បើកម្ពុជាចង់មានកំណើនសេដ្ឋកិច្ចរយៈពេលវែង ADB ណែនាំឱ្យអនុវត្តគោលនយោបាយ៤
អត្ថបទវិភាគរបស់ ADB បានណែនាំថា បើកម្ពុជាចង់មានកំណើនសេដ្ឋកិច្ចដែលស្ថិរភាព និងចីរភាព ក្នុងរយៈពេលវែង រដ្ឋាភិបាលគួរជំរុញឱ្យមានការវិនិយោគបៃតង និងការផលិតថាមពលស្អាតក្នុងស្រុកឱ្យបានច្រើនជាងមុន។ អត្ថបទវិភាគនេះ សរសរឡើងដោយនាយកប្រតិបត្តិធនាគារអភិវឌ្ឍន៍អាស៊ីប្រចាំប្រទេសកម្ពុជា អ្នកស្រី Sunniya Durrani-Jamal និង សេដ្ឋវិទូផ្នែកថាមពល Darren Byers ដោយចេញផ្សាយកាលពីថ្ងៃទី ២៥ សីហា កន្លងទៅនេះ។ អត្ថបទនេះបានរំលេចនូវវិធីសាស្ត្រសំខាន់ៗ ៤ ដើម្បីឱ្យរាជរដ្ឋាភិបាលកម្ពុជា និងភាគីពាក់ព័ន្ធ គួរពិចារណាអនុវត្ត រួមមាន៖ ទី១ ការកាត់បន្ថយការកាប់បំផ្លាញព្រៃឈើ ការដាំដើមឈើឡើងវិញ និងការលើកកម្ពស់ការគ្រប់គ្រងធនធាន និងឥន្ធនៈស្អាត។ គោលនយោបាយទាំងនេះ មិនត្រឹមតែជួយកាត់បន្ថយការបញ្ចេញឧស្ម័នពុលនៅកម្ពុជាប៉ុណ្ណោះទេ តែថែមទាំងជួយកាត់បន្ថយគ្រោះធម្មជាតិ និងចំណាយស្តារហេដ្ឋារចនាសម្ព័ន្ធខូចខាតពីគ្រោះធម្មជាតិទាំងនោះទៀតផង។ ទី២ កម្ពុជាគួរពិចារណាបន្ថែមចំណាយលើការវិនិយោគដែលបញ្ចេញឧស្ម័នពុលខ្លាំង ឬពន្យល់ឱ្យងាយយល់គឺការគិតលុយលើរាល់ការបញ្ចេញឧស្ម័នពុលពីរោងចក្រនានា។ គោលនយោបាយនេះត្រូវមានការចូលរួមទាំងរដ្ឋ ឯកជន និងអ្នកប្រើប្រាស់ទូទៅ។ ជាក់ស្ដែង គោលនយោបាយស្រដៀងគ្នានេះត្រូវបានអនុវត្តខ្លះហើយ ដូចជាការលក់ឥណទានកាបូនជាដើម។ (អានបន្ថែម) ទី៣ ការពិចារណាយកពន្ធលើការបញ្ចេញឧស្ម័នពុលរបស់រោងចក្រនានា ដើម្បីជំរុញឱ្យពួកគេអនុវត្តបច្ចេកវិទ្យាថ្មី កាត់បន្ថយការបញ្ចេញឧស្ម័នពុលរបស់ពួកគេ។ ទី៤ ការងាកពីការប្រើប្រាស់រោងចក្រថាមពលដុតធ្បូងថ្ម មកប្រើថាមពលបៃតង ឬថាមពលកកើតឡើងវិញ។ តម្លៃនៃបច្ចេកវិទ្យាក្នុងការវិនិយោគថាមពលកកើតឡើងវិញ […]
អានបន្ថែម
អ្នកជំនាញអន្តរជាតិធំៗ៣ រួមគ្នាជួយបង្វឹករោងចក្រនៅកម្ពុជានូវបច្ចេកវិទ្យាគ្រប់គ្រងថាមពលថ្មី
រោងចក្រនានានៅកម្ពុជា កំពុងត្រៀមខ្លួនងាកមកប្រើប្រាស់បច្ចេកវិទ្យា និងគោលនយោបាយគ្រប់គ្រងថាមពលបែបថ្មី ដែលនឹងជួយសន្សំសំចៃថាមពល បង្កើនប្រសិទ្ធភាពផលិតកម្ម និងពិសេសឆ្លើយតបទៅនឹងនិន្នាការពិភពលោកដែលចង់កាត់បន្ថយផលប៉ះពាល់បរិស្ថាន ក្នុងសង្វាក់ផលិតកម្មសំលៀកបំពាក់។ ការងារនេះ ត្រូវបានដឹកនាំដោយភ្នាក់ងារជំនាញធំៗ៣ គឺភ្នាក់ងារ Switch Garment វិទ្យាស្ថានថាមពលនិងធនធាន (TERI) និងវិទ្យាស្ថានបច្ចេកវិទ្យាកម្ពុជា ដោយក្រុមហ៊ុនការងាររួមនេះ បានចាប់ផ្តើមធ្វើសវនកម្មថាមពលរយៈពេលវែង តាមបណ្តារោងចក្រកាត់ដេរនានា តាំងពីដើមខែសីហា មកម្ល៉េះ។ បើយោងតាមសេចក្តីប្រកាសព័ត៌មានចេញផ្សាយកាលពីថ្ងៃទី២៤ ខែសីហា ការធ្វើសវនកម្មថាមពលនេះ នឹងវិភាគពីការប្រើប្រាស់ថាមពលដែលមានស្រាប់របស់រោងចក្រ ហើយបន្ទាប់មកនឹងជួយវិធីឱ្យរោងចក្រទាំងនោះសន្សំសំចៃថាមពលជាងមុន ព្រមនឹងការបង្កើនផលិតកម្ម។ គម្រោងនេះក៏នឹងជួយណែនាំបំភ្លឺផ្លូវ ផ្ដល់វគ្គបណ្តុះបណ្តាល និងជួយពង្រឹងសមត្ថភាពដល់រោងចក្រថា គួរតែវិនិយោគបន្ថែម ឬកាត់បន្ថយផ្នែកណា ដើម្បីសម្រេចបាននូវប្រព័ន្ធគ្រប់គ្រងថាមពលស្អាត និងមានចីរភាព។ មកទល់បច្ចុប្បន្ន រោងចក្រកាត់ដេរជាង ៣០ បានចូលរួមជាដៃគូជាមួយនឹងគម្រោង Switch Garment ហើយ ដោយគម្រោងនេះនឹងជ្រើសរើស ២០ រោងចក្រទៀត ត្រឹមចុងឆ្នាំនេះ។ យោងតាមធនាគារពិភពលោក ឧស្សាហកម្មកាត់ដេរសកល បង្កើតឧស្ម័នពុលដល់ទៅ ១០% នៃទំហំឧស្ម័នកាបូនសរុបជុំវិញពិភពលោកប្រចាំឆ្នាំ។ ដោយឡែក សម្រាប់កម្ពុជា Global Green Growth Institute […]
អានបន្ថែម
កម្ពុជាបន្តស៊ើបករណីប្រាសាទស្រដៀងអង្គរវត្តនៅថៃ គ្រោងបញ្ជូនបុរាណវិទ្យាទៅពិនិត្យឆាប់ៗ
ក្រសួងវប្បធម៌ និងវិចិត្រសិល្បៈ នៅតែបន្តស៊េីបអង្កេតករណីរឿងប្រាសាទស្រដៀងអង្គរវត្តនៅប្រទេសថៃ ដោយគ្រោងនឹងបញ្ជូនមន្រ្តីជំនាញផ្នែកបុរាណវិទ្យាទៅពិនិត្យ និងវាយតម្លៃលើទីតាំងជាក់ស្ដែងឆាប់ៗ ក្រោយកូវីដស្ងប់ស្ងាត់។ នេះបើយោងតាមសារព័ត៌មានខ្មែរថាមស៍កាលពីថ្ងៃទី ២៥ សីហា ឯកឧត្តម ហាប់ ទូច រដ្ឋលេខាធិការក្រសួងវប្បធម៌ និងវិចិត្រសិល្បៈបានបញ្ជាក់ថា ក្រសួងនឹងបញ្ជូនមន្ត្រីទៅឆាប់ៗ តែការធ្វើដំណើរនេះពេលជួបការលំបាកព្រោះវិបត្តិ កូវីដ១៩។ «ក្រសួងវប្បធម៌និងវិចិត្រសិល្បៈ មិននៅស្ងៀមទេ។ ក្រសួងក៏កំពុងធ្វើការជាមួយមន្ត្រីកម្ពុជានៅស្រុកស្រះកែវ និងស្ថានទូតកម្ពុជានៅទីក្រុងបាងកក ដូច្នេះយើងអាចបន្តកិច្ចសហប្រតិបត្តិការ និងបញ្ចប់គម្រោងនេះបាន» ឯកឧត្តម បានបន្ត។ ជាក់ស្ដែង កាលពីដើមខែសីហា រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកជំទាវ ភឿង សកុណា ក៏បានជួបនឹងឯកឧត្តម Panyarak