កីឡដ្ឋានខេត្តកំពង់ស្ពឺ បើកសម្ពោធជាផ្លូវការ ត្រៀមធ្វើម្ចាស់ផ្ទះកីឡា SEAGAME ២០២៣
កីឡដ្ឋានខេត្តកំពង់ស្ពឺ ត្រូវសម្ពោធដាក់ឱ្យប្រើប្រាស់ជាផ្លូវការហើយ នៅថ្ងៃទី ៦ ខែកញ្ញា ឆ្នាំ ២០២២នេះ ក្រោមអធិបតីភាព ឧបនាយករដ្ឋមន្ត្រី និងរដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ឯកឧត្តមជា សុផារ៉ា។ មានទីតាំងស្ថិតនៅក្នុងភូមិតាម៉ុល សង្កាត់ច្បារមន ក្រុងច្បារមន កីឡដ្ឋានខេត្តកំពង់ស្ពឺ លាតសន្ធឹលើផ្ទៃដីជាង ៤ហិកតា ហើយជាកីឡដ្ឋានស្ដង់ដាមួយ។ ឯកឧត្តមជា សុផារ៉ា បានឱ្យដឹងថា កីឡដ្ឋានេះគឺជាក្តីសង្ឃឹមថ្មីមួយទៀតនៃវិស័យកីឡារបស់ខេត្តកំពង់ស្ពឺ ជាពិសេសជាការត្រៀមខ្លួនរបស់កម្ពុជាក្នុងការធ្វើជាម្ចាស់ផ្ទះកីឡាអាស៊ីអាគ្នេយ៍ SEAGAME ឆ្នាំ២០២៣។ គួរបញ្ជាក់ថា កីឡដ្ឋានខេត្តនេះ ត្រូវបានបើកការដ្ឋានសាងសង់ជាផ្លូវការ កាលពីថ្ងៃទី ២១ ខែកុម្ភៈ ឆ្នាំ ២០២១ ក្រោមគំនិតផ្ដួចផ្ដើមរបស់ឯកឧត្តម ហ៊ុន ម៉ានី តំណាងរាស្រ្ដមណ្ឌលកំពង់ស្ពឺ៊ និងក្រោមជំនួយឧបត្ថម្ភជាង ២លានដុល្លារ របស់មូលនិធិណាហ្គាវើល។ កីឡដ្ឋានខេត្តកំពង់ស្ពឺ នឹងក្លាយជាទីលានគោលរបស់ក្រុមបាល់ទាត់ NagaWorld FC ដែលក្រុមបាល់ទាត់នេះ នឹងយកទីតាំងកីឡដ្ឋាននេះ សម្រាប់ការហ្វឹកហាត់ និងជាទីតាំងម្ចាស់ផ្ទះ ទទួលការប្រកួតជាមួយក្រុមបាល់ទាត់នានា ទាំងក្នុងប្រទេស និងក្រុមបាល់ទាត់អន្ដរជាតិ។
អានបន្ថែម
អាជ្ញាធរខេត្តកំពតគ្រោងបង្កើតមណីយដ្ឋានឆ្នេរ និងសួនកម្សាន្តដ៏ប្រណីត
អាជ្ញាធរខេត្តកំពត គ្រោងនឹងស្ថាបនារមណីយដ្ឋានឆ្នេរសមុទ្រ និងសួនកម្សាន្តដ៏ប្រណីតជាច្រើនកន្លែង ដើម្បីទាក់ទាញភ្ញៀវទេសចរបន្ថែមទៀត ខណៈដែលខេត្តមួយនេះ មិនទាន់មានឆ្នេរសម្រាប់បម្រើដល់ការកម្សាន្ត របស់ភ្ញៀវទេសចរនៅឡើយ។ នេះបើតាមការលើកឡើងរបស់ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត នៅថ្ងៃទី៥ ខែកញ្ញា ឆ្នាំ២០២២។ ឯកឧត្តម ម៉ៅ ធនិន បានលើកឡើងថា ខេត្តកំពត ជាខេត្តជាប់ឆ្នេរសមុទ្រ ដែលមានសក្តានុពល និងធនធានដ៏សម្បូរបែប ប៉ុន្តែខេត្តនេះ នៅមិនទាន់មានឆ្នេរសម្រាប់ឱ្យភ្ញៀវទេសចរកម្សាន្តនៅឡើយនោះទេ។ ឯកឧត្តមអភិបាល បានបន្តថា រដ្ឋបាលខេត្តបានរៀបចំផែនការស្ថាបនាជាឆ្នេរកម្សាន្តព្រែកកំពតមួយ ដែលមានប្រវែង ២គីឡូម៉ែត្រ ស្ថិតនៅតំបន់កោះស្មៅ។ ដោយឡែក ការស្ថាបនាសួនកម្សាន្តដ៏ប្រណីតមួយទៀត គឺនៅជាប់ព្រែកកំពតដែលឋិតនៅចន្លោះស្ពានឥន្ទធនូ និងស្ពានថ្មីក្នុងក្រុងកំពត។ ឯកឧត្តមអភិបាល បានបញ្ជាក់ថា «គម្រោងស្ថាបនាឆ្នេរ នឹងសួនកម្សាន្តនេះ មិនទាន់ដឹងថា ត្រូវចំណាយថវិកាចំនួនប៉ុន្មាននៅឡើយទេ ហើយនឹងត្រូវបញ្ចប់ការសាងសង់នៅពេលណានោះដែរ ដោយរដ្ឋបាលខេត្តកំពុងសិក្សាពីការស្ថាបនានេះ ប៉ុន្តែសម្រាប់សួនកម្សាន្តវិញ គ្រោងបង្កើតឱ្យមានជា សួនច្បារលម្អ នៅលើវិថីរង្វង់មូលបាញ់ទឹក សួនច្បារស្វាគមន៍ សួនផ្ការំដួល ផែសម្រាប់អ្នកដំណើរ ចំណតយានយន្ត កន្លែងដាក់ភ្ញៀវទេសចរ និងស្ពានសម្រាប់ចំណតទូក ដែលមានរូបរាងជាសណ្ឋានដូចឥន្ទធនូ»។ បច្ចុប្បន្ននេះ ក្រុមការងារ […]
អានបន្ថែម
រដ្ឋចិនគ្រោងផ្ដល់កម្ចី ២៩ ប៊ីលានដុល្លារ ដើម្បីជួយបញ្ចប់គម្រោងអចលនទ្រព្យជាប់គាំង
រដ្ឋាភិបាលចិនគ្រោងនឹងផ្តល់ប្រាក់កម្ចីពិសេសចំនួនប្រមាណ ២៩ ០០០ លានដុល្លារ ដើម្បីជួយអ្នកអភិវឌ្ឍ ក្នុងការបញ្ចប់គម្រោងលំនៅដ្ឋានដែលជាប់គាំង។ នេះបើយោងតាម Caixin កាលពីថ្មីនេះ។ កម្ចីពិសេសនេះនឹងត្រូវចេញក្រោមកិច្ចសហប្រតិបត្តិការរបស់ក្រសួងលំនៅដ្ឋាន និងអភិវឌ្ឍន៍ទីក្រុង-ជនបទ ក្រសួងហិរញ្ញវត្ថុ និងធនាគារកណ្តាលរបស់ចិន។ ប្រាក់កម្ចីកញ្ចប់ដំបូងនឹងត្រូវបានផ្តល់ដោយធនាគារអភិវឌ្ឍន៍ចិន ធនាគារអភិវឌ្ឍន៍កសិកម្មនៃប្រទេសចិន និង ធនាគារនាំចេញ-នាំចូលនៃប្រទេសចិន។ កម្ចីជាង ២៩ ប៊ីលានដុុល្លារនេះ មិនមែនដើម្បីជំរុញទីផ្សារអចលនទ្រព្យ ឬជួយសង្រ្គោះអ្នកអភិវឌ្ឍន៍ទេ តែនឹងត្រូវផ្លល់ឱ្យសម្រាប់គម្រោងគម្រោងលំនៅដ្ឋានដែលត្រូវបានលក់ហើយ ប៉ុន្តែការដ្ឋានគាំង ដោយសារអ្នកអភិវឌ្ឍខ្វះសាច់ប្រាក់ប៉ុណ្ណោះ។ រដ្ឋាភិបាលក្នុងតំបន់ នឹងពិនិត្យមើលទ្រព្យសម្បត្តិ និងបំណុលរបស់អ្នកអភិវឌ្ឍន៍ ជាក់ស្ដែង មុនពេលផ្តល់ប្រាក់កម្ចី។ គម្រោងនេះកើតឡើងបន្ទាប់ពីអ្នកទិញផ្ទះជាច្រើន បានធ្វើបាតុកម្មបញ្ឈប់ការបង់ប្រាក់កម្ចីទៅធានាគារព្រោះ អ្នកអភិវឌ្ឍមិនអាចបញ្ចប់គម្រោងរបស់ខ្លួនបាន។ បញ្ហានេះកើតចេញពី ក្រុមហ៊ុនអចលនទ្រព្យយក្សចិនជាច្រើនដូចជា Evergrande Shimao និង Sunac បានធ្លាក់ក្នុងអន្ទាក់បំណុល