ADB ផ្តល់កម្ចីដល់ CP ១០លានដុល្លារ ដើម្បីជំរុញវិស័យសហគ្រាសធុនតូច​ និងមធ្យម

• 14 ខែ​កុម្ភៈ 2023
• Uncategorized @km
• 6 មើល

ធនាគារអភិវឌ្ឍអាស៊ី (ADB) បានសម្រេចផ្តល់កម្ចីចំនួន ១០លានដុល្លារអាមេរិក ដល់ធនាគារប្រៃសណីយ៍កម្ពុជា (CP) ដើម្បីជួយជំរុញដល់វិស័យសហគ្រាសធុនធុនតូច និងមធ្យម (MSMEs) ឱ្យបានប្រសើរឡើង ក្រោយវិបត្តិកូវីដ ១៩ ដែលក្នុងនោះ ៥០% នឹងត្រូវផ្តល់ទៅសហគ្រិនជាស្រ្តី។

បើតាមសេចក្តីប្រកាសពត៌មានកាលពីថ្ងៃទី៧ ខែកុម្ភៈ វិស័យ MSMEs មានចំនួន ៩៩,៨% នៃសហគ្រាសសរុបនៅក្នុងប្រទេសកម្ពុជា ហើយអាចផ្តល់ការងារបានរហូតដល់ ៧២% នៃកម្លាំងពលកម្មសរុប។

គួរបញ្ជាក់ថា សហគ្រាសធុនតូច និងមធ្យមនៅកម្ពុជា មានលទ្ធភាពទទួលបានហិរញ្ញប្បទានច្រើនបំផុត 20% នៃសហគ្រាសដែលមិនបានចុះបញ្ជី ហើយភាគច្រើនពួកគេជាសហគ្រិនស្ត្រី ប៉ុន្តែសហគ្រិនស្ត្រីទាំងនោះអាចទទួលបានឥណនទានយ៉ាងច្រើន 5% ប៉ុណ្ណោះ នៃឥណទានផ្លូវការ។

លោក Ashok Lavasa ជាអនុប្រធានធនាគារ ADB ខាងផ្នែកប្រតិបត្តិការវិស័យ​ឯកជន និងភាពជាដៃគូរវាងរដ្ឋ និង​ឯកជន បានឱ្យដឹងថា ហិរញ្ញប្បទាននេះ នឹងជួយបង្កើនប្រាក់ចំណូល តាមរយៈធ្វើឱ្យប្រសើរឡើងនូវការប្រកួតប្រជែង និងបង្កើនបណ្តាញផលិតកម្មក្នុង និងក្រៅប្រទេស។

មិនតែប៉ុណ្ណោះ ហិរញ្ញប្បទាននេះ មិនត្រឹមតែជួយគាំទ្រការរីកចម្រើននៃវិស័យ MSMEs នៅកម្ពុជាប៉ុណ្ណោះទេ តែថែមទាំងជួយបង្កើនការងារ និងពង្រីកការងើបឡើងវិញនៃសេដ្ឋកិច្ចឱ្យធំទូលាយជាងមុន។

លោក ទូច​ ចៅចេក នាយកប្រតិបត្តិធនាគារ CP បានឱ្យដឹងដែរថា ហិរញ្ញប្បទានរបស់​ ADB នឹងជួយផ្តល់នូវផលិតផល និងសេវាកម្មហិរញ្ញប្បទានបន្ថែមទៀត ដល់អាជីវកម្មក្នុងវិស័យនេះ ខណៈដែលកំពុងគាំទ្រផ្នែកទុន និងតម្រូវការវិនិយោគរបស់ពួកគេ។

គួរបញ្ជាក់ថា តាំងពីឆ្នាំ១៩៩២ មក ធនាគារ ADB បានផ្តល់កម្ចីជាង ៤.៧ ពាន់លានដុល្លារដល់រាជរដ្ឋាភិបាលកម្ពុជា និងក្រៅរដ្ឋាភិបាលកម្ពុជា រួមទាំងផ្តល់នូវការធានា និងជំនួយបច្ចេកទេស សម្រាប់វិស័យកសិកម្ម ធារាសាស្ត្រ ហិរញ្ញវត្ថុ ការដឹកជញ្ជូន ថាមពល ការផ្គត់ផ្គង់ទឹកស្អាត និងអនាម័យ។

• Investment and Funding
• Economy and Finance