ក្រុមហ៊ុនOCIC បើកលក់ជាផ្លូវការ គម្រោងខុនThe Diamond Bay Garden នៅលើកោះពេជ្រ
នៅថ្ងៃទី១៧ ខែឧសភានេះ ក្រុមហ៊ុន OCIC ជាក្រុមហ៊ុនអភិវឌ្ឍន៍វិស័យអចលនទ្រព្យធំជាងគេនៅកម្ពុជា បានប្រកាសសម្ពោធ និងបើកការលក់ជាផ្លូវការនៃគម្រោងខុនដូThe Diamond Bay Garden កំពស់៣៧ជាន់ ស្ថិតនៅមាត់ទន្លេមេគង្គទីក្រុងរណបកោះពេជ្រ រាជធានីភ្នំពេញ ។ លោកឧកញ៉ា ឆារស៍ វ៉ាន់ អគ្គនាយករងកាណាឌីយ៉ាគ្រុប និងតំណាងអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល របស់ក្រុមហ៊ុន Overseas Cambodian Investment Corporation (OCIC) បានថ្លែងថា គម្រោងសាងសង់អាគារខុនដូរ The Diamond Bay Garden មានការសាងសង់អាគារខ្ពស់ៗចំនួនបីអាគារទន្ទឹមគ្នា ហើយនៅក្នុងអាគារប្រណិតនេះ អាចមើលឃើញទេសភាពដ៏ស្រស់ស្អាតនៃទន្លេធំៗបីរួមមាន៖ ទន្លេមេគង្គ ទន្លេសាប និងទន្លេបាសាក់នៅក្នុងរាជធានីភ្នំពេញ។ លោកឧកញ៉ា បន្តថា នេះជាមោទនភាពដ៏ធំធេង របស់ក្រុមហ៊ុនOCIC ដែលមានចក្ខុវិស័យវែងឆ្ងាយ បន្តការវិនិយោគ ការអភិវឌ្ឍវិស័យអចលទ្រព្យប្រកបដោយចិរភាព និងការបង្កើនគម្រោងសាងសង់អាគារប្រណិតខ្ពស់នៅក្នុងរាជធានីភ្នំពេញ នៅក្រោមម្លប់សន្តិភាព និងការលើកស្ទួយកំណើនកំណើនសេដ្ឋកិច្ចជាតិ និងការវិនិយោគនៅកម្ពុជា។ អគារខុនដូ Diamond Bay Garden […]
អានបន្ថែម
ខេត្តកោះកុង មានដីសម្បទានសេដ្ឋកិច្ចជិត ៤៥ម៉ឺនហិកតា
ខេត្តកោះកុង មានក្រុមហ៊ុនសម្បទានដីសេដ្ឋកិច្ច ចំនួន ៧ក្រុមហ៊ុន គ្របដណ្តប់ផ្ទៃដី ៤៤.១៧៧ ហិកតា។ យោងតាមរបាយការណ៍បូកសរុបការងារ ឆ្នាំ២០២១ និងលើកទិសដៅឆ្នាំ២០២២ រដ្ឋបាលខេត្តកោះកុង បញ្ជាក់ថា ក្រុមហ៊ុនសម្បទានដីសេដ្ឋកិច្ច បានវិនិយោគលើការដាំដើមប្រេងខ្យល់ អំពៅ និងកៅស៊ូ។ ផ្ទៃដីក្រុមហ៊ុន Greerich Group Co Ltd ដែលជាក្រុមហ៊ុនមួយក្នុងចំណោមក្រុមហ៊ុនទាំង៧ កាលពីមុនមានដីទំហំ ១០.០៧៧ ហិកតា ប៉ុន្តែក្រោយចេញអនុក្រឹត្យលេខ ៤៦អនក្រ ចុះថ្ងៃទី២ ខែមីនា ឆ្នាំ២០២១ របស់រាជរដ្ឋាភិបាល បានកាត់ដីរបស់ក្រុមហ៊ុនចំនួន ៤.