Poolthup ឯកអគ្គរាជទូតនៃព្រះរាជាណាចក្រថៃប្រចាំកម្ពុជា ដើម្បីពិភាក្សាលើរឿងនេះផងដែរ ដោយបានស្នើផ្ទាល់ទៅអគ្គរាជទូតឱ្យជួយផ្តល់ព័ត៌មានជាក់លាក់ និងឯកសារប្លង់ផ្លូវការបន្ថែម។ (អានបន្ថែម) គួររំឭកថា រឿងនេះបានផ្ទុះក្នុងបណ្ដាញសង្គមតាំងពីចុងខែមិថុនា មកម្ល៉េះ ដោយភាគីថៃធ្លាប់អះអាងថា ការកសាងប្រាសាទនៅខេត្តបុរីរាំ មិនបានលួចចម្លងប្លង់តាមប្រាសាទអង្គរវត្តឡើយ តែជាគំរូប្លង់គូរដោយខ្លួនឯង និងរចនាទៅតាមស្ថាបត្យកម្មប្រាសាទមួយចំនួនដែលមានក្នុងតំបន់នោះ។ នេះបើយោងតាមព័ត៌មានបឋមដែលមន្រ្តីស្ថានទូតកម្ពុជាប្រចាំនៅទីក្រុងបាងកក ទទួលបានក្នុងកិច្ចចុះស្រាវជ្រាវប្រមូលព័ត៌មានពាក់ព័ន្ធ។ (អានបន្ថែម)
អានបន្ថែម
ទីលានចាក់សំរាមស្ដង់ដាថ្មីមួយទំហំ ១០ ហិកតា គ្រោងសាងសង់នៅខេត្តកំពង់ចាម
ខេត្តកំពង់ចាម នឹងមានទីលានសម្រាប់ចាក់សំរាមស្ដង់ដារដ៏ធំមួយ លើផ្ទៃដីទំហំប្រមាណជា ១០ហិកតា ខណៈបច្ចុប្បន្នអាជ្ញាធរខេត្តកំពុងចុះសិក្សាកំណត់យកទីតាំងក្នុងស្រុកកំពង់សៀម ដើម្បីត្រៀមសាងសង់។ នេះបើតាមការឱ្យដឹងពីឯកឧត្តម អ៊ុន ចាន់ដា អភិបាលខេត្តកំពង់ចាម ក្នុងពេលចុះពិនិត្យទីតាំងផ្ទាល់ ស្ថិតនៅភូមិកោះរកាក្នុង ឃុំកោះរការ ស្រុកកំពង់សៀម កាលថ្ងៃទី២៥ ខែសីហា កន្លងទៅ។ ឯកឧត្តម អ៊ុន ចាន់ដា បានឱ្យដឹងថា តាមរយៈការពិនិត្យ និងចុះសិក្សាដំបូង ក្រុមការងារពិចារណាទីតាំងពីរកន្លែង ដោយទី១ ស្ថិតនៅក្នុងស្រុកកងមាស និងទី២ ស្ថិតក្នុងស្រុកកំពង់សៀម។ ប៉ុន្តែក្រោយពិនិត្យលម្អិត ទីតាំងនៅស្រុកកំពង់សៀម គឺជាដីរដ្ឋស្រាប់ ហើយជាដីទួលទំនេរ ទំហំប្រមាណជាង១០ហិកតា ដែលត្រូវស្តង់ដាររបស់ក្រសួងបរិស្ថានសម្រាប់សង់ទីលានចាក់សំរាម។ លើសពីនេះ ផ្អែកតាមការសិក្សាជាក់ស្ដែង ទីតាំងនោះ មានចម្ងាយឆ្ងាយពីលំនៅឋានរបស់ប្រជាពលរដ្ឋ ដែលមិនធ្វើឱ្យរងផលប៉ះពាល់បរិស្ថាន នោះឡើយ។ គួរបញ្ជាក់ដែរថា ខេត្តកំពង់ចាមមិនទាន់មានទីលានចាក់សម្រាមស្តង់ដារនោះទេ ដោយបច្ចុប្បន្ននេះគឺប្រើប្រាស់ទីលានចាស់របស់ក្រុមហ៊ុនស៊ីនទ្រី ស្ថិតក្នុងឃុំបូសខ្នុរ ស្រុកចំការលើ។ ហេតុនេះ ដើម្បីដោះស្រាយការកើនឡើងនៃសំរាមរបស់ខេត្តទាំងមូល គឺតម្រូវឱ្យរកទីតាំងថ្មីដើម្បីបន្ថែមសមត្ថភាពគ្រប់គ្រងសំរាម៕
អានបន្ថែម
តើត្រូវសង់សំណង់ចំងាយប៉ុន្មានពីមាត់ច្រាំង ឬឆ្នេរ ទើបស្របច្បាប់?
