ស្ថានីយសូឡាខ្នាតតូចមួយនៅសៀមរាមបើកដំណើរការ ខណៈស្ថានីយ ៣ ធំៗទៀត ក៏គ្រោងនឹងបើកក្នុងឆ្នាំនេះដែរ

• 28 ខែ​មករា 2021
• Uncategorized @km
• 6 មើល

ស្ថានីយផលិតថាមពលអគ្គិសនីដើរដោយពន្លឺព្រះអាទិត្យអនុភាព ៣២គីឡូវ៉ាត់ នៅខេត្តសៀមរាប បានដាក់ឱ្យប្រើប្រាស់ជាផ្លូវការហើយកាលពីថ្ងៃទី២៧ ខែមករា កន្លងមកនេះ ខណៈរោងចក្រថាមពលសូឡា ៣ ផ្សេងទៀត សរុបអនុភាពជាង ១១០ មេហ្គាវ៉ាត ក៏គ្រោងដាក់ដំណើរការក្នុងដើមឆ្នាំ ២០២១ នេះដែរ។

បើយោងតាមក្រសួងបរិស្ថាន ស្ថានីយនេះមានទីតាំងស្ថិតនៅ មជ្ឈមណ្ឌលស្រាវជ្រាវនិងអភិរក្សកេសរកូល សុខ អានភ្នំគូលែន ដែលអាចផលិតថាមពលបានក្នុងរង្វង់ ១៥០គីឡូវ៉ាត់ម៉ោងក្នុងមួយថ្ងៃ ដែលគ្រប់គ្រាន់សម្រាប់ការប្រើប្រាស់ម៉ាស៊ីនត្រជាក់ និងម៉ាស៊ីនបូមទឹកបានរៀងរាល់ថ្ងៃ។

គម្រោងនេះផ្ទាល់គឺ ជាការបណ្ដាក់ទុនរួមរវាងក្រសួងបរិស្ថាន កម្មវិធីអភិវឌ្ឍន៍សហប្រជាជាតិ (UNDP) និងដៃគូអភិវឌ្ឍមួយចំនួន។

ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន បានលើកឡើងនៅក្នុងពិធីសម្ពោធថា ស្ថានីយសូឡានេះ នឹងជួយឱ្យមជ្ឈមណ្ឌលស្រាវជ្រាវសុខ អាន ភ្នំគូលែន នេះ មានប្រភពអគ្គិសនីស្អាតប្រើបាស់។

ជាមួយគ្នានេះ លោកស្រី Sonali Dayaratne តំណាង UNDP ប្រចាំកម្ពុជា ក៏បានវាយតម្លៃខ្ពស់លើគោលជំហរកម្ពុជាក្នុងការផលិតថាមពលស្អាតដើម្បីឆ្លើយតបនឹងការប្រែប្រួលអាកាសធាតុ។

គួរបញ្ជាក់ផងដែរថា គម្រោងរោងចក្រសូឡា ៣ ទៀតដែលគ្រោងនឹងបើកដំណើរការឆ្នាំ នេះ រួមមាន ស្ថានីយសូឡាអនុភាព២០មេហ្គាវ៉ាតនៅខេត្តស្វាយរៀង ស្ថានីយសូឡាអនុភាព៣០មេហ្គាវ៉ាតនៅខេត្តបន្ទាយមានជ័យ និងស្ថានីយសូឡាអនុភាព ៦០មេហ្គាវ៉ាត នៅសខេត្តបាត់ដំបង។ (អានបន្ថែម)

មកទល់បច្ចុប្បន្ន កម្ពុជាមានរោងចក្រថាមពលសូឡាយ៉ាងហោច ៥ ដែលកំពុងដំណើរភ្ជាប់ចូលបណ្តាញជាតិ គឺ ស្ថានីយសូឡា ១០មេហ្គាវ៉ាតនៅស្វាយរៀង ៨០មេហ្គាវ៉ាតនៅកំពង់ស្ពឺ ៦០មេហ្គាវ៉ាតនៅកំពង់ឆ្នាំ ៣០មេហ្គាវ៉ាតនៅពោធិ៍សាត់ និង៥មេហ្គាវ៉ាតនៅបាវិត។

 

• ការវិនិយោគ និងមូលធន
• ថាមពល និងបរិស្ថាន
• ថាមពល និងបរិស្ថាន
• គម្រោងអភិវឌ្ឍន៍
• ការវិនិយោគ និងមូលធន
• Investment and Funding
• Energy and Environment
• Projects Development
• គម្រោងអភិវឌ្ឍន៍
• Economy and Finance