NagaCorp គ្រោងចាប់ផ្តើមសាងសង់តួអគារ Naga ទី៣ នៅឆមាសទី១ ឆ្នាំ២០២៣

• 25 ខែ​កញ្ញា 2021
• Uncategorized
• 16 មើល

ក្រុមហ៊ុនកាស៊ីណូ NagaCorp គ្រោងចាប់ផ្តើមសាងសង់តួអគារគោលកម្ពស់ ៦៦ជាន់ នៃគម្រោង NagaWorld ទី៣ នៅឆមាសទី១ ឆ្នាំ២០២៣ ក្រោមក្រុមហ៊ុនបញ្ចប់ការបុកគ្រឹះ និងការដ្ឋានចាំបាច់ផ្សេងៗទៀត។

សេចក្ដីប្រកាសរបស់ក្រុមហ៊ុនចេញផ្សាយកាលពីថ្ងៃទី ២០ កញ្ញា ឆ្នាំ ២០២១ បានឱ្យដឹងថា បច្ចុប្បន្ន ការងារគូប្លង់លម្អិត និងរចនាកំពុងបន្តធ្វើតាមផែនការ ទិសដៅបញ្ចប់ប្លង់លម្អិតនៃអគារគោល (Superstructure) នៅឆ្នាំ២០២៣។

ដោយឡែក ការងារបុកគ្រឹះ និងផ្នែកខាងក្រោមដី ក៏គ្រោងនឹងបញ្ចប់ នៅឆមាសទី១ ឆ្នាំ២០២៣ ផងដែរ។ ដូច្នេះ ក្រុមការងារផ្នែកសំណង់អគារគោល នឹងអាចចាប់ផ្ដើមការងារបាន។

ក្រុមហ៊ុនបញ្ជាក់ទៀតថា ក្នុងអំឡុងការរីករាលដាលនៃជំងឺកូវីដ -១៩ នេះ ការសាងសង់ត្រូវបានរំខានបន្តិចបន្ដួច ពិសេសការយឺតយ៉ាវនៃការរផ្គត់ផ្គង់ស៊ីម៉ងត៍ បេតុង និងដែកជាដើម។

គួរបញ្ជាក់ថា ប្លង់មេដំណាក់កាលដំបូងនៃគម្រោងNaga 3 នេះ ត្រូវបានគូសឡើងដោយក្រុមហ៊ុនស្ថាបត្យកម្ម និងវិស្វកម្មអាមេរិក Skidmore, Owings & Merrill។

តាមផែនការ ៩៣% នៃគម្រោង Naga 3 នេះ នឹងផ្ដល់សេវាមិនមែនកាស៊ីណូ ដែលជាយុទ្ធសាស្ត្ររយៈពេលវែងរបស់ក្រុមហ៊ុន ក្នុងការផ្តល់ជូននូវផលិតផល និងសេវាកម្មរបៀបរស់នៅដ៏សំបូរបែប។

បើរួមបញ្ចូលNaga ទាំង៣ ក្រុមហ៊ុនយក្សមួយនេះ នឹងមានសណ្ឋាគារសរុប ៥ពាន់បន្ទប់ តុល្បែង ១ ៣០០ និងម៉ាស៊ីនល្បែងអេឡិចត្រូនិក ដល់ទៅ ៤៥០០។

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