៩២៣ហិកតា ជាទ្រព្យសម្បត្តិឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធជូនប្រជាពលរដ្ឋ និងមួយចំណែករក្សាទុក ជាទ្រព្យសម្បត្តិឯកជនកាន់កាប់ដោយរដ្ឋបាលខេត្តកោះកុង។ ដូចនេះផ្ទៃដីក្រុមហ៊ុននៅសល់ជាក់ស្តែងមានទំហំ ៥.១៥៤ហិកតា។ ខេត្តកោះកុង ជាខេត្តមួយក្នុងចំណោម ២៥រាជធានីខេត្ត ដែលមានសក្តានុពលដល់ការដាំដុះដំណាំកៅស៊ូ និងដំណាំផ្សេងៗទៀត។ ផ្ទៃដីដាំដុះកៅស៊ូទូទាំងខេត្តសរុបចំនួន ១៤.៣៩៨ ហិកតា ផ្ទៃដីអំពៅ ១៩.៧០០ ហិកតា ផ្ទៃដីអាកាស្យា ៩.៦១០ ហិកតា និងផ្ទៃដី ប្រេងខ្យល់ […]
អានបន្ថែម
រាជរដ្ឋាភិបាលទម្លាក់កញ្ចប់ថវិកា ១៥០លានដុល្លារ លើកកម្ពស់វិស័យទេសចរណ៍
ក្រសួងសេដ្ឋកិច្ច និងហិរញ្ញវត្ថុ បានប្រកាសដាក់ឲ្យអនុវត្តគម្រោងសហហិរញ្ញប្បទានស្តារ និងជម្រុញកំណើនក្នុងវិស័យមួយនេះ ដោយប្រើប្រាស់កញ្ចប់ថវិកាសរុបចំនួន ១៥០លានដុល្លារអាមេរិក ដើម្បីលើកកម្ពស់វិស័យទេសចរណ៍ ក្រោយវិបត្តិកូវីដ១៩។ នេះបើតាមសេចក្តីប្រកាសព័ត៌មានកាលពីថ្ងៃទី ១៧ ខែឧសភា ឆ្នាំ២០២២។ កញ្ចប់ថវិកាសរុបនេះ ជាការច្របាច់បញ្ចូលគ្នារវាងថវិកាបដិភាគពីរាជរដ្ឋាភិបាលចំនួន ៧៥លានដុល្លារអាមេរិក តាមរយៈធនាគារសហគ្រាសធុនតូច និងមធ្យមកម្ពុជា (SME Bank) និងថវិកាបដិភាគរបស់គ្រឹះស្ថានហិរញ្ញវត្ថុចូលរួម (PFIs) ចំនួន ៧៥លានដុល្លារ។ រាជរដ្ឋាភិបាល នឹងប្រើប្រាស់ថវិកានេះ ផ្តោតជាសំខាន់តែទៅលើវិស័យទេសចរណ៍តែប៉ុណ្ណោះ ដោយជំរុញប្រតិបត្តិការអាជីវកម្មឡើងវិញ ការកែលម្អ ការពង្រីកសេវាកម្ម ដើម្បីត្រៀមទទួលភ្ញៀវជាតិ និងអន្តរជាតិ ក្រោយវិបត្តិកូវីដ១៩ បានធូរស្រាល។ តាមរយៈគម្រោងនេះ សហគ្រាសក្នុងវិស័យទេសចរណ៍ដែលរងផលប៉ះពាល់ពីវិបត្តិកូវដី១៩ អាចស្នើសុំឥណទានពីគ្រឹះសា្ថនសាធារណៈចូលរួម ដែលជាដៃគូរបស់ SME Bank ក្នុងអត្រាការប្រាក់សម្បទាន។ ជាមួយគ្នានេះផងដែរ កន្លងមក រដ្ឋក៏បានសម្រេចបន្ដការអនុគ្រោះពន្ធដល់វិស័យទេសចរណ៍ សណ្ឋាគារ និងអាកាសចរណ៍ រហូតដល់ខែមិថុនា ឆ្នាំ២០២២ ដើម្បីផ្តល់ការគាំទ្របន្ថែម ដល់ធុរជនពាក់ព័ន្ធក្នុងការកែលម្អ និងត្រៀមខ្លួនទទួលស្វាគមន៍ភ្ញៀវទេសចរក្រោយបើកប្រទេសពេញលេញ។ (អានបន្ថែម)
អានបន្ថែម