ដីជាប់មាត់ច្រាំង ឬឆ្នេរ ជាទីតាំងមានសក្តានុពលមួយក្នុងការសាងសង់អគារ ឬប្រកបអាជីវកម្មផ្សេងៗ។ ប៉ុន្តែ ការកាន់កាប់ដីនៅតំបន់ទាំងនោះ សង្កេតឃើញថាមានវិវាទជាញឹកញាប់ ពីព្រោះពេលខ្លះ ជាដីចំណីរបស់រដ្ឋ។ តើត្រូវសង់សំណង់ចំងាយប៉ុន្មានពីមាត់ច្រាំង ឬឆ្នេរ ទើបស្របច្បាប់? តាមអនុក្រឹត្យលេខ៩៨ អនក្រ.បក ចុះថ្ងៃទី២៤ ខែកក្កដា ឆ្នាំ២០១៥ ការកាន់កាប់ដីដែលជាប់តំបន់ច្រាំង ឬឆ្នេរ មិនខុសច្បាប់ទេ ប៉ុន្តែត្រូវកាន់កាប់ស្ថិតលើរយៈចម្ងាយតាមច្បាប់ដែលបានចែងដូចខាងក្រោម៖ -ឆ្នេរ និងពាមសមុទ្រ៖ ចម្ងាយលើសពី១០០ ម៉ែត្រ គិតពីមាត់ឆ្នេរ និងមាត់ពាម (ពេលទឹកជោរអតិបរមា) -ទន្លេ៖ ចម្ងាយលើសពី៥០ ម៉ែត្រ គិតពីមាត់ច្រាំងទន្លេ -ស្ទឹង៖ ចម្ងាយលើសពី៣០ ម៉ែត្រ គិតពីមាត់ច្រាំងស្ទឹង -ព្រែក៖ ចម្ងាយលើសពី២០ ម៉ែត្រ គិតពីមាត់ច្រាំងព្រែក -អូរ៖ ចម្ងាយលើសពី១០ ម៉ែត្រ គិតពីមាត់ច្រាំងអូរ -ប្រឡាយមេ៖ ចម្ងាយលើសពី១០ ម៉ែត្រ គិតពីជើងទេរភ្លឺប្រឡាយផ្នែកខាងក្រៅ -ប្រឡាយរង៖ ចម្ងាយលើសពី៥ ម៉ែត្រ គិតពីជើងទេរភ្លឺប្រឡាយផ្នែកខាងក្រៅ -ប្រឡាយស្រោចស្រព៖ ចម្ងាយលើសពី៣ ម៉ែត្រ […]
អានបន្ថែម
រោងចក្រប្រព្រឹត្តកម្មទឹកស្អាតតម្លៃ ១៩០លានដុល្លារ នៅបាក់ខែង សាងសង់បានជិត ៤០% ហើយ
គិតមកដល់បច្ចុប្បន្ននេះ ដំណើរការសាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី១ សម្រេចលទ្ធផលបានប្រមាណ ៣៨% ហើយ។ នេះបើយោងតាមការជូនដំណឹងរបស់រដ្ឋាករទឹកស្វយ័តក្រុងភ្នំពេញ កាលពីថ្ងៃទី២៦ ខែ សីហា ឆ្នាំ២០២១។ ក្នុងចំណោមការងារទាំងអស់ ការងារសាងសង់រោងចក្រប្រព្រឹត្តកម្មទឹកស្អាតអនុវត្តបាន ១០% ការងារសាងសង់ស្ថាននីយបូមទឹកល្អក់អនុវត្តបាន១៥% ការងារដាក់បំពង់មេនាំទឹកស្អាតបាន ៥៣% និងការងារខួងឆ្លងទន្លេសាបដើម្បីដាក់បំពង់មេនាំទឹកស្អាត ២០០០មម បាន ៣០%។ រោងចក្រនេះ ជាការសាងសង់ដ៏ធំមួយដែលមិនធ្លាប់មានពីមុនមកនៅកម្ពុជា និងមាន ពីរជំហាន។ ជំហានទី ១ គ្រោងនឹងបញ្ចាប់នៅចុងឆ្នាំ ២០២២ ឬដើម២០២៣ ដោយនឹងអាចផលិតទឹកបានជិត ២០ម៉ឺនម៉ែត្រគូបក្នុងមួយថ្ងៃ ខណៈជំហានទី២ នឹងពង្រីកសមត្ថភាពដល់ទៅជិត ៤០ម៉ឺនម៉ែត្រគូបក្នុងមួយថ្ងៃ នៅដើមឆ្នាំ២០២៤។ គម្រោងកំពុងសាងសង់ដោយក្រុមហ៊ុនសាងសង់ VINCI Construction Grands Projects និងត្រួតពិនិត្យបច្ចេកទេសដោយក្រុមហ៊ុន SAFEGE Consulting Engineers ក្រោមហិរញ្ញប្បទាន ១៩០លានដុល្លារ របស់ទីភ្នាក់ងារបារំាងសម្រាប់ការអភិវឌ្ឍន៍ (AFD) និងធនាគារវិនិយោគអឺរ៉ុប ។ រោងចក្រនេះ បានបើកការដ្ឋានសាងសង់កាលថ្ងៃទី ១ ខែកុម្ភៈ ឆ្នាំ២០២១ […]
អានបន្ថែម
សាលាក្រុងសហការជាមួយសមាគមលំនៅឋានបង្កាមិនឱ្យកូវីដប៉ះពាល់ធ្ងន់ដល់ការដ្ឋានសំណង់
រដ្ឋបាលរាជធានីភ្នំពេញ បានបើកកិច្ចប្រជុំជាមួយ សមាគមអ្នកអភិវឌ្ឍន៍លំនៅឋានកម្ពុជា និងម្ចាស់បុរីទាំងអស់ ផ្តោតបង្កើនវិធានការណ៍ការពារនានា ទិសដៅបង្ការមិនឱ្យជំងឺកូវីដ១៩ ឆ្លងចូលការដ្ឋានសំណង់គ្រប់ប្រភេទក្នុងរាជធានីភ្នំពេញ ដែលជាហេតុនាំឱ្យរាំងស្ទះគម្រោង។ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានឱ្យដឹងក្នុងកិច្ចប្រជុំកាលពីថ្ងៃទី ២៥ ខែសីហា ថា ទោះមានវិបត្តិកូវីដ រដ្ឋបាលរាជធានីភ្នំពេញតែងតែយកចិត្តទុកដាក់ដើម្បីធ្វើយ៉ាងណាឱ្យវិស័យនេះនៅតែដំណើរការទៅមុខ ព្រោះជាវិស័យមួយនៃវិស័យស្នូលជំរុញសេដ្ឋកិច្ច។ ដូច្នេះ វិស័យឯកជន និងអាជ្ញាធររាជធានីភ្នំពេញ ត្រូវសហការគ្នាបន្ថែមទៀតដើម្បីពង្រឹងវិធានសុខភាព ទប់ស្កាត់ជំងឺដ៏កាចសាហាវនេះឱ្យបាន។ អ្នកឧកញ៉ា លី ហួរ ប្រធានសមាគមន៍អ្នកអភិវឌ្ឍន៍លំនៅឋាននៅកម្ពុជា ក៏សម្ដែងសុទិដ្ឋិនិយមថា ជាមួយនឹងវិធានការណ៍តឹងរឹងនេះ វិស័យសំណង់នឹងត្រឡប់មកមានស្ថិរភាពឆាប់ៗ ស្របនឹងកំណើនសេដ្ឋកិច្ច។ គួរបញ្ជាក់ថា កាលពីចុងខែ កក្កដា កន្លងទៅ រដ្ឋបាលរាជធានីភ្នំពេញ ក៏បានចេញសេចក្ដីណែនាំថ្មី ១៤ ចំណុច ដល់ម្ចាស់ការដ្ឋានសំណង់នៅភ្នំពេញទាំងអស់ ឱ្យរឹតបន្តឹងការអនុវត្តវិធានការបង្ការ និងទប់ស្កាត់ជំងឺកូវីដ១៩ ឱ្យម៉ឺងម៉ាត់ជាងមុន ដើម្បីធានាឱ្យបាននូវសុវត្ថិភាពរបស់បុគ្គលិក និងកម្មករ។ (អានបន្ថែម)
អានបន្ថែម
