ក្រុមហ៊ុនឥណ្ឌាមួយចំនួនចង់មកប្រឡូកក្នុងវិស័យរុករករ៉ែនៅកម្ពុជា ពិសេសរ៉ែមាស និងដែក

• 14 ខែ​កញ្ញា 2021
• Uncategorized
• 9 មើល

អគ្គរដ្ឋទូតឥណ្ឌាប្រចាំនៅកម្ពុជាបានឱ្យដឹងថា ក្រុមហ៊ុនឥណ្ឌាមួយចំនួនកំពុងសំឡឹងឃើញសក្ដានុពល និងស្វែករកឱកាសមកវិនិយោគលើវិស័យរុករកធនធានរ៉ែនៅកម្ពុជាបន្ថែមទៀត ពិសេសរ៉ែមាស និងរ៉ែដែក។

លោកជំទាវអគ្គរដ្ឋទូត Devyani Uttam Khobragade បានលើកឡើងដូច្នេះ នៅក្នុងជំនួបជាមួយ ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល កាលពីពេលថ្មីៗនេះ។

យោងតាមក្រសួងរ៉ែ និងថាមពល ជំនួបពិភាក្សាការងារនេះ ផ្តោតលើសក្តានុពល និងឱកាសនៃការពង្រីក និងពង្រឹងកិច្ចសហប្រតិបត្តិការវិនិយោគ និងពាណិជ្ជកម្មរបស់ក្រុមហ៊ុនឥណ្ឌា ក្នុងនោះរួមមាន គម្រោងអភិវឌ្ឍន៍រ៉ែមាស រ៉ែដែក និងធនធានរ៉ែដទៃទៀត។

បន្ថែមពីលើនេះ ភាគីទាំង ២ ក៏បានពិភាក្សាលើគម្រោងអភិវឌ្ឍន៍វិស័យថាមពល ដោយផ្តោតលើការអភិវឌ្ឍខ្សែបណ្តាញបញ្ជូន និងខ្សែបណ្តាញចែកចាយថាមពលអគ្គិសនី គម្រោងអភិវឌ្ឍន៍វិស័យប្រេង និងឧស្ម័ន។

ឯកឧត្តមរដ្ឋមន្ត្រី បានស្វាគមន៍និងគាំទ្រយ៉ាងពេញទំហឹងក្នុងការសម្របសម្រួលលើកិច្ចសហប្រតិបត្តិការ និងជំរុញឱ្យមានក្រុមហ៊ុនវិយោគរបស់ឥណ្ឌានៅកម្ពុជាឱ្យកាន់តែច្រើន។

សូមបញ្ជាក់ថា បច្ចុប្បន្ន មានក្រុមហ៊ុនរ៉ែមាស Mesco Gold របស់ឥណ្ឌា ដែលទទួលបានអាជ្ញាបណ្ណរុករករ៉ែមាសនៅខេត្តរតនគីរី។

• ថាមពល និងបរិស្ថាន
• Energy and Environment
• ថាមពល និងបរិស្ថាន