ខេត្តព្រះសីហនុនឹងសង់ផ្លូវថ្មើរជើងក្រោមដី ២ កន្លែង លើផ្លូវជាតិលេខ៤ នៅខែក្រោយ

• 23 ខែ​តុលា 2020
• Uncategorized
• 7 មើល

គម្រោងសាងសង់ផ្លូវ ថ្មើរជើងក្រោមដី ២ កន្លែង ដែលមានទីតាំងនៅត្រង់ចំណុច រោងចក្រកាត់ដេរញ៉ូវស្តារ និងក្បែរវិទ្យាល័យឃ្លាំងលើ លើផ្លូវជាតិលេខ ៤ ក្នុងខេត្តព្រះសីហនុ នឹងចាប់ផ្ដើមសាងសង់ នៅខែវិច្ឆិកាខាងមុខនេះ។

នេះបើយោងតាមប្រសាសន៍របស់ឧត្តមសេនីយ៍ទោ វង្ស សំអាត អគ្គមេបញ្ជាការរងកងវិស្វកម្មតេជោ ហ៊ុន សែនសៀមរាប និងជាអ្នកដឹកនាំគម្រោងនេះ បានប្រាប់វិទ្យុជាតិកម្ពុជាកាលពីថ្ងៃទី ២៣ តុលានេះ។

ផ្លូវថ្មើរជើងក្រោមដីនេះ មានប្រវែង ២៩ ម៉ែត្រ ទទឹង ៧ ម៉ែត្រ និងកម្ពស់ ៣ ម៉ែត្រ ហើយនឹងប្រើប្រាស់រយៈពេល ៣ ខែក្នុងការសាងសង់។

ផ្លូវថ្មើរជើងក្រោមដីទី ១ ត្រង់ចំណុចរោងចក្រកាត់ដេរញ៉ូវស្តារ ធ្វើឡើងក្នុងគោលបំណង កាត់បន្ថយការកកស្ទះចរាចរណ៍ ជាពិសេសត្រង់ចំណុចរោងចក្រកាត់ដេរនេះតែម្ដង ដែលជាកន្លែង កម្មករ កម្មការិនី ធ្វើដំណើរច្រើន នៅម៉ោងចូលចេញធ្វើការ។

ចំណែកឯ ផ្លូវថ្មើរជើងក្រោមដីទី ២ ត្រង់ចំណុច ក្បែរវិទ្យាល័យឃ្លាំងលើ គឺធ្វើឡើងដើម្បីសម្រួលដល់ សិស្សានុសិស្សឆ្លងផ្លូវដោយមានសុវត្ថិភាព និងបញ្ចៀសនូវគ្រោះថ្នាក់ចរាចរណ៍ផ្សេងៗ។

គួរបញ្ជាក់ផងដែរថា ផែនការខ័ណ្ឌចែកពុះទ្រូងផ្លូវជាតិលេខ៤ ចាប់ពីមុខរោងចក្រស្រាបៀអង្គរដល់មុខទីបញ្ជាការកងរាជអាវុធហត្ថ គឺត្រូវពង្រីកទទឹង២៩ម៉ែត្រ និងបណ្តោយ ៦៧០០ម៉ែត្រ ដោយធ្វើការខ័ណ្ឌចែកពុះទ្រូងផ្លូវដោយសួនច្បារ។

• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• Road and Infrastructure
• Projects Development
• គម្រោងអភិវឌ្ឍន៍