ឥណ្ឌូនេស៊ីស្ទាក់កប៉ាល់ដឹកប្រេងរត់ពីកម្ពុជាបានហើយ កម្ពុជាកំពុងស្នើឱ្យជួយបញ្ជូនមកវិញ
ក្រសួងរ៉ែ និងថាមពល កំពុងស្ថិតក្នុងការពិភាក្សាជាមួយភាគីឥណ្ឌូនេស៊ី ឱ្យជួយសម្របសម្រួល បញ្ជូនប្រេងឆៅ១ កប៉ាល់ ដែលត្រូវបានដឹកចេញស្ងាត់ៗ ពីប្រទេសកម្ពុជាកាលពីខែមិថុនា ត្រលប់មកវិញ។ ការពិភាក្សានេះ ធ្វើឡើងបន្ទាប់ពីអាជ្ញាធរឥណ្ឌូនេស៊ីបានឃាត់ចាប់កប៉ាល់ផ្ទុកប្រេងបរិមាណជិត ៣០ម៉ឺនប៉ារ៉ែល និងនាវិកជាង១០នាក់ កាលពីថ្ងៃទី២៥ ខែសីហា កន្លងទៅ។ ការស្ទាក់ចាប់របស់ឥណ្ឌូនេស៊ីនេះទៀតសោត ធ្វើឡើងបន្ទាប់ពីរដ្ឋាភិបាលកម្ពុជា បានចេញសេចក្ដីប្រកាសពណ៌ក្រហមមួយទៅកាន់ប៉ូលីសព្រហ្មទណ្ឌអន្តរជាតិ ស្នើសុំកិច្ចសហការក្នុងការរឹបអូសនាវាដែលបានដឹកប្រេងឆៅស្ងាត់ៗចេញពីកម្ពុជា។ បើតាមបណ្តាញផ្សព្វផ្សាយក្នុងស្រុកនៃប្រទេសឥណ្ឌូនេស៊ី ចុះកាលពីថ្ងៃទី២៥ ខែសីហា កប៉ាល់ដឹកប្រេងនេះ មានឈ្មោះថា MT Strovolos ដែលមានដោតទង់ជាតិបាហាម៉ា បានធ្វើដំណើរចេញពីឆ្នេរសមុទ្រស៊ូម៉ាត្រា កាលពីថ្ងៃទី២៧ ខែកក្កដា។ នាវានេះមានប្រវែង ១៨៣ម៉ែត្រ និងមានទិសដៅធ្វើដំណើរចេញពីប្រទេសថៃទៅកាន់កោះបាថាម នៃប្រទេសឥណ្ឌូនេស៊ី ។ ជុំវិញរឿងនេះ ឯកឧត្តម ជៀប សួរ អគ្គនាយកនៃអគ្គនាយកដ្ឋានប្រេងកាត នៃក្រសួងរ៉ែ និងថាមពល បានបញ្ជាក់ថា៖ «បច្ចុប្បន្ននេះ កម្ពុជា និងឥណ្ឌូនេស៊ី កំពុងសហការ ដើម្បីបញ្ជូនប្រេងលើនាវាទាំងនោះ មកឱ្យកម្ពុជាវិញ»។ គួរបញ្ជាក់ថា ប្រេងឆៅជិត ៣០ម៉ឺនបារ៉ែល គឺជាប្រេងដែលក្រុមហ៊ុន KrisEnergy […]
អានបន្ថែម
ខេត្តកំពតកំពុងពន្លឿនគម្រោងអភិវឌ្ឍន៍តំបន់ទេសចរបៃតងថ្មីជាប់មាត់ព្រែកត្រើយកោះ
មិនយូរទេ មាត់ព្រែកត្រើយកោះ ស្ថិតក្នុងភូមិទ្វីខាងត្បូង ខេត្តកំពត នឹងត្រូវប្ដូរមុខមាត់ថ្មីក្លាយទៅជាកន្លែងទាក់ទាញទេសចរណ៍ដ៏សំខាន់របស់ខេត្តកំពត ខណៈបច្ចុប្បន្នអាជ្ញាធរកំពុងពន្លឿនសិក្សាគម្រោងអភិវឌ្ឍន៍ទីតាំងនេះ។ នេះបើយោងតាមអភិបាលខេត្តកំពត ឯកឧត្តម ជាវ តាយ ក្នុងពេលចុះពិនិត្យទីតាំងគម្រោងអភិវឌ្ឍន៍តំបន់បៃតង និងលទ្ធផលសំណង់ស្ពានត្រើយកោះ កាលថ្ងៃទី២៥ ខែសីហា ឆ្នាំ២០២១។ ឯកឧត្តម ជាវ តាយ បានឱ្យដឹងថា តំបន់ជាប់មាត់ព្រែកត្រើយកោះ ដែលស្ថិតក្នុងភូមិទ្វីខាងត្បូង សង្កាត់អណ្ដូងខ្មែរ ក្រុងកំពត មានទេសភាពស្អាត និងមានសក្ដានុពលទេសចរណ៍ខ្ពស់។ ដូច្នេះ ក្រុមការងារកំពុងសិក្សាបន្ថែមហេដ្ឋារចនាសម្ព័ន្ធ ធ្វើឱ្យតំបន់នេះក្លាយជាទីកម្សាន្តលំហែកាយគំរូមួយ។ តាមផែនការ ទីតាំងនេះនឹងត្រូវរៀបចំជាតំបន់បៃតង សួនកំសាន្ត កន្លែងហាត់ប្រាណ ជាមួយនឹងការសាងសង់ផ្លូវខ្វាត់ខ្វែង ផងដែរ។ នាឱកាសនេះ ឯកឧត្តមក៏បានជំរុញពន្លឿនដំណើរការសាងសង់ស្ពានបេតុងត្រើយកោះ ដែលជាអំណោយរបស់សម្ដេចតេជោ ហ៊ុន សែន ឱ្យចប់នៅចុងឆ្នាំ ២០២១ នេះ។ ដោយឡែក ពលរដ្ឋចំនួន ១៣ គ្រួសារ ដែលកំពុងរស់នៅលើដីចំណីព្រែកត្រើយកោះ អ្នកជំនាញកំពុងសិក្សាដើម្បីផ្ដល់ជូនប័ណ្ណកម្មសិទ្ធិឱ្យបានឆាប់ៗផងដែរ ។
អានបន្ថែម
រដ្ឋជ្រើសខេត្តបាត់ដំបង និងសៀមរាបជាទីតាំងសង់មន្ទីរពិសោធន៍ថ្នាក់តំបន់ពិនិត្យសំណាកកូវីដ
ក្រសួងសុខាភិបាល បានសម្រេចជ្រើសរើសមន្ទីរពេទ្យបង្អែកខេត្តបាត់ដំបង និងខេត្តសៀមរាប ជាទីតាំងសង់មន្ទីរពិសោធន៍ថ្នាក់តំបន់សម្រាប់ពិនិត្យសំណាកអ្នកជំងឺកូវីដ១៩ សម្រាប់ខេត្តតំបន់ភាគពាយ័ព្យ និងខាងលិចនៃប្រទេស។ ការសាងសង់មន្ទីរពិនិត្យសំណាកថ្មីនៅខេត្តបាត់ដំបង ទើបតែត្រូវបានបញ្ចប់ ដោយគ្រោងនឹងបើកដំណើរការ នៅដើមខែកញ្ញានេះ។ ឯកឧត្តម ម៉ម ប៊ុនហេង រដ្ឋមន្រ្តីក្រសួងសុខាភិបាល លើកឡើងថា កន្លែងធ្វើសំណាកខេត្តបាត់ដំបង នឹងបម្រើដល់ការតេស្តលើសំណាក ដែលយកមកពីខេត្តបាត់ដំបង ពោធ៍សាត់ ប៉ៃលិន ដោយមិនចាំបាច់បញ្ជូនសំណាកទៅទីក្រុងភ្នំពេញ។ លើសពីនេះ មន្ទីរពិសោធន៍ថ្នាក់តំបន់នៅខេត្តសៀមរាប គឺសម្រាប់ការពិនិត្យសំណាកកូវីដ១៩ មកពីខេត្តកំពង់ធំ ព្រះវិហារ និងឧត្តរមានជ័យជាដើម។
អានបន្ថែម
វិហារគ្រីស្ទានកំពូល ៥ ប្លែកថ្មី ដំបូងបង្អស់នៅកម្ពុជា នឹងបើកការដ្ឋាន នៅខែកញ្ញា នេះ
