អគារសួនច្បារអាកាសខ្ពស់បំផុតលើពិភពលោក តម្លៃ ២ពាន់លានដុល្លារ គ្រោងបើកការដ្ឋានឆ្នាំនេះ

22 ខែកុម្ភៈ 2021
ព័ត៌មានសំណង់
10 មើល

អគារធនាគារ Southbank តម្លៃជាង ២ ពាន់លានដុល្លារនៅទីក្រុង Melbourne នៃប្រទេសអូស្រ្តាលី នឹងក្លាយជាអគារសួនច្បារលើអាការ ឬ Vertical Garden Tower ខ្ពស់ជាងគេបំផុតនៅលើពិភពលោក ក្រោយសាងសង់រួចនៅពេល ៥ឆ្នាំខាងមុខ។

យោងតាមរបាយការណ៍របស់គេហទំព័រ Architecture & Design គម្រោងនេះនឹងត្រូវសាងសង់ ដោយក្រុមហ៊ុន Beulah និងត្រូវបានរចនាប្លង់ដោយ UNStudio និង Cox Architecture ដែលសុទ្ធសឹងតែជាក្រុមហ៊ុនល្បីល្បាញ។

អគារ Southbank by Beulah នេះ នឹងមានកម្ពស់ ៣៦៥ ម៉ែត្រនោះ ហើយគ្រប់ដណ្ដប់ដោយសួនច្បារអាកាស ឬ Vertical Garden ដ៏ធំ ពោលគឺស្មើនឹង ១,៥ ដងនៃផ្លូវរត់ជុំវិញសួន Royal Botanic Gardens នៃទីក្រុង Melbourne។

សួនច្បារអាកាសទាំងអស់គឺមានទំហំតូចៗ ដែលតភ្ជាប់គ្នាពីផ្នែកនីមួយៗនៃអគារ ដើម្បីបង្កើតជាសហគមន៍បៃតងមួយ ចាប់ពីជាន់ក្រោមដីដល់ជាន់លើបំផុត។ ហើយបើបូកសរុបផ្ទៃសួនទាំងអស់គឺអាចនឹងស្មើ ១៥.៥០០ ម៉ែត្រការ៉េ។

លើសពីនេះ រុក្ខជាតិទាំងអស់ត្រូវបានជ្រើសរើសដោយប្រុងប្រយ័ត្ន និងដាក់ដាំក្នុងលក្ខខណ្ឌពន្លឺ និង ខ្យល់ត្រឹមត្រូវ ដើម្បីឱ្យរុក្ខជាតិដុះបានល្អ។

ចំណុចពិសេសមួយទៀតនៃអគារ គឺប្រព័ន្ធធារាសាស្រ្ត ឬប្រព័ន្ធស្រោចស្រពដែលមានភាពច្នៃប្រឌិត នឹងវៃឆ្លាត ពោលគឺអាចប្រមូលទឹកភ្លៀងពីដំបូលអគារទៅស្ដុកក្រោយក្រោមដីសម្រាប់ប្រើប្រាស់។

នាយកប្រតិបត្តិក្រុមហ៊ុន Beulah លោក Adelene Teh បានឱ្យដឹងថា ក្រោយសាងសង់រួចអគារនេះនឹងក្លាយជាអគារអភិវឌ្ឍចំរុះ ពោលគឺនឹងប្រើប្រាស់ជា លំនៅដ្ឋាន សណ្ឋាគារ ការិយាល័យ និងផ្សារទំនើបជាដើម។

គួរបញ្ជាក់ផងដែរ គម្រោងនេះត្រូវបានអនុម័ត កាលពីខែមេសា ឆ្នាំ ២០២០ កន្លងមកនេះ ហើយរំពឹងថានឹងចាប់ផ្តើមសាងសង់នៅឆ្នាំនេះ ឬឆ្នាំក្រោយ ដោយនឹងបញ្ចប់ក្នុងរយៈពេល ៥ឆ្នាំ។