ចិនគ្រោងសង់រោងចក្រផលិតកង់រថយន្តថ្មីមួយទៀត តម្លៃ ៣០០លានដុល្លារ នៅឆ្នាំ២០២៣

29 ខែកក្កដា 2022
Uncategorized
6 មើល

ក្រុមហ៊ុនវិនិយោគឯកជនចិន គ្រោងនឹងសាងសង់រោងចក្រផលិតកង់កៅស៊ូរថយន្តថ្មីមួយទៀត មានតម្លៃជាង ៣០០លានដុល្លារអាមេរិក នៅក្នុងឆមាសទី១ ឆ្នាំ២០២៣ នៅក្នុងតំបន់សេដ្ឋកិច្ចពិសេសក្រុងព្រះសីហនុ។ នេះបើតាមជំនួបរវាងឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ឈិន ចៀនកាង ប្រធានក្រុមប្រឹក្សាភិបាលក្រុមហ៊ុន SIHANOUKVILLE SPECIAL ECONOMY ZONE CO., LTD. កាលពីថ្ងៃទី២៨ ខែកក្កដា ឆ្នាំ២០២២។

ឯកឧត្តមបណ្ឌិត អ៊ិត សំហេង បានរំពឹងថា ការបង្កើតរោងចក្រផលិតកង់កៅស៊ូរថយន្តដ៏ធំមួយនេះ ពិតជាបានផ្តល់នូវផលប្រយោជន៍ច្រើនណាស់សម្រាប់ប្រជាកសិករខ្មែរដាំដំណាំកៅស៊ូ ដើម្បីផ្តល់ជូនដល់ក្រុមហ៊ុន ព្រមជាមួយកម្លាំងពលកម្មរាប់ពាន់នាក់បន្ថែមទៀត ដែលជាតម្រូវការសម្រាប់ផ្គត់ផ្គង់ចង្វាក់ផលិតកម្មបន្ថែមរបស់ក្រុមហ៊ុន។

គិតត្រឹមខែមករា ដល់ខែមិថុនា ឆ្នាំ២០២២ ទំហំទឹកប្រាក់នៃការនាំចេញ-នាំចូលរបស់សហគ្រាស នៅក្នុងតំបន់សេដ្ឋកិច្ចពិសេសក្រុងព្រះសីហនុសម្រេចបាន ១៣៧៤លានដុល្លារអាមេរិក បានកើនឡើង ៣៨,២៣% បើប្រៀបធៀបនឹងឆ្នាំមុន និងបានបង្កើនការងារបានជិត ៣០ ០០០កន្លែង។

គួរបញ្ជាក់ផងដែរថា គម្រោងសាងសង់នេះ ជាគម្រោងថ្មីមួយទៀត បន្ទាប់ពីរាជរដ្ឋាភិបាល បានអនុម័តរួចម្តងមកហើយកាលពីដើមឆ្នាំ២០២២ ឱ្យក្រុមហ៊ុន General Intelligence (Cambodia) Co., Ltd. វិនិយោគ ២៩៧លានដុល្លារអាមេរិក សាងសង់រោងចក្រផលិតសំបកកង់រថយន្តថ្មី នៅក្នុងតំបន់សេដ្ឋកិច្ចពិសេសក្រុងព្រះសីហនុនេះ។ (អានបន្ថែម)

- Video Advertisement -