English 
ខ្មែរ 
CEO សណ្ឋាគារអន្ដរជាតិកំពូលៗ បង្ហាញពីយុទ្ធសាស្រ្តសំខាន់ៗ ៣ ចំណុច ដើម្បីឆ្លងផុតពីវិបត្តិកូវីដ
ឧស្សាហកម្មបដិសណ្ឋារកិច្ចគឺ ជាវិស័យមួយដែលទទួលរងគ្រោះខ្លាំងបំផុតពីការរាតត្បាតនៃមេរោគកូវីដ១៩។ គិតត្រឹម៤ខែ ដំបូងនៃ ២០២០ ភ្ញៀវទេសចបរទេសមកកម្ពុជា ធ្លាក់ចុះជាង៧០% អាជីវកម្មទេសចរណ៍ជិត ៣០០០ កន្លែងបានផ្អាកដំណើរការ សណ្ឋាគារ ផ្ទះសំណាក់ និងភោជនីដ្ឋានជាងសរុប ១០០០ កន្លែងបានបិទទ្វា ដែលបង្កឲ្យប្រជាជនរាប់ម៉ឺននាក់បាត់បងការងារ នេះបើយោងតាមសារព័ត៌មានកោះសន្តិភាពចុះផ្សាយកាលពី ខែមិថុនានេះ។ ជាលទ្ធផល វិបត្តិនេះអាចនឹងធ្វើវិស័យនេះខាតបងចំណូលប្រមាណ ៣ ពាន់លានដុល្លារអាមេរិកក្នុងមួយឆ្នាំ។
ផលប៉ះពាល់នេះរំពឹងថានឹងកាន់តែធ្ងន់ធ្ងរថែមទៀត បន្ទាប់ពីរដ្ឋាភិបាលកម្ពុជាកាលពីថ្មីៗនេះ បានតម្រូវឱ្យជនបរទេសទាំងអស់ដែលចូលមកប្រទេសកម្ពុជា ត្រូវតម្កល់ប្រាក់ ៣០០០ ដុល្លារ សម្រាប់ចំណាយទាក់ទងនឹងការធ្វើតេស្ត ការព្យាបាល និងកន្លែងស្នាក់នៅ ដើម្បីបង្កាក្នុងករណីរកឃើញថាវិជ្ជមាន។ ទោះបីជាធ្វើឡើងដើម្បីទប់ស្កាត់រលកទី២ ក៏ដោយ ប៉ុន្តែវិធានការនេះក៏នឹងប៉ះពាល់យ៉ាងខ្លាំងដល់វិស័យទេសចរណ៍ និងបដិសណ្ឋារកិច្ច ព្រោះថាជាក់ស្ដែងមិនមែនគ្រប់ភ្ញៀវទេសចរនឹងមាន ៣០០០ ដុល្លារសម្រាប់តម្កល់នោះទេ។
ទោះជាយ៉ាងណាក្តី ប្រតិបត្តិករឧស្សាហកម្មបដិសណ្ឋារកិច្ច គឺត្រូវតែបន្តតស៊ូ យកឈ្នះលើបញ្ហានេះ។ តើប្រតិបត្តិករឧស្សាហកម្មបដិសណ្ឋារកិច្ចគួរធ្វើយ៉ាងណា ដើម្បីឲ្យខ្លូនអាចឆ្លងផុតពីវិបត្តិនេះបាន? នាយកប្រតិបត្តិ ឬ CEO នៃបណ្តាញសណ្ឋាគារអន្តរជាតិធំ ៗ ជាច្រើនរួមមាន Hilton, Best Western, Minor International ជាដើម បានចែករំលែកយុទ្ធសាស្ត្រមូលដ្ឋានចាំបាច់ចំនួន ៣ ចំណុច ដែលប្រតិបត្តិករសណ្ឋាគារ អាចយកមកអនុវត្តដើម្បីឆ្លងផុតពីវិបត្តិនេះ។
១ ស្ដារទំនុកចិត្តភ្ញៀវឡើងវិញ
