៥ឆ្នាំចុងក្រោយនេះ រដ្ឋសម្រេចការចុះបញ្ជីដីបានជាង ១,៦ លានក្បាលដី

• 24 ខែ​សីហា 2022
• ព័ត៌មានអចលនទ្រព្យ
• 9 មើល

ចាប់ពីឆ្នាំ២០១៨ ដល់ពាក់កណ្តាលឆ្នាំ២០២២ នេះ ការចុះបញ្ជីដំបូងសម្រេចបានចំនួន ១ ៦៩១ ៤៨៩ ក្បាលដី ស្មើនឹង ២៤,១៦%។ នេះបើតាមការលើកឡើងរបស់ ឯកឧត្តម ថេង ច័ន្ទសង្វារ នៅក្នុងសន្និសីទសារព័ត៌មានស្តីពី «សមិទ្ធផល​សម្រេចបានរយៈពេល៥ឆ្នាំ របស់ក្រសួងរៀបចំដែនដី នគរូបនីយកម្ម និងសំណង់» នាថ្ងៃទី២៤ ខែសីហា ឆ្នាំ២០២២។

ក្នុងរយៈពេល ៥ឆ្នាំនេះ ការចុះបញ្ជីក្បាលដីលក្ខណៈជាប្រព័ន្ធ ក្រសួងរៀបចំដែនដី នគរូបនីយកម្ម និងសំណង់ សម្រេចបានចំនួន ១​ ៦៧៩ ៥៥៨ ក្បាលដី និងចុះបញ្ជីលក្ខណៈដាច់ដោយដុំបានចំនួន ១១០ ៧៣១ ក្បាលដី។

មួយវិញទៀត ក្នុងឆមាសទី១ ឆ្នាំ២០២២ នេះ ក្រសួងបានចុះបញ្ជីក្បាលដីបានចំនួន ១៦៩ ២៦៧ ក្បាលដី។

ដោយឡែក បើគិតចាប់ពីពេលអនុវត្តរហូត មកដល់ពេលនេះវិញ ក្រសួងដែនដី បានចុះបញ្ជី និងការចេញប័ណ្ណ​សម្គាល់​កម្មសិទ្ធិ​ជូនប្រជាពលរដ្ឋ សរុបបានចំនួន ៦ ៥៨៤ ៧៧៨ ប័ណ្ណ ស្មើនឹង៩៤,០៦% នៃក្បាលដីប៉ាន់​ស្មាន​សរុប​ប្រមាណ ៧លានក្បាលដី។ ក្នុងនោះការចុះបញ្ជីលក្ខណៈជាប្រព័ន្ធបានចំនួន ៥ ៩៥៩ ៥៨២ ក្បាលដី និងចុះបញ្ជីដាច់ដោយដុំបានចំនួន ៦២៤ ៩៩៦ ប័ណ្ណ។

ជាមួយគ្នានេះផងដែរ ក្រសួងបានចុះបញ្ជីដីរដ្ឋបានចំនួន ២១២១ ប័ណ្ណ និងចុះបញ្ជីដីសហគមន៍ជនជាតិដើមភាគតិច​បានចំនួន ៣៧ សហគមន៍ ស្មើនឹង ៩៤៧ ប័ណ្ណ។

ចំពោះការចុះបញ្ជីទ្រព្យសម្បត្តិប្តីប្រពន្ធវិញ ការចុះបញ្ជីដីជាទ្រព្យខាងប្តីបានចំនួន ៩% ទ្រព្យខាងប្រពន្ធមានចំនួន ១៩% ទ្រព្យលីវ មានចំនួន ៩% ទ្រព្យរួមប្តីប្រពន្ធមានចំនួន ៦០% និងទ្រព្យផ្សេងៗទៀតមានចំនួន ៣%។

• ច្បាប់ និងបញ្ញាត្តិ
• ចំណេះដឹង និង បទពិសោធន៍
• ច្បាប់ និងបញ្ញាត្តិ
• ចំណេះដឹង និង បទពិសោធន៍