អគារចត្តាឡីស័កនៅខេត្តបាត់ដំបងតម្លៃជាង ១៧ម៉ឺនដុល្លារ ដាក់ឲ្យដំណើរការហើយ
អគារចត្តាឡីស័កមួយកន្លែងនៅខេត្តបាត់ដំបង តម្លៃជាង ១៧ម៉ឺនដុល្លារអាមេរិក បានសម្ពោធដាក់ឲ្យប្រើប្រាស់ជាផ្លូវការហើយ កាលថ្ងៃទី១៧ ខែឧសភា ឆ្នាំ២០២២ ក្រោមវត្តមាន ឯកឧត្តម សុខ លូ អភិបាលខេត្តបាត់ដំបង លោក ណាំ ប៊ុកហ្យុន (Nam Bok Huyn) អគ្គនាយកអង្គការ KOFIH ប្រចាំប្រទេសកូរ៉េ។ ឯកឧត្តម សុខ លូ បានលើកឡើងថា បើទោះបច្ចុប្បន្នថ្វីត្បិតតែជំងឺកូវីដ-១៩បានធូរស្បើយច្រើន មិនមានអ្នកធ្វើចត្តាឡីស័កទៀតក៏ដោយ តែអគារមណ្ឌលចត្តាឡីស័កនេះមិនទុកចោលដែរ ពោលគឺយើងនឹងធ្វើការប្រើប្រាស់មណ្ឌលនេះ ជាមណ្ឌលសំរាកព្យាបាលជំងឺទូទៅ ដោយមិនប្រកាន់ជំងឺអ្វីឡើយ ហើយបើសិនជាមានការផ្ទុះជំងឺកូវីដ-១៩ដោយប្រការណាមួយ នឹងយើងនឹងអាចប្រើប្រាស់មណ្ឌលនេះជាមណ្ឌលចត្តាឡីស័កវិញម្ដង ។ ឯកឧត្តម បានចាត់ទុកថា អគារនេះនឹងរួមចំណែកដល់ការអភិវឌ្ឍន៍វិស័យសុខាភិបាលនៅប្រទេសកម្ពុជាផងដែរ។ គួរបញ្ជាក់ដែរថា អគារចត្តាឡីស័កមួយកន្លែងនេះ គឺស្ថិតនៅក្នុងមណ្ឌលសុខភាពត្រាង ស្រុកកំរៀង ខេត្តបាត់ដំបង សាងសង់ឡើងក្រោមជំនួយរបស់រដ្ឋាភិបាលកូរ៉េ តាមរយៈមូលនិធិកូរ៉េសម្រាប់ការថែទាំសុខភាពអន្តរជាតិ (KOFIH) ដែលចំណាយថវិកាសរុប ១៧១,២៤៥.៥៦ដុល្លាសហរដ្ឋអាមេរិក ដោយក្នុងនោះក៏បានបំពាក់ជាមួយនូវសម្ភារៈ ឧបករណ៍ បរិក្ខារពេទ្យមួយចំនួនផងដែរ៕
អានបន្ថែម
ក្រសួងរ៉ែប្តេជ្ញាពង្រីកបណ្តាញផ្គត់ផ្គង់អគ្គិសនីឱ្យបានរហូត ៩៨% ត្រឹមឆ្នាំ២០២២
ប្រជាពលរដ្ឋកម្ពុជាប្រមាណជា៨៤ភាគរយនៃចំនួន២លានខ្នងផ្ទះនៅទូទាំងប្រទេសកម្ពុជា បានភ្ជាប់បណ្តាញអគ្គិសនីប្រើប្រាស់រួចរាល់ ខណៈត្រឹមឆ្នាំ២០២២នេះ ការពង្រីកបណ្តាញផ្គត់ផ្គង់អគ្គិសនីទូទាំងប្រទេសសម្រេចបាន៩៨%។ នេះបើតាមការឲ្យដឹងពីរដ្ឋមន្ត្រីក្រសួងរ៉ែ និងថាមពល ឯកឧត្តម ស៊ុយ សែម ក្នុងពិធីប្រកាសចូលកាន់តំណែងប្រធានមន្ទីរ រ៉ែ និងថាមពលខេត្តសៀមរាប កាលពីថ្ងៃទី១៧ ខែឧសភា ឆ្នាំ២០២២។ ឯកឧត្តម ស៊ុយ សែម បានឲ្យដឹងថា ក្នុងគោលនយោបាយផ្គត់ផ្គង់ថាមពលនេះ កម្ពុជាបានអនុវត្តបាននូវការអូសខ្សែតភ្ជាប់បណ្តាញចរន្តអគ្គិសនីបានចំនួន ៩៨ភាគរយនៃចំនួនភូមិសរុបចំនួនប្រមាណ១៤.