ថៃប្តេជ្ញានឹងបញ្ចប់ការសាងសង់ផ្លូវរថភ្លើងល្បឿនលឿនតម្លៃ ១២ពាន់លានដុល្លារ ត្រឹមឆ្នាំ២០២៨

9 ខែកក្កដា 2022
ព័ត៌មានសំណង់
6 មើល

ថៃប្តេជ្ញានឹងបញ្ចប់ការសាងសង់ផ្លូវរថភ្លើងល្បឿនលឿនភ្ជាប់ទៅនឹងខេត្តយូណានប្រទេសចិន ដែលបានពន្យារការសាងសង់អស់រយៈពេលជាយូរមកហើយនោះ ឱ្យរួចត្រឹមឆ្នាំ២០២៨។ នេះបើតាមការចុះផ្សាយរបស់សារពត៌មាន Bloomberg កាលពីថ្ងៃទី០៦ ខែកក្កដា ឆ្នាំ២០២២។

ចំពោះការសន្យានេះ ថៃនឹងសាងសង់ឱ្យចប់ដំណាក់កាលទី១ និងដាក់ឱ្យសាកល្បងក្នុងឆ្នាំ២០២៦ និងសម្ពោធប្រើប្រាស់ជាផ្លូវការក្នុងឆ្នាំបន្ទាប់។ គម្រោងដ៏ធំនេះត្រូវបានចំណាយថវិកាប្រមាណ ១២ពាន់លានដុល្លារអាមេរិក ។

ប្រភពដដែលនេះបានបន្តថា ក្នុងដំណាក់កាលទី១ មានប្រវែងសរុបប្រមាណ ៦០៩គីឡូម៉ែត ដែលភ្ជាប់ទៅភាគខាងជើងព្រំដែនខេត្តណងខៃ ហើយត្រូវសាងសង់ស្ពានមួយទៀតកាត់ទន្លេមេគង្គ ដើម្បីអាចភ្ជាប់ទៅនឹងខ្សែរថភ្លើងចិន-ឡាវបានថែមទៀតផថ។

គិតមកទល់ពេលបច្ចុប្បន្ននេះ ផ្លូវរថភ្លើងដំណាក់កាលទី១ សម្រេចការសាងសង់បាន ១២ភាគរយ ហើយ ដែលគម្រោងទាំងមូលត្រូវបានចែកការសាងសង់ជាពីរដំណាក់កាល _ទី១ សាងសង់ពីរាជធានីបាងកក ភ្ជាប់ទៅខេត្តណាខនរ៉ាត់ឆាសីម៉ា និង_ទី២ បន្តសាងសង់ភ្ជាប់ទៅភាគខាងជើងព្រំដែនឡាវ។

នៅក្នុងជំនួបរវាងនាយករដ្ឋមន្ត្រី លោកប្រាយុទ្ធ ចាន់អូចារ និងលោក វ៉ាង យ៉ី រដ្ឋមន្ត្រីការបរទេសចិន កាលពីថ្ងៃ០៥ ខែកក្កដា បានឱ្យដឹងថា ច្រករបៀងសេដ្ឋកិច្ចមួយនេះ បានភ្ជាប់ចិន ឡាវ និងថៃ ដែលនឹងជួយអភិវឌ្ឍ និងលើកកម្ពស់វិស័យភស្តុភាកម្ម ជំនួញ និងសេដ្ឋកិច្ច របស់ប្រទេសទាំងបីបានយ៉ាងល្អ។

ខ្សែរថភ្លើងថៃ និងឡាវមួយនេះ ត្រូវបានគេមើលថាជាការចាប់ផ្តើមដំបូងនៃហេដ្ឋារចនាសម្ព័ន្ធ ដែលនឹងភ្ជាប់ប្រទេសចិន ដែលជាប្រទេសមហាអំណាចសេដ្ឋកិច្ចទី២ក្នុងលោក ផ្ទាល់ជាមួយនឹងប្រទេសអាស៊ានដទៃទៀត រួមមាន ម៉ាឡេស៊ី និងសិង្ហបុរី។

គួរបញ្ជាក់ថា ប្រទេសឡាវ បានបើកដំណើរការផ្លូវរថភ្លើងរបស់ខ្លួនមានតម្លៃប្រមាណជិត ៦ពាន់លានដុល្លារអាមេរិក ដែលភ្ជាប់នឹងប្រទេសចិន កាលពីខែធ្នូ ឆ្នាំ២០២១។ (អានបន្ថែម)

រូបភាពពី CNN

- Video Advertisement -