ក្រសួងអប់រំ៖ អាជីវកម្មក្លឹបហាត់ប្រាណនៅទូទាំងប្រទេស ត្រូវបិទជាណ្តោះអាសន្ន ដោយសារកូវីដ១៩

• 6 ខែ​មេសា 2020
• ព័ត៌មានអចលនទ្រព្យ
• 10 មើល

អាជីវកម្មក្លឹបហាត់ប្រាណនៅទូទាំងប្រទេស ត្រូវបានផ្អាកជាបណ្តោះអាសន្ន រហូតដល់ស្ថានភាពនៃការរាតត្បាតនៃជំងឺកូវីដ១៩ ត្រូវបានបញ្ចប់។ ការផ្អាកអាជីវកម្មក្លឹបហាត់ប្រាណនេះ ដើម្បីរួមចំណែកបង្ការ និងទប់ស្កាត់ការរីករាលដាលនៃជំងឺ កូវីដ ១៩ នៅកម្ពុជា នេះបើយោងតាមការប្រកាស ពីក្រសួងអប់រំ យុវជន និងកីឡា កាលនាព្រឹកថ្ងៃទី ៣ មេសា ២០២០ នេះ ។

លោក ពេជ្រ សុខជា គ្រូបង្វឹកនៅក្លឹបហាត់ប្រាណ Jouvance Fitness Center បានប្រាប់អ្នកសារព័ត៌មានថា ការបិទក្លឹបហាត់ប្រាណនេះ មានផលល្អ ត្រង់វាជួយបង្ការ និងទប់ស្កាត់ការឆ្លង ដោយសារឧបករណ៍ នៅក្នុងកន្លែងហាត់ប្រាណភាគច្រើនជាលោហៈធាតុ ។

ពាក់ព័ន្ធនឹងបញ្ហាផ្អាកការជួបជុំក្នុងទីសាធារណៈមានមនុស្សច្រើននេះ គេហទំព័រសារព័ត៌មាន nelsonstar.com របស់កាណាដា បានលើកឡើងដែរថា ការប្រមូលផ្តុំមនុស្សនៅតាមកន្លែងហាត់ប្រាណ នឹងបង្កើតបានជាការទាក់ទងគ្នាយ៉ាងជិតស្និទ្ធ អាចជាកត្តាជំរុញ និងបង្កើនការរីករាលដាលយ៉ាងឆាប់រហ័ស នៃមេរោគកូវីដ១៩ នេះបាន។

គួររម្លឹកដែរថា យោងតាមសេចក្តីជូនព័ត៌មាន នៃក្រសួងសុខាភិបាល បានអោយដឹងថា គិតមកដល់ត្រឹមវេលាម៉ោង០៧ព្រឹក ថ្ងៃទី០៣ ខែមេសា ឆ្នាំ២០២០ អ្នកឆ្លងវីរុសកូវីដ១៩ សរុបទាំងអស់នៅទូទាំងប្រទេស ចំនួន ១១៤នាក់ ។ ចំពោះអ្នកព្យាបាលជាសះស្បើយ សរុបកើនឡើង ចំនួន ៣៥នាក់ ក្នុងនោះមានជនជាតិខ្មែរ ២១ នាក់។ រីឯអ្នកកំពុងសម្រាកព្យាបាលនៅមន្ទីរពេទ្យ សរុបចំនួន៧៩នាក់៕

• ច្បាប់ និងបញ្ញាត្តិ
• ច្បាប់ និងបញ្ញាត្តិ