គម្រោងលំនៅដ្ឋានតម្លៃ ១០០ លានដុល្លារ លើផ្ទៃដី ៦៦ ហិកតា កំពុងបង្ហាញខ្លួនលើទឹកដីព្រះសីហនុ

• 22 ខែ​កុម្ភៈ 2021
• ព័ត៌មានក្នុងស្រុក
• 6 មើល

គម្រោងអភិវឌ្ឍន៍លំនៅដ្ឋាន លន ស៊ីធី ឡូតធឺសស៊ីថោន តម្លៃ ១០០ លានដុល្លារ ដែលនឹងត្រូវសាងសង់លើផ្ទៃដី ៦៦ ហិកតា នៅខេត្តព្រះសីហនុ បានបើកសម្ពោធលក់ជាផ្លូវការហើយ កាលពីថ្ងៃទី ២២ កុម្ភៈ នេះ។

ពិធីបើកសម្ពោធ ត្រូវបានធ្វើឡើងក្រោមអធិបតីភាពរបស់ ឯកឧត្តម គួច ចំរើន អភិបាលខេត្តព្រះសីហនុ និង ឯកឧត្តមអ្នកឧកញ៉ា លី យ៉ុងផាត់ សមាជិកព្រឹទ្ធសភា ក៏ដូចជាមន្ត្រីពាក់ព័ន្ធដទៃទៀតផងដែរ។

គម្រោងនេះ មានទីតាំងស្ថិតក្នុងឃុំបិតត្រាង ស្រុកព្រៃនប់ ខេត្តព្រះសីហនុ ដែលនឹងសាងសង់ជាលំនៅដ្ឋាន ផ្ទះល្វែង បុរី វីឡា និងហេដ្ឋារចនាសម្ព័ន្ធផ្សេងៗទៀតរួមមាន សាលារៀន សួនច្បារ ស្ថានីយ៍ប្រេងឥន្ទនៈ អាហារដ្ឋាន និងកន្លែងហាត់ប្រាណជាដើម។

ឯកឧត្តមគួច ចំរើន អភិបាលខេត្តព្រះសីហនុ បានឱ្យដឹងក្នុងពិធីសម្ពោធនេះថា បើទោះបីជាមានវិបត្តិកូវីដ-១៩ក្តី ប៉ុន្តែចំពោះការវិនិយោគលើវិស័យអចលនទ្រព្យ និងសំណង់នៅប្រទេសកម្ពុជា ក៏ដូចជាក្នុងខេត្តព្រះសីហនុ នៅតែមានសកម្មភាពជាបន្តបន្ទាប់។

ឯកឧត្តមបានបន្តថា ខេត្តព្រះសីហនុ គឺជាខេត្តតំបន់ឆ្នេរមួយ ដែលមានការអភិវឌ្ឍន៍លើគ្រប់វិស័យ ទាំងហេដ្ឋារចនាសម្ព័ន្ធផ្លូវថ្នល់ និងវិស័យទេសចរណ៍។

គួរបញ្ជាក់ផងដែរ មានគម្រោងស្ដារហេដ្ឋារចនាសម្ព័ន្ធជាច្រើនបាន និងកំពុងអភិវឌ្ឍនៅក្នុងខេត្តមួយនេះ តួយ៉ាងដូចជាគម្រោងផ្លូវ៣៤ ខ្សែដែលនឹងបើកសម្ពោធនៅខែមេសានេះ គម្រោងស្ថាបនាផ្លូវ ១១ ខ្សែដែលសម្រេចបាន ៣១% ហើយ គម្រោងព្រលានយន្តហោះ គម្រោងកំពង់ផែ និងគម្រោងជាច្រើនទៀត។ (អានបន្ថែម)

• Investment and Funding
• Projects Development