អគារទីស្នាក់កណ្ដាលរបស់ក្រុមហ៊ុនអចលនទ្រព្យយក្ស Prince Holdings Group ឈ្នះពានរង្វាន់ Luban Award

• 21 ខែ​មេសា 2021
• ព័ត៌មានអចលនទ្រព្យ
• 8 មើល

សមាគមឧស្សាហកម្មសំណង់ចិន (China Construction Industry Association ) កាលពីថ្មីៗនេះ បានប្រកាសនូវបញ្ជីឈ្មោះពានរង្វាន់ Luban Award ប្រចាំឆ្នាំ ២០២០ ដែលក្នុងនោះគម្រោងអគារពហុមុខងាររបស់ព្រីនស៍ ហូលឌីង គ្រុប នៅកម្ពុជា ក៏ជាប់ឈ្មោះក្នុងបញ្ជីជ័យលាភីដែរ។

បើយោងតាមទំព័រ Facebook របស់ក្រុមហ៊ុនព្រីនស៏ អគារទីស្នាក់ការកណ្ដាលនេះ ក៏ជាស្នាដៃកំពូលរបស់ក្រុមហ៊ុនព្រីនស៍ ហូលឌីង គ្រុប ក្នុងឆ្នាំ ២០១៨ ផងដែរ។

មានទីតាំងនៅ កោះពេជ្រ រាជធានីភ្នំពេញ គម្រោងនេះត្រូវសាងសង់ឡើងដោយក្រុមហ៊ុន China Construction Fourth Engineering Division (Cambodia) Corp., Ltd ដែលជាអគារទំនើបកម្រិត 5A ដំបូងគេបង្អស់នៅកម្ពុជា។

រចនាសម្ព័ន្ធនៃអគារទាំងមូល បានប្រើប្រាស់នូវការឌីហ្សាញថ្មីទំនើប ដែលរួមបញ្ចូលនូវមុខងារជាច្រើនដូចជា អគារការិយាល័យ សាលទទួលភ្ញៀវ បន្ទប់ប្រជុំ និងការិយាល័យលក់ជាដើម។ លើសពីនេះ អគារនេះក៏បានប្រើប្រាស់នូវប្រព័ន្ធសន្សំសំចៃថាមពលផងដែរ។

ក្រោយឈ្នះរង្វាន់នេះ ក្រុមហ៊ុនបានប្ដេជ្ញាថា នឹងបន្តអភិវឌ្ឍអចលនទ្រព្យបន្ថែមទៀតនៅកម្ពុជា ក្នុងគោលបំណងដើម្បីជំរុញការអភិវឌ្ឍន៍ និងលើកមុខមាត់កម្ពុជាទៅក្នុងឆាកអន្តរជាតិ។

គួរបញ្ជាក់ផងដែរថា ពានរង្វាន់ Luban គឺជាពានរង្វាន់ខ្ពស់បំផុត ដែលវាយតម្លៃគុណភាពសំណង់នៅក្នុងប្រទេសចិន ដែលធ្វើឡើងក្រោមការគ្រប់គ្រងរបស់ក្រសួងលំនៅដ្ឋាននិងអភិវឌ្ឍន៍ជនបទ ក៏ដូចជាសមាគមឧស្សាហកម្មសំណង់ចិន។ ពានរង្វាន់ ត្រូវបានគេស្គាល់ថាជា “ អូស្ការក្នុងវិស័យសំណង់ចិន” ។

• គម្រោងអភិវឌ្ឍន៍
• គម្រោងអភិវឌ្ឍន៍