៣៩០ភូមិនៅទូទាំងប្រទេសកម្ពុជា។ ឯកឧត្តមបន្តថា ក្នុងនោះដែរប្រជាពលរដ្ឋចំនួន ៨៤ភាគរយ នៃប្រជាពលរដ្ឋប្រមាណជា ២លានខ្នងផ្ទះក៏បានតភ្ជាប់បណ្តាញប្រើប្រាស់រួចរាល់ហើយដែរ ខណៈត្រឹមឆ្នាំ២០២២នេះ ការពង្រីកបណ្តាញផ្គត់ផ្គង់អគ្គិសនីទូទាំងប្រទេសសម្រេចបាន ៩៨% នៃចំនួនភូមិសរុបនៅក្នុងប្រទេសកម្ពុជា។ ឯកឧត្តម ស៊ុយ សែម បានលើកឡើងថា ចំពោះភូមិ ២ភាគរយ ដែលនៅសេសសល់មិនទាន់បានបញ្ជូនបណ្តាញអគ្គិសនីទៅទីនោះទេ ដោយនោះជាភូមិដាច់ស្រយាល នៅក្នុងព្រៃ គ្មានផ្លូវចូល ឬជាភូមិបណ្តែតទឹកជាដើម តែទោះជាយ៉ាងណាក្រសួងនឹងខិតខំរកប្រភពថាមពលផ្សេងៗដើម្បីផ្គត់ផ្គង់ដល់ភូមិប្រជាពលរដ្ឋទាំងនោះ។ គួរបញ្ជាក់ថា បច្ចុប្បន្នកម្ពុជាមានទំបន់វារីអគ្គិសនីចំនួន៧ ដែលកំពុងដើរតួនាទីជាឆ្អឹងខ្នងនៃវិស័យថាមពលរបស់កម្ពុជា។ ក្រៅពីនោះកម្ពុជាក៏នៅមានរោងចក្រអគ្គិសនីដែលដើរដោយថាមពលធ្យូងថ្ម និងប្រភពថាមពលដែលទិញពីប្រទេសជិតខាងផងដែរ៕
អានបន្ថែម
កម្ពុជានឹងដាក់គម្រោងសាកល្បងប្រព័ន្ធដឹកជញ្ជូនឆ្លាតវៃលើផ្លូវជាតិលេខ៤
ក្រសួងសាធារណការ និងដឹកជញ្ជូនបានឲ្យដឹងថា កម្ពុជាគ្រោងនឹងដាក់គម្រោងសាកល្បងប្រព័ន្ធដឹកជញ្ជូនឆ្លាតវៃ (ITS Pilot Project) លើផ្លូវជាតិលេខ៤នាពេលខាងមុខនេះ។ នេះបើតាមការប្រជុំស្ដីពីការផ្សព្វផ្សាយរបាយការណ៍ផែនការមេនៃប្រព័ន្ធដឹកជញ្ជូនឆ្លាតវៃរបស់វិទ្យាស្ថាន KRIHS កាលថ្ងៃទី១៦ ខែឧសភា ឆ្នាំ ២០២២។ លោក គង់ សុផល អគ្គនាយករងនៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានឲ្យដឹងថា កិច្ចប្រជុំនេះធ្វើឡើងក្នុងគោលបំណងបង្ហាញពីវឌ្ឍនភាពគម្រោងផែនការមេប្រព័ន្ធដឹកជញ្ជូនឆ្លាតវៃ និងគម្រោងសាកល្បងប្រព័ន្ធដឹកជញ្ជូនឆ្លាតវៃ (ITS Pilot Project) លើផ្លូវជាតិលេខ៤ ដោយមានការចូលរួមធ្វើបទបង្ហាញពីអ្នកជំនាញរបស់កូរ៉េអំពីគ្រោងឆ្អឹងរបស់ផែនការមេ និងគម្រោងសាកល្បង។ នេះជាកិច្ចប្រជុំលើកទីពីរហើយ រវាងអ្នកជំនាញមកពីវិទ្យាស្ថាន KRIHS របស់ប្រទេសកូរ៉េ និងក្រសួងសាធារណការ និងដឹកជញ្ជូន។ តាមគម្រោងផែនការមេ ប្រព័ន្ធដឹកជញ្ជូនឆ្លាតវៃនឹងត្រូវបញ្ចប់នៅក្នុងខែកក្កដា ខាងមុខនេះ។ តាមយៈកិច្ចប្រជុំនេះបានឲ្យដឹងទៀតថា អ្នកជំនាញកូរ៉េបានបង្កើតកម្មវិធីទូរស័ព្ទ (Application) និងបំពាក់ CCTV Cameras និង Variable Message Signs (VMS) សម្រាប់ប្រមូល និងបង្ហាញព័ត៌មានកំពុងកើតមាន (Real-Time Information) នៅលើកំណាត់ផ្លូវជាតិលេខ៤ ដែលនឹងត្រូវអនុវត្តចាប់ពីឆ្នាំ២០២៣ ដល់ឆ្នាំ២០២៥។ […]
អានបន្ថែម
រដ្ឋនឹងបោះទុនសង់រោងចក្រវ៉ាក់សាំងខ្លួនឯង បើក្រុមហ៊ុនបានអាជ្ញាបណ្ណហើយមិនសង់
ប្រមុខរដ្ឋាភិបាលកម្ពុជា សម្ដេចតេជោ ហ៊ុន សែន ប្រកាសថា នឹងបញ្ចេញលុយរដ្ឋ មកសង់រោងចក្រផលិតវ៉ាក់សាំងកូវីដ-១៩ ដោយខ្លួនឯង ប្រសិនបើក្រុមហ៊ុនបានអាជ្ញាបណ្ណហើយនៅមិនព្រមសាងសង់។ ការប្រកាសនេះ ត្រូវបានធ្វើឡើងក្នុងពិធីជួបសំណេះសំណាលជាមួយក្រុមគ្រូពេទ្យស្ម័គ្រចិត្តសម្ដេចតេជោកាល ថ្ងៃទី១៧ ខែឧសភា ឆ្នាំ២០២២។ ថ្លែងក្នុងពិធីនេះ សម្ដេច ហ៊ុន សែន បានចោទសួរក្រសួងសុខាភិបាលពីភាពយឺតយ៉ាវនៃដំណើរការបង្កើតរោងចក្រផលិតវ៉ាក់សាំងការពារជំងឺកូវីដ-១៩ នៅកម្ពុជា ដោយបញ្ជាឱ្យរាយការណ៍ជូនសម្ដេចជារៀងរាល់សប្ដាហ៍ ហើយថាប្រសិនជាក្រុមហ៊ុនធ្វើមិនកើតឱ្យដកអាជ្ញាបណ្ណចេញវិញ ទុកឱ្យរដ្ឋជាអ្នកធ្វើវិញ។ សម្តេចបន្តដូច្នេះថា «ផ្នែកពាក់ព័ន្ធត្រូវពិភាក្សាគ្នាឡើងវិញ ពីដំណើរការបង្កើតរោងចក្រផលិតវ៉ាក់សាំងកូវីដ-១៩ ឱ្យបានឆាប់រហ័សតាមដែលអាចធ្វើទៅបាន យើងមិនឱបទុកនោះទេ បើឯកជនមិនធ្វើ រដ្ឋត្រូវបញ្ចេញលុយ ដើម្បីដំណើរការរោងចក្រផលិតវ៉ាក់សាំងកូវីដ-១៩ នេះឱ្យបានឆាប់ ហើយក្នុងករណីកូវីដ-១៩ រលាយរលត់ពីផែនដីនេះ យើងក៏អាច យករោងចក្រនោះទៅផលិតវ៉ាក់សាំងផ្សេងៗទៀត ដើម្បីបំពេញតម្រូវការសង្គមផងដែរ»។ គួរបញ្ជាក់ដែរថា ការប្រកាសថារដ្ឋនឹងបញ្ចេញលុយសង់រោងចក្រផលិតវ៉ាក់សាំងកូវីដ និងព្រមានដកអាជ្ញាបណ្ណក្រុមហ៊ុនផលិតវ៉ាក់សាំងដែលទទួលបានការអនុញ្ញាតពីក្រសួងសុខាភិបាលចេញវិញនាពេលនេះ គឺធ្វើឡើងបន្ទាប់ពីទទួលការរាយការណ៍ពីភាគីចិនថា ភាគីកម្ពុជាមានការយឺតយ៉ាវក្នុងការបង្កើតរោងចក្រផលិត៕
