អ្នកវិភាគ៖ ខេត្តមួយនៃភាគឦសានជាទិសដៅវិនិយោគសក្ដានុពលខ្ពស់សម្រាប់អ្នកហ៊ានប្រថុយ

• 12 ខែ​មករា 2021
• ព័ត៌មានអចលនទ្រព្យ
• 9 មើល

អ្នកវិភាគផ្នែកអចលនទ្រព្យ បានបង្ហើបឱ្យដឹងថា ខេត្តមណ្ឌលគិរីជាទិសដៅវិនិយោគសក្ដានុពលមួយ សម្រាប់អ្នកវិនិយោគិនដែលហ៊ានប្រថុយខ្ពស់ ពីព្រោះដីនៅទីតាំងនោះមានទាំងឱកាស និងបញ្ហា ប៉ុន្តែបើវិនិយោគត្រូវ គឺអាចនឹងចំណេញខ្លាំងនៅ៥ ឆ្នាំខាងមុខ។

ស្ថាបនិក និងនាយកនៃក្រុមហ៊ុន Key Real Estate លោក សន សៀប បានប្រាប់ទស្សនាវដ្តីសំណង់ និងអចលនទ្រព្យ កាលពីពេលថ្មីៗនេះថា៖ «នៅមណ្ឌលគិរី អ្វីដែលទាក់ទាញ គឺអាកាសធាតុ និងទេសភាព ដែលធ្វើឱ្យភ្ញៀវទេសចរចង់ទៅដើរកំសាន្តម្តងហើយ ចង់ទៅម្តងទៀត។ ដោយឡែកការវិនិយោគលើអចលនទ្រព្យនៅមានភាពមិនច្បាស់លាស់ ដោយសារមានបញ្ហាទៅលើការវិនិយោគដីបរិស្ថាន ឬដីរបស់រដ្ឋ»។

លោកបានបន្តទៀតថា៖ « នៅមណ្ឌលគិរីមានសក្ដានុពលខ្លាំងលើអេកូទេសចរណ៍ ក៏ប៉ុន្តែគឺត្រូវការពេលប្រមាណ ១ ទៅ ៥ឆ្នាំ ទើបដីរៀបចំស្រួលបួល។ តែបើចាំដល់ពេលនោះ ទើបវិនិយោគ ដីគឺអាចឡើងថ្លៃអស់ហើយ»។

លោក ក៏បានបង្ហើមទៀតថា ដោយសារតែភាពមិនច្បាស់លាស់ និងបញ្ហាដីរដ្ឋនេះហើយ ទើបធ្វើឱ្យតម្លៃដីនៅខេត្តមួយនេះនៅទាប ហើយអ្នកវិនិយោគលើដីងាយស្រួលទាញផលប្រយោជន៍ពីវា ប៉ុន្តែត្រូវប្រុងប្រយ័ត្នខ្លាំង។

គួរបញ្ជាក់ថា កាលពីពេលថ្មីៗនេះ រដ្ឋាភិបាល បានសម្រេចជាផ្លូវការឱ្យសាងសង់គម្រោងអាកាសយានដ្ឋាននៅមណ្ឌលគិរី ដោយក្រុមហ៊ុនចិននឹងជាអ្នកអភិវឌ្ឍន៍គម្រោងនេះ។ នេះជាកត្ដាសំខាន់មួយទៀតដែលធ្វើឱ្យខេត្តមណ្ឌលគិរីក្លាយជាទិសដៅវិនិយោគសក្ដានុពល។ (អានបន្ថែម)

• អត្ថបទវិភាគ
• ចំណេះដឹង និង បទពិសោធន៍
• កិច្ចសហប្រតិបត្តិការ និងឱកាស
• អត្ថបទវិភាគ
• ចំណេះដឹង និង បទពិសោធន៍