រដ្ឋាភិបាលអនុម័តឲ្យក្រុមហ៊ុនកាណាដាចូលមករុករកប្រេងលើទីតាំងទំហំជាង ៧០ម៉ឺនហិកតា

14 ខែសីហា 2019
Uncategorized @km
6 មើល

កាលពីពេលថ្មីៗនេះ រដ្ឋាភិបាលកម្ពុជាបានសម្រេចអនុម័តឲ្យក្រុមហ៊ុនរុករកប្រេងកាណាដាឈ្មោះថា Angkor ឲ្យមានសិទ្ធិចូលមករុករកប្រេងនិងឧស្ម័នលើទីតាំងសម្បទានទំហំ ៧៣០០ គីឡូម៉ែត្រក្រឡា (ឬស្មើនឹង៧៣ម៉ឺនហិកតា) នៅក្នុងបាសាំងកំពង់សោម។

បើយោងតាមសេចក្តីប្រកាសរបស់ក្រុមហ៊ុនកាលពីថ្ងៃទី ១៣ ខែសីហា កន្លងមកនេះ ការអនុម័តនេះនឹងអនុញ្ញាតឱ្យក្រុមហ៊ុន Angkor ធ្វើការរុករកប្រេងនិងឧស្ម័ននៅក្នុងប្លុកប្រេងទី ៨ នៃបាសាំងកំពង់សោម។ បច្ចុប្បន្នក្រុមហ៊ុន Angkor កំពុងដំណើរការចរចារកិច្ចព្រមព្រៀងស្តីពីការចែករំលែកផលិតកម្ម (PSA)។

លោក Stephen Burega នាយកប្រតិបត្តិនៃក្រុមហ៊ុន Angkor បានមានប្រសាសន៍ថា ៖ “នេះជាព្រឹត្តិការណ៍សំខាន់មួយសម្រាប់ក្រុមហ៊ុនរបស់យើង។ ក្រុមហ៊ុន Angkor គឺជាក្រុមហ៊ុនរុករកប្រេងដំបូងគេរបស់កាណាដា ដែលទទួលបានការអនុញ្ញាតពីរដ្ឋាភិបាលកម្ពុជា ឲ្យអនុវត្តគម្រោង បានស៊ីជម្រៅរហូតដល់ដំណាក់កាលមួយនេះ ដើម្បីធ្វើការស្វែងរកប្រេងនិងឧស្ម័ននៅក្នុងប្រទេស” ។

“ជាមួយនឹងជំនាញរយៈពេលវែងនិងការប្តេជ្ញាចិត្តរបស់លោក Mike Weeks ប្រធានប្រតិបត្តិនៃក្រុមហ៊ុន Angkor យើងមានជំនឿនិងជំហរយ៉ាងរឹងមាំក្នុងការពង្រីកវិស័យទាញយកប្រេងនៅកម្ពុជាក៏ដូចជានៅក្នុងតំបន់អាស៊ីអាគ្នេយ៍ ឲ្យបានកាន់តែរីកចំរើនជាងមុន។ ក្នុងដំណាក់កាលនេះ គឺយើងកំពុងធ្វើការចរចារលើកិច្ចព្រមព្រៀងចែករំលែកផលិតកម្ម ក៏ដូចជាធ្វើការត្រួតពិនិត្យឡើងវិញនូវស្ថានភាពទីតាំងនិងទិន្នន័យផ្សេងៗ” ។

ក្រៅពីគម្រោងនេះ ក្រុមហ៊ុន Angkor ក៏កំពុងធ្វើការលើអាជ្ញាប័ណ្ណរុករកប្រេងចំនួន៥ ផ្សេងទៀតនៅក្នុងប្រទេសកម្ពុជា ដែលមានទំហំសរុបប្រមាណ ៩៨៣ គីឡូម៉ែត្រការ៉េ ដែលក្នុងនោះ អណ្ដូងបានលុងគឺស្ថិតក្នុងដំណាក់កាលចោះ។

ស្របគ្នានេះដែរ ឯកឧត្តម ជៀប សួរ អគ្គនាយក នៃអគ្គនាយកដ្ឋានប្រេងកាត នៃក្រសួងរ៉ែ និង ថាមពល នៃព្រះរាជាណាចក្រកម្ពុជា ក៏បានបង្ហាញសុទិដ្ឋិនិយមចំពោះគម្រោងនេះផងដែរ ដោយសង្ឃឹមថាបច្ចេកវិទ្យាដែលនាំមកដោយក្រុមហ៊ុន Angkor នឹងជួយពង្រីកសក្តានុពលនៃការរុករកប្រភពថាមពលនៅក្នុងប្រទេសកម្ពុជា។

ឯកឧត្តមបានមានប្រសាសន៍ថា៖“ យើងមានសេចក្តីរីករាយណាស់ដោយបានធ្វើការជាមួយក្រុមហ៊ុន Angkor ក្នុងការអភិវឌ្ឍន៍សក្តានុពលប្រេងនិងឧស្ម័នរបស់ប្រទេសកម្ពុជា” ។

គូរបញ្ជាក់ផងដែរថា បាសាំងកំពង់សោម គឺមានទីតាំងស្ថិតនៅតាមឆ្នេរសមុទ្រនៅភាគអាគ្នេយ៍នៃប្រទេសកម្ពុជា ដែលបាសាំងនេះត្រូវបានកំណត់អត្តសញ្ញាណជាលើកដំបូងថាជាបាសាំងដីគោកកាលពីឆ្នាំ ២០១៦ ដោយក្រុមអ្នកស្រាវជ្រាវភូមិសាស្ត្រដាណឺម៉ាក។

ក្រៅពីបាសាំងកំពង់សោម ក៏នៅមានបាសាំងជាច្រើនទៀតដែលកំពុងអភិវឌ្ឍនៅក្នុងប្រទេសកម្ពុជា ដែលក្នុងចំណោមបាសាំងទាំងអស់នេះ គឺជាទីតាំងដែលល្បីជាងគេគឺអណ្តូងប្រេងអប្សរានៃបាសាំងខ្មែរ។ នេះគឺអណ្តូងប្រេងដែលរំពឹងថា នឹងផ្ដល់តំណក់ប្រេងដំបូងបង្អស់ចេញពីទឹកដីកម្ពុជាផ្ទាល់នៅចុងឆ្នាំ ២០១៩ នេះ។ បច្ចុប្បន្នគម្រោងនេះត្រូវបានអនុវត្តដោយក្រុមហ៊ុន KrisEnergy របស់ប្រទេសសឹង្ហបុរី។ (អានបន្ថែម)

ជាមួយគ្នានេះដែរ ទាក់ទងនឹងស្ថានភាពប្រេងនៅកម្ពុជា កាលពីថ្ងៃទី១៧ ខែមិថុនា កន្លងមកនេះ រដ្ឋសភាជាតិបានអនុម័តសេចក្តីព្រាងច្បាប់ស្តីពីការគ្រប់គ្រងប្រេងកាត និងផលិតផលប្រេងកាតថ្មីមួយ ក្នុងគោលបំណងដើម្បីគ្រប់គ្រង និងអភិវឌ្ឍធនធានប្រេងកាតឲ្យមានប្រសិទ្ធភាព តម្លាភាព និងគណនេយ្យភាព ទាក់ទាញនិងផ្តល់ទំនុកចិត្តដល់អ្នកវិនិយោគទុន និងដើម្បីជំរុញការអភិវឌ្ឍន៍វិស័យប្រេងកាតប្រកបដោយនិរន្តរភាព។ (អានបន្ថែម)