ចលករសំខាន់៥នេះ នឹងជួយជំរុញទីផ្សារអលចនទ្រព្យកម្ពុជាឱ្យកើនឡើងវិញនៅឆ្នាំ ២០២១

• 20 ខែ​មករា 2021
• ព័ត៌មានអចលនទ្រព្យ
• 9 មើល

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក ច្រឹក សុខនីម បានឲ្យដឹងថា មាន ៥ ចលករសំខាន់ៗ ដែលបានធ្វើឱ្យទីផ្សារអចលនទ្រព្យកម្ពុជាមានស្ថិរភាពក្នុងឆ្នាំ២០២០ ហើយនឹងជួយជំរុញឱ្យមានការកើនឡើងនៅឆ្នាំ២០២១។

លោកបានពន្យល់ថា៖ «ចំណុចសំខាន់ទី១ គឺការផ្គត់ផ្គង់ប្រាក់កម្ចីទិញលក់អចលនទ្រព្យពីធនាគារនៅមានភាពរឹងមាំ។ ទោះមានវិបត្តិកូវីដក្ដី ធនគារនៅតែបន្តបញ្ចេញសាច់ប្រាក់ ដែលនេះគឺជួយជំរុញការទិញលក់ឱ្យនៅតែបន្ត»។

ប្រធានសមាគមរូបនេះ ក៏បានឱ្យដឹងទៀត កត្តាសំខាន់មួយទៀត គឺតម្រូវការនៅក្នុងស្រុកដែលបន្តកើនឡើង។ ទោះការវិនិយោគពីក្រៅស្ងប់ស្ងាត់ក៏ពិតមែន តែវិនិយោគិនក្នុងស្រុកនៅតែបន្តទិញលក់ ជាពិសេសនៅជាយរាជធានីភ្នំពេញ ខេត្តកំពង់ស្ពឺ កំពត កែបជាដើម។

លោកបន្តថា៖ «ចំណុចសំខាន់ទី៣ វិនិយោគិនអចលនទ្រព្យគឺ គេគិតវែងឆ្ងាយ គឺមិនមែនវិនិយោគរំពឹងចំណេញក្នុង ១ ឆ្នាំ ២ ឆ្នាំទេ គេសម្លឹង ៥ ទៅ ១០ឆ្នាំ។ ហេតុនេះ ហើយទើបទោះមានវិបត្តិកូវីដក្នុងឆ្នាំ២០២០ក្ដី ក៏វិស័យអចលនទ្រព្យនៅតែមានការទិញលក់ដែរ»។

«លើសពីនេះ ចំណុចសំខាន់មួយទៀតគឺ ប្រទេសកម្ពុជាយើងមិនទាន់ប្រើប្រាស់ ឬ អនុវត្តនូវ Master Plan គោលដើម្បីគ្រប់គ្រង់ដីទេ។ ដូច្នេះវាជាកត្តាផ្តល់ឱកាសឱ្យដីនៅគ្រប់ទីកន្លែងអាចឡើងថ្លៃបាន»។

លោក ច្រឹក សុខនីម ក៏បានបង្ហាញថា គោលនយោបាយរបស់រាជរដ្ឋាភិបាលជួយក្នុងការអភិវឌ្ឍ គឺទីចលករទី ៥ និងជាចលករសំខាន់បំផុត ដែលជួយជំរុញឱ្យវិស័យអចលនទ្រព្យមានការរីកចម្រើន។

គួរបញ្ជាក់ផងដែរ ចរន្តទិញលក់អចលនទ្រព្យឆ្នាំ ២០២០ បានធ្លាក់ចុះ ១៥% ទៅ ២០% ប៉ុន្តែតម្លៃទិញលក់ជាមធ្យមគឺមិនសូវមានការប្រែប្រួលខ្លាំងប៉ុន្មានទេ។ ហើយអ្នកជំនាញក៏បានព្យាករថាវិស័យនេះ នឹងមានសន្ទុះកើនឡើង ៦០% នៅឆ្នាំ ២០២១។ (អានបន្ថែម និងបន្ថែម)

• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ
• អត្ថបទវិភាគ
• ចំណេះដឹង និង បទពិសោធន៍
• ធុរកិច្ច និងទីផ្សារ