កម្ពុជាស្នើឱ្យឡាវពិចារណាគម្រោងវារីអគ្គិសនីហ្លួងព្រះបាងឡើងវិញដោយសារផលប៉ះពាល់បរិស្ថាន

3 ខែកក្កដា 2020
Uncategorized
10 មើល

ប្រទេសកម្ពុជា វៀតណាម និងថៃ បានស្នើសុំឱ្យឡាវពិនិត្យឡើងវិញលើគម្រោងសាងសង់វារីអគ្គីសនីហ្លួងព្រះបាងនៅដងទន្លេមេគង្គ ដោយហេតុថាគម្រោងនេះអាចនឹងជះឥទ្ធិពលអវិជ្ជមានបរិស្ថាន លំហូរ និងប្រព័ន្ធជីវចំរុះ នៃទន្លេមេគង្គផ្នែកខាងក្រោម។ នេះបើយោងក្នុងកិច្ចប្រជុំពិសេសនៃគណៈកម្មការចំរុះទន្លេមេគង្គ MRC កាលពីថ្ងៃទី ៣០ មិថុនា ២០២០ កន្លងមកនេះ។

ការស្នើសុំនេះ គឺធ្វើឡើងបន្ទាប់ពីមានក្រុមអង្គការសង្គមស៊ីវិលកម្ពុជាចំនួនរួមមាន បណ្តាញការពារទន្លេ ៣ អេស (3S River Protection Network) សម្ព័ន្ធភាពដើម្បីអភិរក្សធនធានជលផល (FACT) អង្គការ My Village ក៏ដូចជាមជ្ឈមណ្ឌលនិងសមាគមអភិរក្សបរិស្ថានជាដើម បានសម្តែងការព្រួយបារម្ភថាការសាងសង់ទំនប់វារីអគ្គីសនីអានុភាព១.៤៦០ មេហ្កាវ៉ាត់ខាងលើនេះ នឹងប៉ះពាល់ដល់ ការនេសាទ ជលសាស្ត្រ និងការផ្ទេរដីល្បាប់ជាដើម។

ដូច្នេះប្រទេសកម្ពុជា ក្នុងកិច្ចប្រជុំ បានជំរុញឱ្យប្រទេសឡាវពិនិត្យមើលឡើងវិញ លើផលប៉ះពាល់បរិស្ថាន ដើម្បីស្វែងរកផែនការសមស្រប និងវិធានការដ៏មានប្រសិទ្ធភាពសម្រាប់គម្រោងនេះ។

លើសពីនេះ ប្រទេសពីរផ្សេងទៀត រួមមានវៀតណាម និងថៃ ក៏មានការព្រួយបារម្ភដូចគ្នាដែរ ដោយជំរុញ ឱ្យមានការវាយតម្លៃឱ្យបានល្អិតល្អន់ ទៅលើផលប៉ះពាល់ព្រំដែន សេដ្ឋកិច្ចសង្គម និងបរិស្ថាន នៃប្រទេសនៅជាប់នឹងទន្លេមេគង្គផងដែរ។

ជាការឆ្លើយតប លោក Chanthanet Boualapa សមាជិកគណៈកម្មការចម្រុះតំណាងប្រទេសឡាវ បានមានប្រសាសន៍ថា៖ «រដ្ឋាភិបាលឡាវ ប្តេជ្ញាចិត្តក្នុងការដោះស្រាយផលប៉ះពាល់សំខាន់ៗ និងស្វាគមន៍ជានិច្ចចំពោះការចូលរួមបន្ថែមទៀត ដើម្បីធានាថាគម្រោងនេះមិនបង្កផលប៉ះពាល់អវិជ្ជមានដល់ប្រទេសដែលស្ថិតនៅជុំវិញដងទន្លេមេគង្គ។

គួរបញ្ជាក់ផងដែរថា គម្រោងថាមពលវារីអគ្គិសនីមួយទៀតនៅប្រទេសឡាវ គឺគម្រោងសាណាក់ខាំ ( Sanakham project ) ដែលមានអានុភាព ៦៨៤ មេហ្កាវ៉ាត់ ក៏នឹងត្រូវយកមកពិភាក្សាដែរ បន្ទាប់ពីការពិភាក្សាលើគម្រោងហ្លួងព្រះបាងឈានដល់ការសន្និដ្ឋាន។ (អានបន្ថែម)

ជុំបញ្ហានេះ ប្រទេសកម្ពុជាផ្ទាល់ ក៏បានផ្អាកផែនការទំនប់វារីអគ្គិសនីនៅតាមដងទន្លេមេគង្គរហូតដល់ឆ្នាំ ២០៣០ ដោយងាកមករកថាមពលពីធ្យូងថ្ម ឧស្ម័នធម្មជាតិ និងថាមពលពន្លឺព្រះអាទិត្យជំនួសវិញ។ (អានបន្ថែម)

- Video Advertisement -