ក្នុងចំណោមយុទ្ធសាស្ត្រផ្សេងៗ ការស្ដារទំនុកចិត្តរបស់ភ្ញៀវ តាមរយៈការចំណាយថវិកាបន្ថែមទៅលើអនាម័យ គឺជាដំណោះស្រាយដ៏សំខាន់បំផុតដែលឧស្សាហកម្មបដិសណ្ឋារកិច្ចត្រូវតែអនុវត្តក្នុងកាលៈទេសៈនេះ។
លោក David Kong នាយកប្រតិបត្តិបណ្ដាញសណ្ឋាគារ Best Western បានឲ្យដឹងក្នុងបទសម្ភាសន៍ជាមួយ Yahoo Finance ថា កត្តាដែលពិបាកបំផុតនៃធ្វើឲ្យវិស័យសណ្ឋាគារងើបឡើងវិញ គឺការកសាងទំនុកចិត្តអតិថិជន។
លោកបាន មានប្រសាសន៏ថា ៖ «វីរុសនេះនឹងផ្លាស់ប្តូរជីវិតប្រចាំថ្ងៃរបស់យើងជារៀងរហូត ដូចច្នេះយើងត្រូវតែចេះបទបែនតាមកាលៈទេសៈ (ឬហៅ New Normal) យើងត្រូវធ្វើគឺធ្វើយ៉ាងណាឲ្យអតិថិជនមានផាសុខភាព និងទំនុកចិត្តក្នុងការមកស្នាក់នៅសណ្ឋាគាររបស់យើង” ។
លោក Christopher J. Nassetta នាយកប្រតិបត្តិ បណ្ដាញសណ្ឋាគារ Hilton ក៏បានបន្ទរយុទ្ធសាស្ត្រស្ដារទំនុកចិត្តភ្ញៀវនេះ ដោយបន្ថែមចំណុចគួរឱ្យចាប់អារម្មណ៍មួយថា ក្រៅពីការលើកកម្ពស់អនាម័យជាទូទៅ ការប្រើប្រាស់សេវាកម្មអ្នកជំនាញផ្នែកអនាម័យ និងសុខភាពដែលមានឈ្មោះល្បីល្បាញក្នុងការបំពេញភារកិច្ចនេះ គឺនឹងជួយបង្កើនទំនុកចិត្តសម្រាប់សាធារណជនកាន់តែខ្លាំងថែមទៀត។
លោក Nassetta បានបន្តថា ក្រុមហ៊ុនរបស់លោក បានសហការជាមួយនឹង ក្រុមហ៊ុន Lysol និង Mayo Clinic (អ្នកជំនាញផ្នែកអនាម័យនិងសុខភាពល្បីល្បាញនៅសហរដ្ឋអាមេវិក) មកជួយបំពេញការងារផ្នែកអនាម័យ ក៏ដូចជាបណ្តុះបណ្តាលបុគ្គលិកទាក់ទងនឹងអនាម័យ។ ទាំងនេះគឺដើម្បីធ្វើឱ្យប្រាកដចិត្តថា អ្នកមកស្នាក់នៅ Hilton នឹងមានអារម្មណ៍ថាមានសុវត្ថិភាព។
លោកបានបន្ថែមថា ៖ « នៅពេលដែលអ្នកចូលមកស្នាក់នៅក្នុង បន្ទប់របស់ Hilton នាពេលអនាគត អ្នកនឹងត្រូវបកផ្លាកនៅទ្វារលើបន្ទប់ ដែលបង្ហាញថាបន្ទប់នេះត្រូវបានសម្អាតតាមស្តង់ដារខ្ពស់បំផុត [ដូចជារបស់ថ្មីបកកេស អច្ចឹង]»។
ការសហប្រតិបត្តិការជាមួយក្រុមហ៊ុនអ្នកជំនាញផ្នែកអនាម័យនិងសុខភាពល្បីល្បាញ ចាត់ទុកថាវិធានការឆ្លាតវៃមួយ ព្រោះថាវានឹងធ្វើ ធ្វើឲ្យភ្ញៀវប៉ុន្តែជឿទុកចិត្តច្រើនជាងការជូតសម្អាតដោយបុគ្គលិកសណ្ឋាគារធម្មតាៗ។ នេះគឺជាយុទ្ធសាស្ត្រជាក់ស្តែងមួយដែលប្រតិបត្តិករសណ្ឋាគារនៅកម្ពុជា ជាពិសេសសណ្ឋាគារលំដាប់ខ្ពស់គួរពិចារណាយកមកអនុវត្ត។
២ ផ្តោតលើទីផ្សារក្នុងស្រុកនៅដំណាក់កាលដំបូង
ទោះបីជាប្រតិបត្តិករវិស័យបដិសណ្ឋារកិច្ចខិតខំពង្រឹកអនាម័យក្នុងសណ្ឋាគារបស់ខ្លួនក្ដី ជាក់ស្ដែង គឺត្រូវការពេលយូរ មុននឹងមានភ្ញៀវទេសចរធ្វើដំណើរទៅមកដូចមុន ជាពិសេសភ្ញៀវទេសចរអន្តរជាតិ។ ដូចច្នេះ ក្នុងខណៈពេលនេះ ប្រតិបត្តិករគួរតែផ្តោតលើទីផ្សារក្នុងស្រុក ពោលគឺធ្វើយ៉ាងណាទាក់ទាញភ្ញៀវទេសចរក្នុងស្រុក ឲ្យមកស្នាក់នៅ ឬ ប្រើប្រាស់សេវាកម្មរបស់ខ្លួនឲ្យច្រើនបំផុត ដើម្បីរក្សាចំណូល។
យោងតាមនាយកប្រតិបត្តិនិងជាប្រធានក្រុមហ៊ុន Minor International លោក Bill Heinecke ក្នុងបទសម្ភាសន៍ជាមួយទូរទស្សន៍ CNBC កាលពីថ្ងៃទី ១៥ ខែឧសភា ទេសចរណ៍ក្នុងស្រុកគឺ ជាគន្លឹះសំខាន់សម្រាប់ឧស្សាហកម្មបដិសណ្ឋារកិច្ចនៅដំណាក់កាលដំបូង ក្នុងការស្ដារស្ថានភាពក្រុមហ៊ុនឡើងវិញ។
លោក Heinecke បានមានប្រសាសន៍ថា ៖ «ទេសចរណ៍ក្នុងស្រុកនឹងចាប់ផ្តើមមុន ខណៈដែលទេសចរណ៍អន្តរជាតិនឹងងើបឡើងវិញនៅពេលក្រោយ។ អាស៊ីនឹងងើបឡើងវិញលឿនជាងបណ្តាប្រទេសអ៊ឺរ៉ុប»។
លោក បន្តទៀតថា ៖ «ជាក់ស្ដែង គឺមានភ្ញៀវទេសចរជាច្រើន ដែលមានថវិកា ហើយចង់ចេញដើរកំសាន្ដ ប៉ុន្ដែពួកគេនៅខ្លាច ប៉ុន្តែការធ្វើដំណើរកំសាន្ដក្នុងស្រុកគឺអាចមានហានិភ័យទាបជាងឆ្លងប្រទេស។ ដូចច្នេះ ម្ចាស់សណ្ឋាគារត្រូវផ្តោតលើទីផ្សារនេះ ហើយធ្វើភ្ញៀវមានអារម្មណ៍ថាមានសុវត្ថិភាព»។
លើសពីនេះទៀតដើម្បីជំរុញការធ្វើដំណើរក្នុងស្រុក ប្រតិបត្តិករវិស័យបដិសណ្ឋារកិច្ចត្រូវតែស្វែករកសកម្មភាពណាដែលសុវត្ថិភាព និងច្នៃប្រឌិត ឲ្យភ្ញៀវធ្វើក្នុងអំឡុងពេលស្នាក់នៅ ឧទាហរណ៍ដូចជា Staycation។ ប្រតិបត្តិករគួរធ្វើឱ្យការស្នាក់នៅ ប្រកបដោយភាពសប្បាយរីករាយ ព្រមជាមួយនឹងជម្រើសសកម្មភាព និងការផ្តល់ជូនពិសេសជាច្រើនដូចជា ការបញ្ចុះតម្លៃសម្រាបស់ការស្នាក់នៅរយៈពេលវែង កញ្ចប់អាហារឥតគិតថ្លៃ គម្រោងធ្វើដំណើរក្រៅផ្ទះដូចជាការបោះតង់ជាដើម។
