គម្រោងវិនិយោគថាមពលដើរដោយខ្យល់ នឹងសម្រេចការព្រមព្រៀងក្នុងឆ្នាំនេះ

27 ខែមីនា 2020
Uncategorized
10 មើល

កិច្ចព្រមព្រៀងស្តីពីគម្រោងថាមពលដើរដោយខ្យល់ របស់ក្រុមហ៊ុន The Blue Circle ដែលមានមូលដ្ឋាននៅប្រទេសសិង្ហបុរី រំពឹងថា នឹងត្រូវចុះហត្ថលេខានៅក្នុងឆ្នាំនេះ បន្ទាប់ពីក្រុមហ៊ុនបានចំណាយច្រើនខែបញ្ចប់ការសិក្សាសមិទ្ធលទ្ធភាពដំឡើងស្ថានីយផលិតថាមពលដើរដោយខ្យល់នៅក្នុងប្រទេសកម្ពុជា រួចមក។

លោក វ៉ិចទ័រ ហ្សូណា អគ្គនាយកផ្នែកថាមពល និងជាអ្នកនាំពាក្យក្រសួងរ៉ែ និងថាមពល បានឲ្យដឹងថា កាលពីថ្ងៃទី២៦ ខែមីនាថា កិច្ចព្រមបព្រៀងថាមពលនេះ គ្រោងនឹងចុះហត្ថលេខានៅក្នុងឆមាសទីមួយឆ្នាំ២០២០ ត្បិតថា បច្ចុប្បន្ននេះ ក្រុមហ៊ុន The Blue Circle និងអគ្គិសនីកម្ពុជា កំពុងចចារលើថ្លៃលក់ថាមពល។

លោក វ៉ិចទ័រ ហ្សូណា ថ្លែងថា៖ “ខ្ញុំមានសុទិដ្ឋិនិយមថា កិច្ចព្រមព្រៀងស្តីពីការវិនិយោគ លើថាមពលដើរដោយខ្យល់នេះ នឹងត្រូវចុះហត្ថលេខា នៅក្នុងឆមាសទី១នេះ ដោយសារការចចារ លើថ្លៃលក់ថាមពល រវាងក្រុមហ៊ុន Blue Circle និងអគ្គិសនីកម្ពុជា ( EDC ) កំពុងតែរកចំណុចថ្លៃរួមមួយ ដើម្បីធ្វើឲ្យយ៉ាងណា ឲ្យការវិនិយោគនេះ ចំណេញទាំងសងខាង”។

បើតាមលោក វ៉ិចទ័រ ហ្សូណា ថ្លៃលក់ថាមពល ពីការវិនិយោគថាមពលដើរដោយខ្យល់នេះ គឺមិនលើសពី ៧សេន ក្នុងមួយគីឡូវ៉ាត់ ម៉ោងទេ។

មន្ត្រីអ្នកនាំពាក្យដដែលបញ្ជាក់ថា ការវិនិយោគរបស់ក្រុមហ៊ុន គឺឆ្លើយតបទៅនឹងការកើនឡើងនៃតម្រូវការអគ្គិសនី និងស្របតាមគោលដៅរបស់រដ្ឋាភិបាលក្នុងការកាត់បន្ថយថ្លៃដើមសម្រាប់ទាំងការវិនិយោគ និងការប្រើប្រាស់របស់ប្រជាជនផង។

តាមផែនការ ក្រុមហ៊ុន The Blue Circle គ្រោងនឹងសាងសង់ទួរប៊ីនខ្យល់យ៉ាងហោចណាស់ ១០ ដែលមានកម្លាំង ៨០ មេហ្គាវ៉ាត់នៅលើកំពូលភ្នំបូកគោ នៅខេត្តកំពត។ បើតាមក្រុមហ៊ុននេះ ប្រទេសកម្ពុជាអាចបង្កើតថាមពលបាន ៥០០ មេហ្គាវ៉ាត់ពីថាមពលខ្យល់។

គួរបញ្ជាក់ថា ក្រុមហ៊ុនបានសិក្សាសក្តានុពលថាមពលខ្យល់ នៅប្រទេសកម្ពុជា នៅខេត្តកំពត និងខេត្តមណ្តលគិរី។ សម្រាប់ជំហានដំបូងនៃការវិនិយោគ ក្រុមហ៊ុនសម្រេចជ្រើសរើសយកទីតាំងលើភ្នំបូកគោ ខេត្តកំពតជាកន្លែងសាងសង់ស្ថានីយផលិតថាមពល។

បច្ចុប្បន្ននេះ ប្រភពថាមពលចម្បងនៅប្រទេសកម្ពុជា គឺថាមពលកកើតឡើងវិញ ដែលបានមកពីវារីអគ្គិសនី និងថាមពលពន្លឺព្រះអាទិត្យ។ ដោយឡែក ប្រសិនបើបានសាងសង់សម្រេចតាមផែនការមែននោះ ថាមពលដើរដោយខ្យល់នេះ នឹងក្លាយជាប្រភពថាមពលកកើតឡើងវិញថ្មីមួយទៀត សម្រាប់ប្រទេសកម្ពុជា៕