកតា ទៀតផង៕
- Video Advertisement -
English 
ខ្មែរ 