៣ ទទួលស្គាល់ការពិតនៃភាពធម្មតាថ្មី និងធ្វើពិពិធកម្មគំរូអាជីវកម្ម
វិស័យបដិសណ្ឋារកិច្ចគួរតែទទួលស្គាល់ការពិតដែលថាឥរិយាបថរបស់អតិថិជនបានផ្លាស់ប្តូររឺហៅថា ភាពធម្មតាថ្មី ឬ New Normal ហើយត្រូវពិចារណាឡើងវិញនូវគំរូប្រតិបត្តិការអាជីវកម្ម។ អាកប្បកិរិយារបស់អ្នកទេសចរនឹងមិនវិលមករកភាពធម្មតាទេ ដរាបណានៅរកឃើញវ៉ាក់សាំងមិនទាន់ឃើញ។ ដូច្នេះការកែសម្រួលប្រព័ន្ធគ្រប់គ្រង គឺមានសារៈសំខាន់ណាស់។
យោងតាមការវិភាគរបស់ Harvard Business Review ការផ្លាស់ប្តូរដែលមានការគ្រប់គ្រងប្រកបដោយការទទួលខុសត្រូវ គឺជាគន្លឹះក្នុងស្ដារអាជីវកម្មឡើងវិញពីវិបត្តិ។
HLB Global បានបង្លាញថាការផ្លាស់ប្តូរឲ្យសមស្របទៅភាពធម្មតាថ្មី រួមមាន ការស្រាវជ្រាវក្នុងស្រុកជាប្រចាំសម្រាប់គោលការណ៍ណែនាំអំពីសុខភាពនិងសុវត្ថិភាព បង្វឹកបណ្តុះបណ្តាលបុគ្គលិកអំពីរបៀបធ្វើការប្រកបដោយសុវត្ថិភាព ស្វែងរកវិធីថ្មីៗដើម្បីធ្វើឱ្យគំរូអាជីវកម្មមានភាពទាក់ទាញ និងរៀបចំគម្រោងនាពេលអនាគតឡើងវិញ ជាដើម។
លើសពីនេះ ការធ្វើពិពិធកម្មគំរូអាជីវកម្ម ឬ ការធ្វើឲ្យអាជីវកម្មមានភាពចំរុះជាងមុន ក៏ជាផ្នែកមួយនៃដំណោះស្រាយសំខាន់ផងដែរ។ ក្រៅពីផ្តល់សេវាកម្មសណ្ឋាគារ និងភោជនីយដ្ឋានប្រតិបត្តិករក៏អាចពិចារណាបូកបញ្ចូលនូវអាជីវកម្មផ្សេងៗទៀតដូចជា ការទទួលយកការបញ្ជាទិញអាហារសម្រាប់មជ្ឈមណ្ឌលចត្តាឡីស័ក ការបង្រៀនធ្វើម្លូប ការបណ្ដុះបណ្ដាលធនធានផ្នែកបដិសណ្ឋារកិច្ចក្នុងតម្លៃទាប ការលក់ឧបករណ៍ឬគ្រឿងផ្សំអាហារ ឬការផ្តល់សេវាកម្មដឹកជញ្ជូន ជាដើម។
ជាសរុប ទាំងនេះគ្រាន់តែជាយុទ្ធសាស្រ្តមូលដ្ឋានក្នុងចំណោមដំណោះស្រាយជាច្រើនទៀត ដើម្បីអាចជួយឲ្យប្រតិបត្តិករអាចស្ដារអាជីវកម្មរបស់ខ្លួនពីវិបត្តិកូវីដ ១៩ នេះបាន ។ ដូច្នេះប្រតិបត្តិករគ្រប់រូប គួរតែស្ថិតក្នុងបច្ចុប្បន្នភាព និងទទួលយកបើកឱកាសថ្មីៗ ជានិច្ច។