សាលាក្រុងបញ្ជាឱ្យរុះរើសំណង់មិនរៀបរយលើផ្ទៃទន្លេក្នុងពេល ១សប្ដាហ៍ បើមិនដូច្នេះរដ្ឋនឹងប្រើធម៌ក្ដៅ

• 2 ខែ​មិថុនា 2021
• ព័ត៌មានអចលនទ្រព្យ
• 15 មើល

រដ្ឋបាលរាជធានីភ្នំពេញ បានបញ្ជាឱ្យអ្នកលបលួចធ្វើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយទាំងអស់នៅលើផ្ទៃទន្លេ ក្នុងភូមិសាស្ត្ររាជធានីភ្នំពេញ ត្រូវរុះរើជាបន្ទាន់ក្នុងពេល១សប្តាហ៍ បើមិនដូច្នេះអាជ្ញាធរនឹងចាត់វិធានការក្តៅ ដោយមិនទទួលខុសត្រូវលើការខូចខាតឡើយ។

ប្រកាសរបស់រដ្ឋបាលរាជធានីភ្នំពេញ នៅថ្ងៃទី២ ខែមិថុនា នេះ បានឱ្យដឹងថា កន្លងមកមានជនឱកាសនិយមមួយចំនួនបានលបលួចធ្វើសំណង់នានាលើផ្ទៃទឹក ហើយប្រែក្លាយទៅជាកន្លែងស្នាក់នៅដោយខុសច្បាប់ និងអាណាធិបតេយ្យ។

ទង្វើនេះបានបង្កឱ្យមានបញ្ហាជាច្រើនដូចជា ការបាត់បង់សណ្តាប់ធ្នាប់ ការប៉ះពាល់ដល់ផ្លូវនាវាចរ ប្រព័ន្ធអេកូឡូស៊ី និងចរន្តទឹកហូរ ការបញ្ចេញកាកសំណល់និងការបន្ទោបង់ក្នុងទន្លេ ដែលប៉ះពាល់ដល់ជីវចម្រុះ និងគុណភាពទឹក និងពិសេសប៉ះពាល់ដល់សោភ័ណភាពរាជធានីភ្នំពេញ និងសុខភាពនៃប្រជាពលរដ្ឋ។

ដូច្នេះទើប រដ្ឋបាលសម្រេចបញ្ជាឱ្យម្ចាស់សំណង់ទាំងនេះ ត្រូវរុះរើ ឬចល័តចេញជាបន្ទាន់ ក្នុងពេល ១ សប្ដាហ៍ គិតចាប់ពីកាលបរិច្ឆេទចេញសេចក្តីជូនដំណឹងនេះតទៅ។

ក្នុងករណីផុតរយៈពេលនេះ រដ្ឋបាលរាជធានីភ្នំពេញ នឹងចាត់វិធានកម្ទេចដោយពុំទទួលខុសត្រូវលើការខូចខាត ឬការបាត់បង់ឡើយ។ លើសពីនេះ ក្នុងករណីរឹងរួស មន្រ្តីជំនាញក៏នឹងកសាងសំណុំរឿងបញ្ជូនទៅតុលាការតាមផ្លូវច្បាប់ផងដែរ៕

• ច្បាប់ និងបញ្ញាត្តិ
• ច្បាប់ និងបញ្ញាត្តិ