វិហារគ្រីស្ទាន Latter-Day Saints នឹងបើកការដ្ឋានសាងសង់នៅថ្ងៃទី១៨ ខែកញ្ញានេះ នៅរាជធានីភ្នំពេញ ក្រោយប្រកាសផែនការចង់សាងសង់តាំងពីឆ្នាំ ២០១៨ មកម្ល៉េះ។ នេះបើយោងតាមសេចក្តីប្រកាសព័ត៌មានរបស់ព្រះវិហារកាលពីថ្មីៗនេះ។ វិហារគ្រីស្ទាន Latter-Day Saints ជាព្រះវិហារប្លែកថ្មីមិនធ្លាប់មានពីមុនមកនៅកម្ពុជា ដែលនឹងសាងសង់ជាវិហារជញ្ជាំងពណ៌ស រាងការ៉េ និងមានស្តូបចំនួន ៥ នៅផ្នែកខាងលើ។ គម្រោងនេះនឹងមាន ផ្ទៃក្រឡាអគារសរុបជាង ៩០០ ម៉ែត្រក្រឡា ដែលសាងសង់លើផ្ទៃដីសរុបជាង ១២ ០០០ម៉ែត្រក្រឡា។ តាមផែនការ គម្រោងមានទីតាំងស្ថិតនៅតាមបណ្តាយផ្លូវសហព័ន្ធរុស្ស៊ី ពោលគឺស្ថិតនៅចន្លោះរវាងវិទ្យាស្ថានបច្ចេកទេស និងវិទ្យាស្ថានភាសាបរទេស នៅជិតសកលវិទ្យាល័យភូមិន្ទភ្នំពេញ។ រូបភាពពី៖ deseret
អានបន្ថែម
ការដោះស្រាយផលប៉ះពាល់ដីធ្លីនៅព្រលានយន្តហោះភ្នំពេញថ្មីនៅមិនទាន់ចប់ សល់ ១១ក្បាលដី មិនព្រមចេញ
ក្រុមហ៊ុនអ្នកអភិវឌ្ឍព្រលានយន្តហោះភ្នំពេញថ្មី Cambodia Airport Investment Co Ltd (CAIC) កាលពីព្រឹកថ្ងៃទី ២៥ ខែសីហា បានប្រគល់ប្លង់កម្មសិទ្ធិដីនៅទីតាំងថ្មី ដល់ពលរដ្ឋ ១៦នាក់ ឬស្មើនឹង៣១ក្បាលដី ដែលធ្លាប់មានផ្ទះនៅក្នុងទីតាំងសាងសង់ព្រលានថ្មីនេះ។ ពិធីប្រគល់ប្លង់ដីនេះធ្វើឡើង ក្រោមវត្តមានរបស់ឯកឧត្តម គង់ សោភ័ណ្ឌ អភិបាលខេត្តកណ្តាល និងលោកឧកញ៉ា ឆារស៍ វ៉ាន់ អគ្គនាយករងក្រុមហ៊ុន CAIC។ ឯកឧត្តម គង់ សោភ័ណ្ឌ បានលើកឡើងថា គម្រោងសាងសង់អាកាសយានដ្ឋានអន្តរជាតិភ្នំពេញ ត្រូវការដីទំហំ ២៦០០ហិកតា ខណៈការដោះស្រាយផលប៉ះពាល់ដល់អ្នកដែលធ្លាប់រស់នៅទីតាំងនោះ ត្រូវបាន និងកំពុងធ្វើឡើងជាបន្តបន្ទាប់។ ជាក់ស្ដែង កាលពីខែឧសភា កន្លងទៅ ពលរដ្ឋសរុបចំនួន ១៧១គ្រួសារ ដែលធ្លាប់មានផ្ទះនៅក្នុងទីតាំងគម្រោងសាងសង់ព្រលានយន្តហោះភ្នំពេញថ្មី ទទួលបានលំនៅឋានថ្មី នៅទីតាំងថ្មី ជាផ្លូវការហើយ។ (អានបន្ថែម) បច្ចុប្បន្ននេះ នៅមានប្រជាពលរដ្ឋ ១១ ក្បាលដីទៀត ដែលមិនទាន់យល់ព្រម ទទួលយកការដូរដី ឬការលក់ដីជូនក្រុមហ៊ុន។ ហេតុនេះ ឯកឧត្តមបានស្នើបងប្អូនដែលមានក្បាលដីក្នុងទីតាំងព្រលាន សូមចូលរួមជាមួយរដ្ឋាភិបាល […]
អានបន្ថែម