ចៅហ្វាយខេត្តមណ្ឌលគិរី៖ ព្រំដីសម្រាប់សង់ព្រលានយន្តហោះបោះរួចហើយ ចាំតែអ្នកមកវិនិយោគ

• 16 ខែ​កក្កដា 2020
• Uncategorized
• 8 មើល

រដ្ឋបាលខេត្តមណ្ឌលគីរី បានដោះស្រាយផលប៉ះពាល់ និងបោះបង្កោលព្រំប្រទល់ដី រួចរាល់ដាច់ស្រេចអស់ហើយ សម្រាប់គម្រោងសាងសង់អាកាសយានដ្ឋាននៅខេត្តមណ្ឌលគីរី បច្ចុប្បន្ននៅរងចាំតែការវិនិយោគពីអាកាសចរណ៍ស៊ីវិលតែប៉ុណ្ណោះ។

ថ្លែងនៅក្នុងសន្និសិទសារព័ត៌មានកាលពីថ្ងៃទី១៦ កក្កដា នេះ អភិបាលខេត្តមណ្ឌលគីរី ឯកឧត្តម ស្វាយ សំអ៊ាង បានឱ្យដឹងថា អាជ្ញាធរខេត្តបានជ្រើសរើសទីតាំងដី ប្រមាណ៦០០ហិកតា នៅចំងាយប្រមាណ ២២ គីឡូម៉ែត្រ ពីក្រុងសែនមនោរម្យ ពោលគឺស្ថិតក្នុងស្រុកអូររាំង។

ឯកឧត្តម បានមានប្រសាសន៍ថា ៖ «ឥលូវនេះ អាជ្ញាធរខេត្តបានរៀបចំ ទីមួយការពារដីដើម្បីនៅពេលដែលរដ្ឋាភិបាលមានថវិកាវិនិយោគ គឺយើងមានដី ជៀសវាងនៅពេលអត់មានដី គឺមិនដឹងថាអភិវឌ្ឍន៍ព្រលានយ៉ាងម៉េចដែរ»។

«មកទល់ពេលនេះ គឺការគិតគូររបស់អាកាសចរណ៍ស៊ីវិល គឺថាយើងបានកាយព្រំ យើងបានរៀបចំ ដោះស្រាយរួចហើយ រង់ចាំតែគោលការណ៍ រដ្ឋាភិបាលបានដៃគូវិនិយោគ ឬមានទុនវិនិយោគតែប៉ុណ្ណោះ» ឯកឧត្តម បានបន្ត។

បើតាមប្រសាសន៍របស់អភិបាលខេត្ត អាកាសយានដ្ឋានថ្មីនេះអាចសាងសង់ទៅជាអាកាសយានដ្ឋានខ្នាតធំក្នុងស្រុក ឬខ្នាតអន្តរជាតិ ដោយផ្អែកតាមការសិក្សាបច្ចេកទេសរបស់អាកាសចរណ៍ស៊ីវិល និងក្រសួងពាក់ព័ន្ធ។

គួរបញ្ជាក់ផងដែរថា គម្រោងសាងសង់អាកាសយានដ្ឋានមណ្ឌលគីរីនេះ ត្រូវបានសិក្សាតាំងពីឆ្នាំ ២០១៩ ដោយនៅជំហានដំបូងគ្រោងនឹងសាងសង់លើដី ៣០០ ហិកតា តែបច្ចុប្បន្នពង្រីកជា ៦០០ហិកតា។ ហើយគម្រោងនេះ នឹងបម្រើដល់ការដឹកជញ្ជូនផ្លូវអាកាស និងដឹកជញ្ជូនភ្ញៀវទេសចរ ទៅតំបន់ទេសចរណ៍ភាគឥសានប្រទេស រួមមានខេត្តមណ្ឌលគីរី រតនគីរី ស្ទឹងត្រែង និងក្រចេះ។ (អានបន្ថែម)

លើសពីនេះ អាកាសយានដ្ឋាននេះ ក៏ស្ថិតក្នុងចំណោមគម្រោងសាងសង់អាកាសយានដ្ឋានចំនួន ៣ ដែលពីរទៀត ស្ថិតនៅក្នុងក្រុងប៉ោយប៉ែត និងខេត្តបាត់ដំបង។

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