ទុនវិនិយោគប្រមាណ ៥៣ ពាន់លានដុល្លារ កំពុងត្រូវការដើម្បីពង្រីកព្រលានយន្តហោះនានា ទូទាំងប្រទេសវៀតណាម

5 ខែមីនា 2021
ព័ត៌មានសំណង់
8 មើល

ប្រទេសវៀតណាម កំពុងត្រៀមស្វែងរកថវិកាសរុបប្រមាណ ៥៣ ពាន់លានដុល្លារអាមេរិក ដើម្បីបំពេញ មហិច្ឆតាពង្រីកសមត្ថភាពអាកាសយានដ្ឋាននានាក្នុងប្រទេស ក៏ដូចជាពង្រឹងវិស័យអាកាសចរណ៍របស់ខ្លួន ក្នុងរយៈពេល ៣០ ឆ្នាំខាងមុខ។ នេះបើយោងតាមអាជ្ញាធរអាកាសចរណ៍ស៊ីវិលវៀតណាម (CAAV) កាលពីថ្មីនេះ។

ប្រភពដដែលបានឱ្យដឹងថា ទឹកប្រាក់ ១៥,៨ ពាន់លានដុល្លារ នឹងត្រូវការជាចាំបាច់ក្នុងរយៈពេល ១០ ឆ្នាំខាងមុខ ហើយថវិកាប្រមាណ ៣៧ ពាន់លានដុល្លារបន្ថែមទៀត នឹងត្រូវការនៅចន្លោះឆ្នាំ ២០៣០ ទៅ ២០៥០។

ក្នុងផែនការមេនេះ រួមមានទាំងការសាងសង់អាកាសយានដ្ឋានថ្មី ក៏ដូចជាការពង្រីកសមត្ថភាពអាកាសយានដ្ឋានដែលមានស្រាប់។

ចំពោះអាកាសយានដ្ឋានដែលនឹងត្រូវសាងសង់ថ្មីរួមមាន អាកាសយានដ្ឋានអន្ដរជាតិ Long Thanh នៅទីក្រុងហូជីមិញ (គ្រោងចំណាយ ៥ ពាន់លានដុល្លារ) អាកាសយានដ្ឋាន Quang Tri នៅភាគកណ្ដាលនៃប្រទេស និង អាកាសយានដ្ឋាន SaPa ដែលស្ថិតនៅភាគខាងជើង។

ដោយឡែក អាកាសយានដ្ឋានដែលត្រូវពង្រីករួមមាន អាកាសយានដ្ឋាន Tan Son Nhat នៅទីក្រុងហូជីមីញ (គ្រោងចំណាយ៥ ពាន់លានដុល្លារ) អាកាសយានដ្ឋាន Noi Bai នៅហាណូយ (គ្រោងចំណាយ៥ ពាន់លានដុល្លារ) អាកាសយានដ្ឋាន Da Nang និង អាកាសយានដ្ឋាន Cam Ranh នៅខាងត្បូងនៅប្រទេស (គ្រោងចំណាយ៥ ពាន់លានដុល្លារ) ។

ប្រភពដដែលបានបញ្ជាក់ទៀតថា ដើម្បីសម្រេចផែនការប្រកបដោយមហិច្ឆតានេះបាន គឺតម្រូវឱ្យមានការសហការ និងវិនិយោគរួមគ្នា ពោលគឺទាំងការចំណាយរបស់រដ្ឋាភិបាល ការបោះទុនរបស់ដៃគូសាធារណៈ ក៏ដូចជាការវិនិយោគពីវិស័យឯកជន។

- Video Advertisement -