អគារការិយាល័យ ៦ បានបញ្ចប់ការសាងសង់នៅត្រីមាសទី ២ ឆ្នាំ ២០២០ ទោះបីទីផ្សារស្ថិតក្នុងវិបត្តិក្ដី

• 13 ខែ​កក្កដា 2020
• ព័ត៌មានអចលនទ្រព្យ
• 8 មើល

អគារការិយាល័យចំនួន ៦ កន្លែង (៥ កន្លែងជាប្រភេទម្ចាស់តែមួយ និង ១ កន្លែងជាប្រភេទប្លង់កម្មសិទ្ធិច្រើន) បានបញ្ចប់ការសាងសង់នៅត្រីមាសទី ២ ឆ្នាំ ២០២០ នេះ ទោះបីអត្រាការជួល និងថ្លៃជួលធ្លាក់ចុះ ដែលបង្កដោយវិបត្តិកូវីដក៏ដោយ។ នេះបើយោងតាមរបាយការណ៍ទិដ្ឋភាពទីផ្សាររបស់ភ្នាក់ងារ CBRE ចេញផ្សាយកាលពីថ្ងៃទី ៧ ខែកក្កដា កន្លងមកនេះ។

ចំពោះអគារការិយាល័យប្រភេទម្ចាស់តែមួយ ឬ Centrally-owned គឺមាន Grade B ចំនួន ១ និង Grade C ចំនួន ៤ ដែលរួមគម្រោង Amass Central គម្រោង Royal K Plaza គម្រោង The Link III គម្រោងTerra និងគម្រោង The Helix។ គម្រោងទាំង ៥ រំពឹងថានឹងមានបន្ថែមផ្ទៃក្រឡាផ្គត់ផង់អគារការិយាល័យ ៦៤,០២៦ ម៉ែត្រការ៉េ ទៅក្នុងទីផ្សារនៅចុងឆ្នាំ ២០២០។

ជាមួយគ្នានេះដែរ អត្រាការកាន់កាប់ (ឬចំនួនការជួល) ក្នុងត្រីមាសទី ២ នេះ ធ្លាក់ចុះ ៤.៥% បើប្រៀបធៀបនឹងរយៈពេលដូចគ្នានៃឆ្នាំ ២០១៩ ។ រីឯតម្លៃជួល (ឬ quoting rent) ក៏ធ្លាក់ចុះ ៣.១% ផងដែរសម្រាប់អគារ Grade B ដែលនៅខណ្ឌកណ្ដាលក្រុង និង ២,៩% សម្រាប់អគារ Grade B ដែលនៅខណ្ឌផ្សេងៗទៀត ។

ផ្ទុយទៅវិញ តម្លៃជួលសម្រាប់អគារ Grade C បានកើនឡើង ៨% សម្រាប់អគារដែលនៅកណ្ដាលក្រុង និង ៤,៥% សម្រាប់អគារនៅជាយក្រុង។

របាយការណ៍ដដែល ក៏បានបញ្ជាក់ផងដែរថា ទោះបីជាមានភាពមិនប្រាកដប្រជាដែលបណ្តាលមកពីវីរុសកូវីដក្ដី អ្នកជួលការិយាល័យដែលមានស្រាប់ គឺមានទំនោរនឹងជួលបន្ត។

ទន្ទឹមនឹងនេះ ដែរការិយាល័យជាប្រភេទប្លង់កម្មសិទ្ធិច្រើន ឬ strata-title គឺបានបញ្ចប់ការសាងសង់ ១ គម្រោង គឺ The Legacy ដែលនឹងបន្ថែមផ្ទៃក្រឡាផ្គត់ផ្គង់ថ្មីសរុបចំនួន ៥៩,០០០ ម៉ែត្រការ៉េ ទៅក្នុងទីផ្សារនៅឆ្នាំចុងឆ្នាំ ២០២០ នេះ។

• ធុរកិច្ច និងទីផ្សារ
• ធុរកិច្ច និងទីផ្សារ