ត្រីមាសទី១ ២០២៣ មានក្រុមហ៊ុន៩ មានទុនជាង ១,៨ពាន់លានដុល្លារ ចុះបញ្ជីនៅផ្សារមូលបត្រកម្ពុជា

• 2 ខែ​មិថុនា 2023
• Uncategorized @km
• 8 មើល

គិតត្រឹមចុងត្រីមាសទី១ ឆ្នាំ២០២៣ ក្នុងទីផ្សារមូលបត្រកម្មសិទ្ធិមានក្រុមហ៊ុនចំនួន៩ មានទុនសរុប ៧,៦១ទ្រីលានរៀល ស្មើនឹង ១,៨៨ ប៊ីលានដុល្លារអាមេរិក បានចុះបញ្ជីនៅផ្សារមូលបត្រកម្ពុជា។ នេះបើព្រឹត្តិបត្រទិន្នន័យជួញដូរមូលបត្រ ប្រចាំត្រីមាសទី១​ ឆ្នាំ២០២៣។

ទន្ទឹមនឹងនេះផងដែរ ត្រឹមចុងត្រីមាសទី១ នេះ ទំហំជួញដូរក្នុងទីផ្សារមូលបត្រកម្មសិទ្ធសរុបចំនួន ៥,៤៧ លានភាគហ៊ុន មានការថយចុះ ៧,៥​៨​% និងមានតម្លៃជួញដូរសរុប មានប្រហែល ៤៩, ៩៩២, ៨១ លានរៀល (ប្រហែល ១២,៣៣ លានដុល្លារ) បានថយចុះ ៣,៣១% ធៀបនឹងត្រីមាសទី៤ ឆ្នាំ២០២២។

ក្នុងនោះ ទំហំជួញដូរនៅក្នុងទីផ្សារគោលមានប្រហែល ៩០, ៤៥% និងទីផ្សារកំណើនមានចំនួនប្រហែល ៩,៥៥% នៃទំហំជួញដូរសរុប។

គួរបញ្ជាក់ថា ថ្មីៗនេះ ផ្សារមូលបត្រកម្ពុជា (ផមក) បានសម្រេចឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្រកម្មសិទ្ធិលើទីផ្សារគោលរបស់ក្រុមហ៊ុន ម៉េងលី ជេ. គួច អេឌ្យូខេសិន ម.ក និងក្រុមហ៊ុន ខេម ជ្ជីអេសអេម ម.ក។

ដោយឡែក ទីផ្សារមូលបត្របំណុល ក៏មានក្រុមហ៊ុនចំនួន ៩ បានបោះផ្សាយលក់មូលបត្របំណុលផងដែរ ប៉ុន្តែពុំមានការដាក់បញ្ជាទិញ-លក់ និងការជួញដូរទៅលើសញ្ញាបណ្ណសាជីវកម្មណាមួយទេ។

បើទោះបីជាយ៉ាងនេះក៏ដោយ កាលពីថ្ងៃទី១៩ ខែមករា ឆ្នាំ២០២៣ មានក្រុមហ៊ុនមួយថ្មីទៀតបានចុះបញ្ជីនៅទីផ្សារមូលបត្របំណុលគឺក្រុមហ៊ុន ហ្គោលដេន ទ្រី ដែលមាននិមិត្តសញ្ញាសម្គាល់ “GT27 ” និងជាក្រុមហ៊ុនបោះផ្សាយសញ្ញាបៃតងដំបូងគេនៅក្នុងប្រទេសកម្ពុជា។

គួររម្លឹកដែរថា ក្នុងឆ្នាំ២០២២ ផ្សារមូលបត្រកម្ពុជា (ផមក) ប្រមូលមូលធនសរុបបានជាង ២២២ពាន់លានរៀល ស្មើនឹងជាង ៥៤លា​ន​ដុល្លារ កើនឡើង ១៣៣% ធៀបនឹងឆ្នាំ២០២១។ (អានបន្ថែម)

• Investment and Funding
• Business and Market
• Economy and Finance