អានបន្ថែម
គម្រោងស្តារនិងកែលម្អស្ទឹងសៀមរាបដំណាក់កាលទី២ ចាប់បើកការដ្ឋានហើយ
រដ្ឋបាលខេត្តសៀមរាប បានចាប់ផ្តើមបើកការដ្ឋានស្តារ និងកែលម្អដងស្ទឹងសៀមរាបដំណាក់កាលទី២ (KHM-18) ដើម្បីបញ្ជៀសទឹកលិចក្រុងសៀមរាបនារដូវវស្សាក្រោមឥណទានសម្បទានរបស់ធនគារអាហរណ៍នីហរណ៍សាធារណរដ្ឋកូរ៉េ។ នេះបើតាមពិធីប្រព្រឹត្តកាលពីថ្ងៃទី១៦ ខែឧសភា ឆ្នាំ២០២២ ក្រោមអធិបតីភាព ឯកឧត្តម វង្ស ពិសិដ្ឋ អនុរដ្ឋលេខាធិការ ក្រសួងសាធារណការ និងដឹកជញ្ជូន។ គម្រោងនេះ ជាដំណាក់កាលទី២ បន្តពីគម្រោងសាងសង់ប្រព័ន្ធលូចម្រោះទឹកកខ្វក់ និងស្តារស្ទឹងសៀមរាបជំហានទី១ (KHM-7) ដែលចាប់ផ្តើមកែលម្អពីចំណុចស្ពានវាងក្រុង ទៅដល់ភូមិអារញ្ញ ប្រវែង ៥គីឡូម៉ែត្រ ដោយអនុវត្តដោយក្រុមហ៊ុន Youngjin Construction Inc.។ គួរបញ្ជាក់ថា រាជរដ្ឋាភិបាលកម្ពុជា ក៏បានបង្វែរថវិកាដែលសេសសល់ពីការសាងសង់ហេដ្ឋារចនាសម្ព័ន្ធផ្លូវ ៣៤ខ្សែនៅព្រះសីហនុ មកប្រើប្រាស់ក្នុងការកែលម្អដងស្ទឹងសៀមរាប ដែលមានប្រវែងសរុបជិត ៩គីឡូម៉ែត្រ។ (អានបន្ថែម)
អានបន្ថែម
ក្រសួងជំរុញក្រុមហ៊ុនទទួលសិទ្ធិអនុវត្តគម្រោងទឹកស្អាតនៅឃុំភ្ញីមាសលើផ្ទៃដី ៣៣៣ហិកតា
ក្រសួងបរិស្ថាន កំណត់ឱ្យក្រុមហ៊ុន អានកូ វ៉ធើរ សឹបផ្លាយ រៀបចំនិតីវិធីច្បាប់ និងផែនការអាជីវកម្មឱ្យបានច្បាស់លាស់ លើគម្រោងវិនិយោគអាជីវកម្មផ្គត់ផ្តង់ទឹកស្អាត លើផ្ទៃដី ៣៣៣ ហិកតា ស្ថិតក្នុងស្រុកគិរីសាគរខេត្តកោះកុង។ យោងតាម របាយការណ៍ស្តីពីការអនុវត្តការងាររបស់រដ្ឋបាលខេត្តប្រចាំឆ្នាំ២០២១ និងទិសដៅការងារឆ្នាំ២០២២ ក្រសួងបរិស្ថាន បានអនុញ្ញាតជាគោលការណ៍ក្នុងការស្នើសុំវិនិយោគលើដីរដ្ឋ១កន្លែង ដល់ក្រុមហ៊ុន អានកូ វ៉ធើរ សឹបផ្លាយ យ ស្ថិតក្នុងភូមិគៀនក្រឡាញ់ ឃុំភ្ញីមាស ស្រុកគិរីសាគរ។ ក្រសួងបរិស្ថាន បានស្នើដល់ក្រុមហ៊ុន ត្រូវបន្តរៀបចំនិតីវិធីច្បាប់ និងផែនការអាជីវកម្មឱ្យបានច្បាស់លាស់ និងត្រូវវៀបចំអនុវត្តគម្រោងអភិវឌ្ឍន៍ឱ្យបានឆាប់រហ័សស្របតាមផែការ។
អានបន្ថែម
ក្រុមហ៊ុនយក្សជប៉ុនដាក់ទិសដៅពង្រីក Aeon Mall បន្ថែមទៀតនៅទីក្រុងហាណូយ
