រដ្ឋបាលខេត្តកំពតកំពុងកំណត់ទីតាំងសម្រាប់សាងសង់អគាររដ្ឋបាលក្រុងបូកគោថ្មី

8 ខែមិថុនា 2021
Uncategorized
14 មើល

រដ្ឋបាលខេត្តកំពត និងភាគីពាក់ព័ន្ធ បាននឹងកំពុងចុះត្រួតពិនិត្យសិក្សាទីតាំងសម្រាប់សាងសង់អគាររដ្ឋបាលទីក្រុងបូកគោថ្មី ដោយការដ្ឋានគ្រោងចាប់ផ្ដើមក្នុងពេលឆាប់ៗខាងមុខ ក្រោយទីតាំងត្រូវបានកំណត់រួចជាស្រេច។

នេះបើតាមដំណើរចុះពិនិត្យទីតាំងផ្ទាល់របស់ឯកឧត្តម ជាវ តាយ អភិបាលខេត្តកំពត កាលថ្ងៃទី៧ ខែមិថុនា ឆ្នាំ២០២១។

ចំណុចដែលរដ្ឋបាលខេត្តកំពុងពិចារណាគឺ នៅទីតាំងស្នាក់ការចាស់របស់មន្ទីរបរិស្ថានខេត្តកំពត ជាប់នឹងផ្លូវនៅជិតប៉ុស្តិ៍ត្រួតពិនិត្យឡើងទៅរមណីយដ្ឋានឋានសួគ៌បូកគោ។

បើយោងតាម ឯកឧត្តម ជាវ តាយ រដ្ឋបាលខេត្តកំពុងត្រៀមដាក់សំណើទៅក្រុមហ៊ុន Sokha Hotel ដើម្បីជ្រើសរើសទំហំ និងទីតាំងឱ្យបានជាក់លាក់។

ឯកឧត្តមបន្តថា ក្រៅពីការសាងសង់អគាររដ្ឋបាល ក្រុមការងារក៏គ្រោងនឹងសាងសង់ហេដ្ឋារចនាសម្ព័ន្ធផ្សេងៗផងដែរ ដើម្បីបង្កភាពងាយស្រួលសល់ពលរដ្ឋបាន និងពង្រីកសក្ដានុពលក្នុងតំបន់នោះ ។

ដូច្នេះ ឯកឧត្តម ក៏បានស្នើក្រុមហ៊ុន Sokha Hotel ឱ្យសហការជាយមួយមន្ត្រីជំនាញ និងអាជ្ញាធរពាក់ព័ន្ធ ដើម្បីចុះវាស់វែង គោលបំណងជំរុញដំណើរការឱ្យបានលឿនជាងមុន។

ជាការឆ្លើយតប អគ្គនាយកក្រុមហ៊ុន Sokha Hotel Group ឧកញ៉ា សុខ គង់ បានគាំទ្រលើការជ្រើសទីតាំងនេះ ដោយនឹងជួយជំរុញរាល់ការងារឱ្យទៅមុខដោយរលូន។

គួរបញ្ជាក់ផងដែរថា ទីក្រុងបូកគោត្រូវបង្កើតជាផ្លូវការកាលពីខែមីនា កន្លងទៅនេះ ដោយកាត់យកឃុំ ៣ ពីស្រុកទឹកឈូ។ ការបង្កើតទីក្រុងនេះ ធ្វើឡើងក្នុងគោលបំណងដើម្បីអភិវឌ្ឍតំបន់នេះ ឱ្យទៅជាក្រុងវៃឆ្លាត ទេសចរណ៍ ប្រវត្តិសាស្រ្ត និងធម្មជាតិ ដ៏ពិសិដ្ឋគ្មានពីរនៃព្រះរាជាណាចក្រកម្ពុជា។ (អាមបន្ថែម)