ហើយខ្វះសមត្ថភាពក្នុងការបញ្ចប់ការដ្ឋានគម្រោងដែលបានលក់ដាច់រួចរាល់។ អ្នកវិភាគបរទេសថា ឬសគល់នៃបញ្ហានេះគឺបណ្ដាលមកពីកត្តាធំៗ ៣ដូចជា ទីផ្សារអចលនទ្រព្យដែលពុះកញ្ច្រោលខ្លាំងពេក កម្ចីក្នុងវិស័យអចលនទ្រព្យដែលកើនលើសលុបពិសេសនៅក្នុងក្រុមហ៊ុនធំៗ និងភាពធូររលុងនៃគោលនយោបាយព្រោះរដ្ឋចិនចង់បានចំណូលពីវិស័យនេះមកទ្រទ្រង់សេដ្ឋកិច្ចច្រើនជ្រុលពេក។ (អានបន្ថែម)
អានបន្ថែម
អនាគតនៃអគារជាប់គាំងនៅខេត្តព្រះសីហនុ៖ ទស្សនៈរបស់ចិន រដ្ឋាភិបាល និងម្ចាស់ដី
បន្ទាប់ពីរដ្ឋាភិបាលកម្ពុជាបានបិទការលេងល្បែងអនឡាញក្នុងក្រុងព្រះសីហនុ គួបផ្សំនឹងការមកដល់នៃជំងឺរាតត្បាតកូវីដ-១៩ ក្នុងឆ្នាំ ២០២០ សេដ្ឋកិច្ចក្រុងព្រះសីហនុបានធ្លាក់ចុះ ខណ:ពពុះទីផ្សារអចលនទ្រព្យក៏បានបែកធ្លាយ។ ជាលទ្ធផល គម្រោងសាងសង់សរុបចំនួន ១១៥៥ ត្រូវបានទុកចោលមិនបញ្ចប់ការដ្ឋាន ខណៈតម្លៃជួលអចលនទ្រព្យនៅក្នុងខេត្តនេះ ក៏បានធ្លាក់ចុះយ៉ាងខ្លាំងពីខ្ទង់ម៉ឺន មកត្រឹមខ្ទង់ពាន់ ឬដល់ខ្ទង់រយសម្រាប់ទីតាំងខ្លះ នេះបើយោងតាមតួលេខផ្លូវការ។ តើអនាគតនៃអគារគាំងស្ទះទាំងនេះនឹងទៅជាយ៉ាងណា? នេះជាផ្លូវដែលភាគីនិយោគិនចិន រដ្ឋាភិបាលកម្ពុជា និងម្ចាស់ដីត្រូវដើររួមគ្នាដើម្បីរកច្រកចេញ។ ទស្សនៈរបស់វិនិយោគិនចិន Nikkei Asia បានសម្ភាសអ្នកវិនិយោគចិនជាច្រើននាក់ ដោយសួរពីទស្សនវិស័យ និងផែនការអនាគតរបស់ពួកគេចំពោះគម្រោងដែលជាប់គាំងទាំងនោះ។ វិនិយោគិនភាគច្រើនបង្ហាញចំណាប់អារម្មណ៍ក្នុងការត្រឡប់មកវិញ ប៉ុន្តែមានឧបសគ្គច្រើនយ៉ាងទាំងផ្នែកសង្គម និងសេដ្ឋកិច្ច ដែលជាការរារាំងពួកគេ។ កត្តាសំខាន់បំផុតមួយដែលធ្វើឱ្យវិនិយោគិនចិនពិបាកក្នុងបន្តគម្រោងដែលជាប់គាំង គឺការខ្វះខាតការគាំទ្រ និងជ្រោមជ្រែងពីរដ្ឋាភិបាលកម្ពុជា។ ជាក់ស្ដែង កាលពីដើមខែកក្កដា ម្ចាស់គម្រោងចិនមួយក្រុមបានជួបពិភាក្សាជាមួយមន្ត្រីរដ្ឋបាលខេត្តព្រះសីហនុជុំវិញបញ្ហានេះ ប៉ុន្តែនៅមិនទាន់ទទួលបានផ្លែផ្កាអ្វីទាំងអស់។ ដើម្បីត្រលប់មកវិញ ពួកគេបានស្នើសុំរដ្ឋាភិបាលឱ្យជួយកាត់បន្ថយពន្ធពាក់ព័ន្ធនឹងគម្រោងរបស់ខ្លួន និងជួយបង្កើតសន្ទស្សន៍តម្លៃដីដែលច្បាស់លាស់ ដើម្បីទប់ស្កាត់បញ្ហាម្ចាស់ដីក្នុងស្រុកបំប៉ោងតម្លៃ។ សំណើសំខាន់បំផុតដែលវិនិយោគិនទាមទារគឺ ការសម្របសម្រួលពីដ្ឋាភិបាលក្នុងការដោះស្រាយវិវាទដីធ្លីរវាងពួកគេ និងម្ចាស់ដីក្នុងស្រុក។ វិនិយោគិនចិនមួយចំនួនបានរាយការណ៍ថាម្ចាស់ដីបានរឹបអូសអគាររបស់ពួកគេជាថ្នូរនឹងតម្លៃជួល ដែលវិនិយោគិនយល់ថាថ្លៃខ្លាំងពេក។ អ្នកអភិវឌ្ឍន៍ចិនឈ្មោះ Qiu បានប្រាប់ Nikkei ថាគាត់បានវិនិយោគលើសណ្ឋាគារតម្លៃ ៣ លានដុល្លារនៅក្រុងព្រះសីហនុក្នុងឆ្នាំ ២០១៧ ។ ការសាងសង់ត្រូវបានបញ្ចប់នៅឆ្នាំ […]
អានបន្ថែម
រដ្ឋចិនបើកភ្លើងខៀវលើគម្រោងបង្កើតTaxi ស្វ័យប្រវត្តគ្មានអ្នកបើក លើកដំបូង
រដ្ឋាភិបាលចិនបានផ្តល់ការអនុញ្ញាតឱ្យក្រុមហ៊ុនបច្ចេកវិទ្យាយក្សឈ្មោះ Baidu ឱ្យអភិវឌ្ឍ និងដំណើរការសេវាកម្ម ឡានTaxi ស្វ័យប្រវត្តិដែលគ្មានអ្នកបើកបរពេញលេញ ជាលើកដំបូង។ យោងតាមសារព័ត៌មាន GCR សេវាកម្មនេះមានឈ្មោះថា “Apollo Go” ដែលបច្ចុប្បន្នត្រូវបានអនុញ្ញាតឱ្យដំណើរការនៅក្នុងទីក្រុង Chongqing និង Wuhan ជាមួយនឹងរថយន្ត Apollo ចំនួន ៥ គ្រឿងដែលកំពុងដំណើរការនៅក្នុងទីក្រុងនីមួយៗ ក្នុងជំហានដំបូង។ ទីក្រុងទាំងពីរក៏បានបំពាក់ប្រព័ន្ធ 5G “Vehicle to Everything” ដែលភ្ជាប់យានជំនិះស្វ័យប្រវត្តិ (AVs) ទៅកាន់អ៊ីនធឺណិត។ ការអនុញ្ញាតឱ្យរថយន្តគ្មានអ្នកបើកនេះ ដំណើរលើផ្លូវ គឺធ្វើឡើងបន្ទាប់ពីរថយន្តបានឆ្លងកាត់ការធ្វើតេស្តជាមួយប្រតិបត្តិករសុវត្ថិភាពជាច្រើនសា។ Taxi គ្មានអ្នកបើកនេះ ក៏មានវិធានការសុវត្ថិភាពផ្សេងទៀតផងដែរ ដូចជាការបញ្ជាពីចម្ងាយក្នុងករណីមានបញ្ហា ដោយឆ្លងកាត់ការប្រមូលទិន្នន័យពីយានយន្តជាង ៣២ លានគ្រឿង។
អានបន្ថែម
អូស្ដ្រាលីច្នៃប្រឌិតឥដ្ឋពិសេសធ្វើពីប្រេងឆា ស្អិតជាប់គ្នាស្វ័យប្រវត្តិ មិនបាច់ប្រើស៊ីម៉ង់ត៍
អ្នកស្រាវជ្រាវនៅសាកលវិទ្យាល័យ Flinders នៃទីក្រុង Adelaide បានបង្កើតឥដ្ឋចេញពីសំណល់ប្រេងឆា ប៉ុន្តែមានសមត្ថភាពពិសេសពោលគឺស្អិតជាប់គ្នាស្វ័យប្រវត្តិ ដោយមិនចាំបាច់ប្រើស៊ីម៉ង់ត៍បាយអ។ យោងតាម GCR ឥដ្ឋនេះ គឺជា polymer ទម្ងន់ស្រាល ប៉ុន្តែជាប់ធន់។ ឥដ្ឋនេះស្អិតជាប់គ្នា ដោយធាតុស្ពាន់ធ័រ និងកាតាលីករគីមីផ្សេង។ ភាពស្អិតដែលកើតចេញពីប្រតិកម្មគីមីនេះ គឺអាចប្រៀបធៀបទៅនឹងកាវវិទ្យាសាស្ដ្រដូច្នោះដែរ។ សាស្ត្រាចារ្យគីមីវិទ្យា Justin Chalker ដែលជាអ្នកដឹកនាំការស្រាវជ្រាវ បានឱ្យដឹងថា ពេលនេះក្រុមការងារកំពុងធ្វើតេស្តឥដ្ឋទាំងនោះដើម្បីកំណត់លក្ខណៈសម្បត្តិរបស់វា និងកំពុងស្វែងរកវិធីធ្វើឱ្យឥដ្ឋនេះអាចប្រើជាក់ស្ដែងក្នុងវិស័យសំណង់បាន។ គម្រោងនេះក៏ស្ថិតក្រោមកិច្ចសហប្រតិបត្តិការជាមួយអ្នកឯកទេសផ្នែកសំណងរបស់សិង្ហបុរី Clean Earth Technologies ផងដែរ។
អានបន្ថែម
អ្នកស្រាវជ្រាវសិង្ហបុរីបង្កើតថ្នាំលាបការពារសំណង់ផ្ទះឈើ ឱ្យភ្លើងដុតមិនឆេះ
អ្នកស្រាវជ្រាវនៅសាកលវិទ្យាល័យ Nanyang Technological University (NTU) ក្នុងប្រទេសសិង្ហបុរី (NTU Singapore) បានបង្កើតថ្នាំលាបការពារឈើ ពីការឆាប់ឆេះដោយអគ្គិភ័យ។ ថ្នាំការពារនេះមានកម្រាស់ត្រឹមតែ 0.075 មីលីម៉ែត្រប៉ុណ្ណោះ ហើយគ្មានពណ៌ និងមើលមិនឃើញដោយភ្នែកទទេរ ដូច្នេះឈើនៅតែរក្សាភាពស្អាតដូចដើមក្រោយលាបរួច។ នៅពេលថ្នាំនេះ ប៉ះនឹងភ្លើង ឬអគ្គិភ័យ ថ្នាំស្រទាប់ការនេះនឹងប្រែទៅជាធ្យូងក្រាស់ ដែលដើរតួជាអ៊ីសូឡង់ការពារមិនឱ្យភ្លើងចេះដល់សាច់ឈើ។ ថ្នាំការពារ ក៏បានឆ្លងកាត់ការធ្វើតេស្តស្តង់ដារឧស្សាហកម្មជាមួយនឹងភ្លើងក្ដៅខ្លាំងបំផុតរួចមកហើយដែរ។ លោក Aravind Dasari សាស្ត្រាចារ្យនៃសាកលវិទ្យាល័យ NTU Singapore បាននិយាយថា សំណង់ឈើភាគច្រើន គឺងាយនឹងឆេះ ដែលជាហានិភ័យដ៏ធំបំផុតមួយសម្រាប់ហេដ្ឋារចនាសម្ព័ន្ធធ្វើពីឈើ។ ដូច្នេះការច្នៃប្រឌិតថ្នាំកូតការពារភ្លើង គឺជារបកគំហើញដ៏សំខាន់មួយ ក្នុងការជួយការពារការខូចខាតពីគ្រោះអគ្គិភ័យដែលមិនរំពឹងទុក។ គួរបញ្ជាក់ថា NTU កំពុងធ្វើការជាមួយក្រុមហ៊ុននានា ដើម្បីផ្តល់អាជ្ញាប័ណ្ណផលិតផល និងសាកល្បងប្រសិទ្ធភាពរបកគំហើញនេះបន្ដទៀត។
អានបន្ថែម
ជនបរទេសដែលស្នាក់នៅកម្ពុជាចាប់ពី២ឆ្នាំឡើងទៅអាចធ្វើបណ្ណទស្សនាអង្គរដោយឥតគិតថ្លៃ
ថ្មីៗនេះរដ្ឋាភិបាលកម្ពុជាអនុញ្ញាត ឱ្យជនបរទេស ឬវិនិយោគិនដែលកំពុងស្នាក់នៅកម្ពុជា អាចធ្វើការស្នើសុំបណ្ណចូលទស្សនារមណីយដ្ឋានអង្គរ និងប្រាសាទកោះកែររយៈពេលមួយឆ្នាំម្តង ដោយឥតគិតថ្លៃ។ នេះបើយោងតាមសេចក្តីជូនដំណឹងរបស់គ្រឹះស្ថានអង្គរ នៅថ្ងៃទី១ កញ្ញា ២០២២។ តាមប្រភពខាងលើបញ្ជាក់ថា ការចូលទស្សនាដោយឥតគិតថ្លៃនេះ គឺសំដៅដល់មន្រ្តីទូត, វិនិយោគិន, មន្រ្តីធ្វើការនៅអង្គការអន្តរជាតិ, ជនបរទេសធ្វើការនៅក្រុមហ៊ុន និងសហគ្រាសឯកជនគ្រប់ប្រភេទ, អ្នកជំនាញធ្វើការនៅតាមក្រសួង ស្ថាប័នរដ្ឋ និងឯកជន រួមទាំងក្រុមគ្រួសារ ដែលបានស្នាក់នៅជាមួយផងដែរ។ ដើម្បីធ្វើការស្នើសុំបណ្ណនេះបាន អ្នកស្នើសុំទាំងអស់ត្រូវបំពេញបែបបទតាមប្រព័ន្ធអនឡាញ (ឬ គេហទំព័ឬគ្រឹះស្ថានអង្គរ ឬ spass.angkorenterprise.gov.kh) ចាប់ពីថ្ងៃទី៩ កញ្ញា ២០២២។ ម្យ៉ាងទៀត ក៏អាចមកដាក់ពាក្យដោយផ្ទាល់នៅគ្រឹះស្ថានអង្គរ ដោយត្រូវភ្ជាប់មកជាមួយនូវលិខិតឆ្លងដែនច្បាប់ចម្លង និងទិដ្ឋាការស្នាក់នៅក្នុងប្រទេសកម្ពុជារយៈពេលចាប់ពី២ឆ្នាំឡើងទៅចំនួនមួយច្បាប់ និងរូបថត ៤x៦ មួយសន្លឹក។ រដ្ឋាភិបាលកម្ពុជាដាក់ចេញគោលការណ៍នេះឡើង គឺដើម្បីជំរុញទេសចរណ៍ផ្ទៃក្នុង ក៏ដូចជាផ្តល់ការលើកទឹកចិត្តដល់ជនបរទេសដែលស្នាក់នៅក្នុងប្រទេសកម្ពុជា ជាពិសេសគឺចង់ជំរុញវិស័យទេសចរណ៍ក្រោយវិបិត្តកូវិដ១៩ ឱ្យ ងើបឡើងវិញឱ្យបានយ៉ាឆាប់រហ័សផងដែរ។
អានបន្ថែម
ថៃប្រកាសសង់សួនសត្វដ៏ធំ១ តម្លៃជិត៣០០លានដុល្លារ លើដី៤៨ហិកតា
រដ្ឋាភិបាលថៃបានអនុម័តថវិកាចំនួនជិត ៣០០លានដុល្លារ សាងសង់សួនសត្វ មជ្ឈមណ្ឌលអប់រំ និងកន្លែងអភិរក្សនៅភាគខាងជើងនៃទីក្រុងបាងកក។ នេះបើយោងតាមការផ្សាយរបស់ GCR កាលពីចុងខែកក្កដា ២០២២ កន្លង។ អ្នកនាំពាក្យរងរដ្ឋាភិបាល Rachada Dhnadirek បានឱ្យដឹងទៀតថា សួនសត្វដ៏ធំមួយនេះនឹងត្រូវសាងសង់នៅលើផ្ទៃដី ៤៨ហិកតា ដែលបានបរិច្ចាគដោយស្តេចថៃ Maha Vajiralongkorn ក្នុងខេត្ត Pathum Thani។ ប្រភពដដែលបានបញ្ជាក់ថា គម្រោងដ៏ធំនេះនឹងត្រូវចំណាយអស់ប្រមាណជិត ៣០០លានដុល្លារ ហើយការសាងសង់ត្រូវបែងចែកជា២ដំណាក់កាល ដំណាក់កាលទី១ត្រូវបានគេប៉ាន់ស្មានថានឹងចំណាយអស់ប្រមាណជា ១៤៥លានដុល្លារ អនុម័តដោយគណៈរដ្ឋមន្ត្រីកាលពីខែមករា ហើយដំណាក់កាលទី២ នឹងចំណាយអស់ប្រមាណ ១១៧ លានដុល្លារ។ គម្រោងនេះនឹងត្រូវបើកដំណើរមួយផ្នែកនៅឆ្នាំ 2026 បន្ទាប់មកនឹងត្រូវបើកដំណើរការទាំងស្រុងនៅឆ្នាំ 2028។
អានបន្ថែម
រដ្ឋអនុម័តគម្រោង៥ តម្លៃជិត ៨៣លានដុល្លារ នៅខេត្តកណ្តាល កែប កំពង់ធំ និងរាជធានីភ្នំពេញ