ក្រុមហ៊ុនយក្សជប៉ុន Aoen Mall គ្រោងពង្រីកផ្សារលក់រាយរបស់ខ្លួន បីទៅបួនកន្លែងបន្ថែមទៀតនៅទីក្រុងហាណូយ ប្រទេសវៀតណាម ក្នុងរយៈពេលបីឆ្នាំខាងមុខទៀត។ អគ្គនាយកគ្រប់គ្រង Aeon Mall Vietnam លោក Nagakawa Tetsuyuki បានលើកយកគម្រោងនេះ ក្នុងកិច្ចប្រជុំជាមួយនឹងអគ្គលេខាធិការបក្សទីក្រុងហាណូយ លោក Dinh Tien Dung ។ យោងតាមការចុះផ្សាយរបស់សារព័ត៌មាន VN Express ចេញផ្សាយកាលពីថ្ងៃទី១៤ ខែឧសភា លោក Tetsuyuki បាននិយាយថា លោកសង្ឃឹមថា គម្រោង Aeon Mall Hoang Mai អាចចាប់ផ្តើមសាងសង់នៅត្រីមាសទីបីឆ្នាំ២០២២នេះ។ បច្ចុប្បន្នក្រុមហ៊ុនកំពុងដំណើរការគម្រោងចំនួន ៦ នៅទូទាំងប្រទេសវៀតណាម រួមទាំងផ្សារទំនើបចំនួនពីរនៅស្រុក Long Bien និង Ha Dong របស់ទីក្រុងហាណូយ។ គួរបញ្ជាក់ថា ក្រុមហ៊ុនគ្រោងនឹងបើកដំណើរការគម្រោងឱ្យបានចំនួន ១៦ បន្ថែមទៀតនៅទូទាំងប្រទេសវៀតណាមត្រឹមឆ្នាំ ២០២៥។
អានបន្ថែម
មជ្ឈមណ្ឌលទិន្នន័យ (Data Center) តម្លៃ ១លានដុល្លារដាក់សម្ពោធប្រើប្រាស់ជាផ្លូវការហើយ
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសម្ពោធដាក់ឲ្យប្រើប្រាស់ជាផ្លូវការនូវមជ្ឈមណ្ឌលទិន្នន័យ (Data Center) ដែលមានតម្លៃប្រមាណ ១លានដុល្លារអាមេរិក។ នេះបើតាមពិធីសម្ពោធកាលពីថ្ងៃ១៦ ខែឧសភា ឆ្នាំ២០២២។ មជ្ឈមណ្ឌលទិន្នន័យនេះ ត្រូវបានរៀបចំជាពីរផ្នែក គឺទី១ ជាផ្នែកបរិក្ខារគាំទ្រមជ្ឈមណ្ឌលទិន្នន័យ ធានាបាននូវសុពលភាព និងសុវត្ថិភាពឧបករណ៍ និងទី២ ជាផ្នែកឧបករណ៍ព័ត៌មានវិទ្យា ដែលមានតួនាទីត្រួតពិនិត្យប្រតិបត្តិការរបស់ឧបករណ៍ និងការរក្សាទុកទិន្នន័យ។ មួយវិញទៀត មជ្ឈមណ្ឌលទិន្នន័យនេះ មានសមត្ថភាពរក្សារផ្ទុកទិន្ន័យសំខាន់ៗរបស់ក្រសួងបានពី១០ ទៅ ២០ឆ្នាំមុន រហូតដល់បច្ចុប្បន្ន និងអាចបន្តរហូតដល់ ៣ឆ្នាំខាងមុខទៀត។ ក្នុងឱកាសនោះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានមានប្រសាសន៍ថា «ក្នុងយុគសម័យនៃការរីកចម្រើន ផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ការរក្សាផ្ទុកទិន្នន័យផ្សេងៗកាន់តែមានសារៈសំខាន់ ពីព្រោះជាទីតាំងប្រមូលផ្តុំឯកសារ ងាយស្រួលស្វែងរក សម្រាប់តម្រូវការសិក្សា ស្រាវជ្រាវ រៀនសូត្រ ហើយក៏ជាមជ្ឈមណ្ឌលរក្សាសុវត្ថិភាពទិន្នន័យរបស់យើងបានជាសម្ងាត់ និងយូរអង្វែងផងដែរ។»
