សាលាក្រុងបើកដំណើរការស្ពានអាកាសចោមចៅជាបណ្ដោះអាសន្ន

• 26 ខែ​តុលា 2020
• Uncategorized
• 9 មើល

រដ្ឋបាលរាជធានីភ្នំពេញ បើកឱ្យដំណើរការស្ពានអាកាសចោមចៅជាបណ្ដោះអាសន្ន ដើម្បីសម្រួលដល់លំហូរ និងកាត់បន្ថយការកកស្ទះចរាចរណ៍ក្នុងតំបន់នេះ ដោយផ្លូវក្រោមដីគឺបើកឱ្យធ្វើចរាចរណ៍ចាប់ពីម៉ោង ១០ ព្រឹកថ្ងៃនេះតទៅ។

ឯកឧត្ដម ឃួង ស្រេង អភិបាលរាជធានីភ្នំពេញ បានស្នើសុំបើកដំណើរការស្ពាននេះទៅកាន់សម្ដេចនាយករដ្ឋមន្រ្តី ហ៊ុន សែន ក្នុងឱកាសបើកការដ្ឋានសាងសង់ស្ពានកោះនរាកាលពីថ្ងៃទី ២៦ តុលា នេះ។ (អានបន្ថែម)។

ឯកឧត្តមបានឱ្យដឹងថា៖ «ខ្ញុំបាទសូមគោរពស្នើសុំការសម្រេចពីសម្តេចនាយករដ្ឋមន្ត្រី មេត្តាបើកដំណើរការជូនប្រជាពលរដ្ឋធ្វើដំណើរជាបណ្ដោះអាសន្ន ដើម្បីជួយសម្រួលដល់លំហូរ និងកាត់បន្ថយការកកស្ទះចរាចរណ៍ក្នុងតំបន់នេះ រហូតដល់ពេលការដ្ឋានត្រូវបញ្ចប់ និងដាក់ឱ្យដំណើរការជាផ្លូវការនាពេលខាងមុខ។»

ដោយសារតែមានការកកស្ទះចរាចរណ៍ខ្លាំងនៅលើកំណាត់ផ្លូវជាតិលេខ១ ពីចំណុចជ្រោយតាព្រហ្ម រហូតដល់ចំណុចគល់ស្ពានព្រះមុន្នីវង្សត្រើយខាងលិច និងត្រើយខាងកើត ទើបរដ្ឋបាលរាជធានីភ្នំពេញ បានជួយសម្រួលចរាចរណ៍នៅតំបន់នេះ តាមរយៈការសាងសង់ស្ពានអាកាសក្បាលថ្នល់នេះ ដោយសា្ថបនាស្ពានបិទមួយខ្សែ និងគ្រោងស្ថាបនាស្ពានអាកាសចំនួន ២ ខ្សែ និងផ្លូវក្រោមដីចំនួនមួយខ្សែទៀតផងដែរ។

គួរបញ្ជាក់ផងដែរថា គម្រោងសាងសង់ស្ពានអាកាស និងផ្លូវក្រោមដីត្រង់រង្វង់មូលចោមចៅ គិតមកដល់ពេលនេះសម្រេចបានប្រមាណ ៥៥ភាគរយ ហើយ ដោយគ្រោងនឹងបញ្ចប់នៅឆ្នាំ ២០២១ ខាងមុខ។ (អានបន្ថែម)

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• Road and Infrastructure
• Projects Development
• គម្រោងអភិវឌ្ឍន៍