ជប៉ុន ស្នើឱ្យកម្ពុជាបន្តគាំទ្រក្រុមហ៊ុនរបស់ជប៉ុនប្រតិបត្តិការធុរកិច្ចនៅកម្ពុជា

28 ខែកញ្ញា 2022
Uncategorized
8 មើល

នាយករដ្ឋមន្រ្តីជប៉ុន ឯកឧត្តម គីស៊ីដា ហ្វូមីអូ បានស្នើកម្ពុជា ក្នុងការគាំទ្រក្រុមហ៊ុនរបស់ជប៉ុនប្រតិបត្តិការធុរកិច្ចនៅកម្ពុជា។ ការស្នើគាំទ្រនេះ បន្ទាប់ពីមានក្រុមហ៊ុនវិនិយោគជាច្រើនរបស់ជប៉ុនវិនិយោគនៅកម្ពុជា មានទុនវិនិយោគសរុប ជិត ៣០០០លានដុល្លារ។

ឯកឧត្តម គីស៊ីដា ហ្វូមីអូ លើកឡើងបែបនេះ ក្នុងជំនួបជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី២៨ ខែកញ្ញា ក្នុងទីក្រុងតូក្យូ ប្រទេសជប៉ុន។ នេះបើយោងតាម ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បញ្ជាក់ក្រោយជំនួបពិភាក្សាការងារ។

នាយករដ្ឋមន្រ្តីជប៉ុន មានប្រសាសន៍ថា ជប៉ុននឹងបង្កើតរោងចក្រក្រុមហ៊ុន Toyota នៅប្រទេសកម្ពុជានាពេលឆាប់ៗខាងមុខនេះ។

សូមជម្រាបថា ក្រុមហ៊ុន Toyota បានសម្រេចចិត្តវិនិយោគបង្កើតរោងចក្រផ្គុំ និងដំឡើងរថយន្តតូយ៉ូតានៅកម្ពុជា ក្នុងទុនវិនិយោគចំនួនជាង ៣៦លានដុល្លារអាមេរិក ដើម្បីបំពេញតម្រូវការរថយន្តនៅកម្ពុជា។ (អានបន្ថែម)

គម្រោងវិនិយោគនេះ ដែលមានឈ្មោះថា Toyota Tsusho Manufacturing (Cambodia) Co Ltd ត្រូវបានប្រកាសដោយក្រុមប្រឹក្សាអភិវឌ្ឍន៍កម្ពុជានៅថ្ងៃទី៨ ខែកញ្ញា ឆ្នាំ២០២២។

សូមជម្រាបថា គិតត្រឹមខែសីហា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគជប៉ុន ចំនួន១៤៩គម្រោង ក្នុងទុនវិនិយោគសរុបប្រមាណ ២.៩ ពាន់លានដុល្លារ ដោយវិនិយោគលើវិស័យដូចជា កសិកម្ម ឧស្សាហកម្ម ធនាគារ សេវាកម្ម សំណង់ អចលនទ្រព្យ ផ្សារទំនើប និងផ្សេងៗទៀត៕ (អានបន្ថែម)

- Video Advertisement -