តើសេវាកម្មពិគ្រោះយោបល់សំណង់គឺជាអ្វី? ចាំបាច់យ៉ាងដូចមេ្ដច?

22 ខែកុម្ភៈ 2021
ព័ត៌មានសំណង់
14 មើល

ការសាងសង់គម្រោងអភិវឌ្ឍន៍នីមួយៗ រមែងមានការងារមួយចំនួនដែលស្មុគស្មាញ នឹងសាំយ៉ាំ ដែលបង្កជាការលំបាក ពិសេសសម្រាប់អ្នកអភិវឌ្ឍដែលទើបតែចូលមកប្រឡូកក្នុងវិស័យសំណង់ថ្មីៗ។ ប៉ុន្តែការងារស្មុគស្មាញទាំងនេះអាចដោះស្រាយបាន តាមរយៈក្រុមហ៊ុនពិគ្រោះយោបល់សំណង់។

តើសេវាកម្មពិគ្រោះយោបល់សំណង់គឺជាអ្វី? ចាំបាច់យ៉ាងដូចមេ្ដច?

សេវាកម្មលើការងារសាងសង់ គឺសេវាកម្មដែលផ្ដល់ដោយក្រុមហ៊ុនប្រឹក្សាយោបល់ ឬផ្តល់ដំបូន្មានជំនាញទៅលើការងារសាងសង់ទៅតាមផ្នែកនីមួយៗ។ ក្រុមហ៊ុនប្រឹក្សាទាំងនេះ ផ្តល់សេវាដល់ក្រុមហ៊ុនសាងសង់ ឬម្ចាស់គម្រោង ដោយគិតថ្លៃសេវាទៅតាមទំហំការងារ។

សេវាកម្មជាទូទៅរួមមាន ការគ្រប់គ្រងគម្រោង ការធ្វើពិនិត្យពិច័យលើការងារផ្នែកស្ថាបត្យកម្ម និងការវិភាគលើការគ្រប់គ្រងសំណង់ជាដើម។

លើសពីនេះ ក្រុមហ៊ុនប្រឹក្សាយោបល់ទាំងនេះ ក៏មានអ្នកជំនាញដែលមានបទពិសោធន៍ដូចជាស្ថាបត្យករ វិស្វករ និងអ្នកពិគ្រោះលើគម្រោងចំណាយ ដែលមានបទពិសោធន៍ និងវិជ្ជាជីវៈច្បាស់ផងដែរ។

ការប្រើប្រាស់សេវាកម្មនេះ អាចជួយឱ្យម្ចាស់គម្រោងដឹងច្បាស់ពីទំហំចំណាយច្បាស់លាស់ ពេលវេលានៃការសាងសង់ ភាពទុកចិត្តខ្ពស់ជាមួយអ្នកម៉ៅការ និងគុណភាពនៃសំណង់ផងដែរ។

យោងតាមក្រុមហ៊ុនពិគ្រោះយោបល់លើការងារសាងសង់ក្នុងស្រុកមួយ ពួកគេបានបែងចែកការផ្តល់សេវាកម្មពិគ្រោះរបស់ពួកគេជា ០៣ ដំណាក់កាល៖

ក. មុនពេលសំណង់ចាប់ផ្តើម:

ផ្តល់ជាគំនិតជូនម្ចាស់គម្រោង និងយកគំនិតម្ចាស់គម្រោងមកគូសជាប្លង់
លើកគម្រោងចំណាយ
ពិនិត្យប្លង់ និង គណនាលើសម្ភារៈសំណង់ និងតម្លៃគម្រោងតាមដំណាក់កាលនីមួយៗ
រៀបចំការដេញថ្លៃ ដើម្បីជ្រើសរើសក្រុមហ៊ុនសាង់សង់
ត្រួតពិនិត្យលើសំណុំកុងត្រារវាងម្ចាស់គម្រោង និងក្រុមហ៊ុនសាង់សង់តាមផ្នែកនីមួយៗ

ខ. កំឡុងពេលសាងសង់:

ការពិនិត្យគុណភាព ការងារដូចជា បុកគ្រឹះ សំណង់គ្រោង ប្រព័ន្ធ ទឹកភ្លើង និង ការងារបញ្ចប់
ការពិនិត្យ និងគ្រប់គ្រងសម្ភារៈសំណង់នៅការដ្ឋាន
ការពិនិត្យ និងសម្រួលការបើកប្រាក់ដល់ក្រុមហ៊ុនសំណង់

គ. ក្រោយពេលសាងសង់:

ការវាយតម្លៃសំណង់អគារសាងសង់រួច

ជារួមមក ការប្រើប្រាស់សេវាកម្មរបស់ក្រុមហ៊ុនពិគ្រោះយោបល់នឹងជួយពង្រឹងគុណភាព និងសុវត្ថិភាពសំណង់ ជាពិសេសដោះស្រាយការងារដែលស្មុគស្មាញ នឹងសាំយ៉ាំ ដល់ម្ចាស់គម្រោង។ ប៉ុន្តែច្បាប់មិនបានកំណត់ឱ្យម្ចាស់គម្រោងទាំងអស់ត្រូវតែប្រើប្រាស់សេវាកម្មនេះ ពោលគឺជម្រើសគឺអាស្រ័យនៅបទពិសោធន៍របស់ម្ចាស់គម្រោងនីមួយៗ។

- Video Advertisement -