អាជ្ញាធរបញ្ជាឱ្យបិទដេប៉ូខ្សាច់ ៤ទីតាំង នៅតាមបណ្តោយផ្លូវជាតិលេខ២

• 8 ខែ​សីហា 2022
• ព័ត៌មានអចលនទ្រព្យ
• 8 មើល

លោក ស៊ុយ សេរិទ្ធ អភិបាលរងនៃគណៈអភិបាលរាជធានីភ្នំពេញរួមជាមួយនឹងមន្ត្រីពាក់ព័ន្ធ​ បានចុះបិទដេប៉ូខ្សាច់​៤​ទីតាំង នៅផ្លូវជាតិលេខ២ សង្កាត់ចាក់អង្រែក្រោម និងចាក់អង្រែលើ ក្រោយពីមិនអនុវត្តតាម​ការណែនាំ​របស់​អាជ្ញា​ធរ​រាជ​រាជធានីភ្នំពេញ។ នេះបើតាមវិទ្យុជាតិកម្ពុជា កាលពីថ្ងៃទី០៨ ខែសីហា ឆ្នាំ២០២២។

លោកស៊ុយ សេរិទ្ធ បានឱ្យដឹងថា ការចុះបិទ ដេប៉ូខ្សាច់ចំនួន៤ទី​តាំងខាងលើនេះ ធ្វើឡើង​ទៅតាមបទ​បញ្ជារបស់​ឯកឧត្តម ឃួង ស្រេង អភិបាលនៃគណៈអភិបាល ដោយសារទីតាំងខាងលើ​មិនអនុវត្តតាម​ការណែនាំ​របស់​រដ្ឋបាល​រាជធានីភ្នំ​ពេញជាច្រើនលើកច្រើនសារួចមកហើយ។

លោកបន្តថា ដេប៉ូអាជីវកម្មទាំងនេះ បានធ្វើឱ្យដីខ្សាច់ហូរហៀរលើទ្រូងផ្លូវ ពិបាកការធ្វើដំណើរ បង្កឱ្យមានគ្រោះ​ថ្នាក់ចរាចរណ៍ និង​បណ្តាល​ឱ្យខូចខាតហេដ្ឋារចនាសម្ព័ន្ធមួយចំនួនថែមទៀត ដូចជាខូចខាតផ្លូវ ប្រព័ន្ធលូជាដើម។

លោកអភិបាលរង បានបន្ថែមថាអាជីវកម្មទាំង៤ទីតាំងខាងលើនេះ គឺត្រូវបិទទាំងស្រុងតែម្តង ដោយ​មិនទុកឱ្យ​​ដេប៉ូ​ខ្សាច់​​​ទាំងនេះ បំផ្លាញហេដ្ឋារចនាសម្ព័ន្ធទៀតទេ ហើយម្ចាស់ដេប៉ូខ្សាច់ទាំងនេះ​ ត្រូវតែកើបដីខ្សាច់ចេញពីថ្នល់ ​និងធ្វើ​ការ​ជួស​​​ជុលឡើងវិញនូវ​លូ កំណាត់ផ្លូវជាតិ​លេខ​២ ផ្លូវ ៦០ម៉ែត្រ និងផ្លូវ ៣០ម៉ែត្រ ដែលខូច​បានបង្ក​ការ​ខូចខាត។

គួរបញ្ចាក់ថា នៅតាមបណ្តោយផ្លូវជាតិលេខ ២នេះ មានទីតាំង ដេប៉ូខ្សាច់ចំនួន៦ ដែលកំពុងធ្វើអាជីវកម្ម ខណៈ ចំនួន៤ ទីតាំងត្រូវបានបិទ។

• ច្បាប់ និងបញ្ញាត្តិ
• ច្បាប់ និងបញ្ញាត្តិ