ក្រុមប្រឹក្សាអភិវឌ្ឍន៍កម្ពុជា(CDC) បានសម្រេចចេញវិញ្ញាបនបត្រចុះបញ្ជីគម្រោងវិនិយោគដែលមានទុនសរុប ៨២,៧លានដុល្លារអាមេរិក ដើម្បីបង្កើតរោងចក្រចំនួន ៥កន្លែង នៅខេត្តកណ្តាល កែប កំពង់ធំ និងរាជធានីភ្នំពេញ។ ក្រុមហ៊ុនឯកជនទាំងនោះរួមមាន៖ ១-KITATSU SOLAR (CAMBODIA) CO., LTD គម្រោងបង្កើតរោងចក្រផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិត្រពាំងព្រៃភូមិ ឃុំទំនប់ធំ ស្រុកពញាឮ ខេត្តកណ្តាល ក្នុងទុនវិនិយោគប្រមាណ ២៣,៤លានដុល្លារអាមេរិក។ ២-KHEMUNIK HOSPITAL CO., LTD គម្រោងសាងសង់ និងអាជីវកម្មមន្ទីរពេទ្យចំនួន ១៥០គ្រែ ដែលមានទីតាំងវិនិយោគស្ថិតនៅផ្លូវជាតិលេខ ២១ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល ក្នុងទុនវិនិយោគប្រមាណ ២៣លានដុល្លារអាមេរិក។ ៣-SAMANEA CO., LTD គម្រោងវិនិយោគអភិវឌ្ឍន៍កោះស្វាយ កោះម្ទេស និងកោះកុក ដែលមានទីតាំងវិនិយោគស្ថិតនៅភូមិកែប សង្កាត់កែប ក្រុងកែប ខេត្តកែប ក្នុងទុនវិនិយោគប្រមាណ ១៨,២លានដុល្លារអាមេរិក។ ៤-LATE CHENG MINING DEVELOPMENT CO., […]
អានបន្ថែម
សម្តេច បញ្ជារដ្ឋមន្ត្រីបរិស្ថានឱ្យធ្វើការបែងចែកការប្រើប្រាស់ដី ឆ្នាំ២០២២ ជាបន្ទាន់
សម្តេចនាយករដ្ឋមន្រ្តី ហ៊ុន សែន បានបញ្ជាឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន ឱ្យសិក្សាអំពីការបែងចែកការប្រើប្រាស់ដីនៅកម្ពុជាក្នុងឆ្នាំ ២០២២ ជាបន្ទាន់ ថាតើវិវឌ្ឍន៍ដល់ណាហើយ។ សម្ដេចលើកឡើងដូច្នេះ កាលពីថ្ងៃទី៣១ ខែសីហា ឆ្នាំ២០២២ ក្នុងឱកាសបើកការដ្ឋានស្ពានអាកាសថ្មី២ ក្នុងទីក្រុងភ្នំពេញ។ សម្ដេចមានប្រសាសន៍ថា៖ «ចំនុចនេះសំខាន់ណាស់សម្រាប់យើងក្នុងការធ្វើគណនាអំពីចំនួនកើនឡើងនៃលំនៅឋាន ឬហេដ្ឋារចនាសម្ព័ន្ធដំណាំដាំដុះ…និយាយរួមការប្រើប្រាស់ដី»។ សម្តេចតេជោ បានបន្តថា «…ខ្ញុំបានបញ្ជាពីម្សិលថា ត្រូវសិក្សាឱ្យបានច្បាស់ថា សម្រាប់ការកសាងផ្លូវស៊ី [ចំណាយ] ដីអស់ប៉ុន្មាន? កសាងប្រព័ន្ធប្រឡាយទឹកស៊ីដីអស់ប៉ុន្មាន? មានផ្លូវកៅស៊ូ ផ្លូវលំ ក៏ចាត់ចូលដែរ ដើម្បីយើងកាត់ចេញពីចំណែកដីបង្កបង្កើនផល»។ សម្តេចហ៊ុនសែន ក៏បានបញ្ជាបន្ថែមឱ្យ ឯកឧត្តម ផៃ ប៊ុនឈឿន ទៅពិភាក្សាជាមួយឯកឧត្តម សាយ សំអាល់ រកឱ្យឃើញថាតើផ្ទៃដីធ្វើផ្លូវបានចូលទៅក្នុងផ្ទៃដីលំនៅឋានទេ ហើយផ្ទៃដីសម្រាប់សម្រាប់ប្រព័ន្ធធារាសាស្ត្រ បានចូលទៅក្នុងផ្ទៃដីនៃដំណាំស្រូវទេ។ សម្តេចតេជោ បានបញ្ជាក់ថា ការឃើញនូវចំណុចនេះ យើងអាចយល់ដឹងបានពីការរីកចំរើននៃផលដំណាំសម្រាប់ប្រជាពលរដ្ឋកម្ពុជា។ គិតពីក្នុងខែមករា ដល់ថ្ងៃទី៣១ ខែមេសា ឆ្នាំ២០២២ គេបានរកឃើញថាផ្ទៃទឹកខែប្រាំង ៤៩១ ២៥៣ហិកតា វាលស្មៅមានចំនួន […]
អានបន្ថែម
សម្តេចព្រមានអភិបាលខេត្តនិងក្រុង ឱ្យជួយការងារជួសជុលផ្លូវ កុំចាំតែក្រសួងសាធារណការ
សម្តេចតេជោនាយករដ្ឋមន្ត្រី ហ៊ុន សែន ក្រើនរំលឹកដោយព្រមានខ្លាំងៗដល់អភិបាលក្រុង-ខេត្ត-ខណ្ឌ ព្រមទាំងអភិបាលរងនានា ដែលទទួលខុសត្រូវលើផ្នែកសាធារណការត្រូវមើលការងារជួសជុលផ្លូវផង កុំចាំបាច់ចំាតែក្រសួងសាធារណការចុះទៅ។ នេះបើយោងតាមប្រសាសន៍របស់សម្តេចតេជោ នៅថ្ងៃទី៣១ ខែសីហា ឆ្នាំ២០២២។ សម្តេចតេជោបានសង្កត់ធ្ងន់ៗថា «…ចឹងមិនមែនបង្កើតអាសនៈ ឱ្យអស់លោកមកធ្វើអភិបាលក្រុង ខណ្ឌ ខេត្ត និងរង នាំគ្នាមកអង្គុយលេងទេ…នាំគ្នាមើលផ្លូវណាត្រូវជួសជុល អាណាត្រូវធ្វើស្អី… កុំប្រចាំគ្នា ឬក៏ប៉ុណ្ណឹងចំាក្រសួងសាធារណការចុះមកធ្វើដែរ..។ សម្តេចបន្ត «…មិនមែនសំដៅតែទីក្រុងភ្នំពេញ ឬខេត្តកណ្តាលទេ គឺសម្រាប់គ្រប់ខេត្តក្រុងទាំងអស់ដែលទទួលខុសត្រូវមើលទីក្រុង ទីប្រជុំជន ត្រូវមើលផ្លូវ ហើយមិនថាទីក្រុង ឬទីប្រជុំជនទេ…ជួនកាលផ្លូវខ្លះខូចតែបន្តិចប៉ុណ្ណោះ ដំបូងខូចប៉ុនពែងអាកោរ ស្អែកប៉ុនចានចង្កឹះ ខានស្អែកប៉ុនចានគោម បន្ទាប់មកទៀតប៉ុនថ្លុកក្របីប៉ាដោយ… បើយើងជួលជុលវាអត់ទាន់ពេលវេលា..ចឹងសូមរម្លឹកឡើងវិញ ផ្លូវកាន់តែច្រើន កាន់តែវែង តម្រូវការជួសជុលក៏កាន់តែច្រើន ចឹងត្រូវមានការទទួលខុសត្រូវទៅលើការថែទាំវា ដើម្បីឱ្យផ្លូវប្រើបានយូរ…»។ ដោយសារបញ្ហាអសមត្ថភាពក្នុងការអនុវត្តតួនាទីក្នុងការចុះត្រួតពិនិត្យផ្លូវ សម្តេចតេជោបានសម្រេចដកតំណែងអភិបាលក្រុងតាខ្មៅក្នុងរយៈពេលតែមួយថ្ងៃប៉ុណ្ហោះ។ ក្នុងឱកាសនោះដែរ សម្តេចតេជោបានស្តីបន្ទោសដល់អភិបាលក្រុងចាស់យ៉ាងចាស់ដៃ ដោយសម្តេចនឹងរង់ចាំមើលអភិបាលក្រុងថ្មីដែលទើបនឹងតែងតាំង ថាតើចេះមើលផ្លូវឬអត់ ដោយបញ្ជាក់ថាសូមកុំមើលទៅលើ ត្រូវមើលទៅក្រោមផង។
អានបន្ថែម