Big C គ្រោងពង្រីកសាខាបន្ថែមទៀតនៅភ្នំពេញ និងខេត្តធំៗ២ផ្សេងទៀតនៅ៥ឆ្នាំខាងមុខ

• 13 ខែ​កញ្ញា 2021
• ព័ត៌មានអចលនទ្រព្យ
• 13 មើល

ផ្សារទំនើប Big C គ្រោងនឹងពង្រីកសាខារាប់រយបន្ថែមទៀត នៅរាជធានីភ្នំពេញ បាត់ដំបង សៀមរាប និងខេត្តក្រុងសំខាន់ៗដទៃ ក្នុងរយៈពេល ៥ ឆ្នាំខាងមុខនេះ។ គម្រោងពង្រីកសាខារាប់រយបន្ថែមនេះ ធ្វើឡើងបន្ទាប់ពីក្រុមហ៊ុន Big C បានបើកដំណើរការ Mini Big C នៅរាជធានីភ្នំពេញ កាលពីដើមខែកញ្ញា។

លោក Gary Hardy នាយកប្រតិបត្តិការ នៃ Big C លើកឡើងថា Big C មានបំណងចង់ក្លាយជាផ្សារទំនើបលក់រាយឈានមុខគេនៅកម្ពុជា ទាំងតម្លៃ ទំហំ និង ការគាំទ្រពីអតិថិជនកម្ពុជា។ នេះបើយោងតាមកាសែត Bangkok Post ចេញផ្សាយកាលពីថ្ងៃទី១១ ខែកញ្ញា។

លោក Gary Hardy លើកឡើងថា ក្រុមហ៊ុន គ្រោងនឹងបើកហាង Big C រាប់រយ ដែលមានទំហំ ខុសៗគ្នា ទាំងផ្សារទំនើបខ្នាតធំ ផ្សារទំនើបធម្មតា និង Mini Big C នៅក្នុងទីក្រុងភ្នំពេញ និងទីក្រុងធំៗ ផ្សេងទៀត ដូចជា សៀមរាប និងបាត់ដំបងជាដើម។

ជុំវិញផែនការពង្រីកសាខានេះ Big C មិនទាន់មានគម្រោងលក់សិទ្ធ Franchise នៅឡើយទេ។

គួរបញ្ជាក់ថា ផលិតផលដាក់លក់នៅផ្សារ Big C ៨០% នាំចូលពីប្រទេសថៃ និង២០% គឺជាផលិតផលក្នុងស្រុក។

ក្រៅពី Big C ក្រុមហ៊ុនផ្សារលក់រាយល្បីៗរបស់ថៃ ដូចជា Makro និង 7 Eleven ក៏បានឈានចូលទីផ្សារកម្ពុជារួចហើយផងដែរ៕

• ធុរកិច្ច និងទីផ្សារ
• ធុរកិច្ច និងទីផ្សារ