អានបន្ថែម
ក្រសួងដាក់ចេញនូវយុទ្ធសាស្រ្តធំៗ២ ដើម្បីធានាសុវត្ថិភាពទឹកតាមបណ្តាខេត្តតំបន់សមុទ្រ
ក្រសួងធនធានទឹក និងឧតុនិយម បានប្រកាសដាក់ចេញនូវយុទ្ធសាស្រ្តសំខាន់ៗចំនួន២ ដើម្បីធានាបានលើសុវត្ថិភាពទឹកក្នុងបណ្តាខេត្តតំបន់មាត់សមុទ្រ។ នេះបើយោងតាមប្រសាសន៍របស់មន្ត្រីជាន់ខ្ពស់នៃក្រសួងធនធានទឹក និងឧតុនិយម ក្នុងពេលចុះពិនិត្យលើកិច្ចការគ្រប់គ្រងវិស័យធនធានទឹក និងឧតុនិយម របស់ខេត្តកោះកុង កាលថ្ងៃទី១៦ ខែឧសភា ឆ្នាំ២០២២។ នាឱកាសនោះ ឯកឧត្តម ចាន់ ស៊ីណាត រដ្ឋលេខាធិការនៃក្រសួងធនធានទឹក និងឧតុនិយម បានលើកឡើងថា រាល់ការអនុវត្តសកម្មភាពជោគជ័យរបស់ក្រសួងកន្លងមក គឺកើតចេញពីការគិតគូគ្រប់ជ្រុងជ្រោយ និងដោយបានការចូលរួមសហការដ៏ល្អពីសំណាក់ដៃគូពាក់ព័ន្ធ។ ឯកឧត្តមបន្ថែមថា ដើម្បីធ្វើឲ្យការអភិវឌ្ឍន៍វិស័យធនធានទឹក និងឧតុនិយមមានការធានា និងដោះស្រាយលើបញ្ហាសន្តិសុខសុវត្ថិភាពទឹកក្នុងបណ្តាខេត្តនៅតាមតំបន់សមុទ្រ ឯកឧត្តមរដ្ឋមន្ដ្រី បានដាក់ចេញនូវយុទ្ធសាស្រ្តសំខាន់ៗចំនួនពីរ រួមមាន៖ ទី១. ធ្វើការជួសជុលស្តារឡើងវិញ និងសាងសង់ឲ្យបានច្រើនលើប្រព័ន្ធទំនប់ប៉ូលឌែរ នៅក្នុងតំបន់ខេត្តកែប ខេត្តព្រះសីហនុ និងខេត្តកោះកុង។ និង ២. ធ្វើការកសាងឲ្យបានច្រើននូវអាងស្តុកទឹកដែលត្រូវប្រមូលចាប់យកទឹកពីតំបន់ផ្ទៃរងទឹកភ្លៀងនៃតំបន់ Costal Corridors ជាដើម។ គួរបញ្ជាក់ដែរថា តាមរយៈសកម្មភាពចុះពិនិត្យការងារធនធានទឹក និងឧតុនិយម របស់ខេត្តកោះកុង ក្រសួង ក៏បានធ្វើការកសាងនូវផែនការការងារមេសម្រាប់ធ្វើការជួលជុលស្តារឡើងវិញលើប្រព័ន្ធទំនប់ការពារព្រៃទាំងអស់ អាងស្ទាក់ទឹកលើព្រែកទាំងប្រាំរបស់ខេត្ត ជួសជុលស្តារឡើងវិញលើអាងទឹកទាំងប្រាំរបស់ខេត្ត ធ្វើការជួសជុលស្តារឡើងវិញនូវស្រះទឹក និងបឹងបួ អូរធម្មជាតិនានារបស់ខេត្ត ដើម្បីដោះស្រាយបញ្ហាអសន្តិសុខទឹករបស់ខេត្តនេះផងដែរ៕
អានបន្ថែម