CBRE៖ ដីភាគខាងត្បូងភ្នំពេញនឹងបន្តឡើងថ្លៃ បច្ចុប្បន្ននៅចន្លោះពី១០០-២២០០ ដុល្លារ/ការ៉េ

• 13 ខែ​សីហា 2021
• ព័ត៌មានអចលនទ្រព្យ
• 8 មើល

CBRE Cambodia បានព្យាករថា តម្លៃដីនៅភាគខាងត្បូងភ្នំពេញនឹងមាននិន្នការឡើងថ្លៃជាបន្តបន្ទាប់ ខណៈតម្លៃដីក្នុងតំបន់នេះចាប់ផ្តើមឡើងថ្លៃតាំងពីឆ្នាំ ២០១១ មកម្ល៉េះ បន្ទាប់ពីរដ្ឋាភិបាលប្រកាសគម្រោងកសាងមហាវិថីសម្តេចតេជោ និងក្រោយមកគម្រោងព្រលានយន្តហោះ។

យោងតាមរបាយការណ៍របស់ CBRE ចេញផ្សាយកាលពីថ្ងទី ១២ សីហា កន្លងទៅនេះ នៅតំបន់សងខាងមហាវិថីសម្តេចតេជោ តម្លៃដីខ្ពស់បំផុតកើនដល់ប្រមាណ ២២០០ ដុល្លារ ក្នុងមួយម៉ែត្រការ៉េ ក្នុងឆ្នាំ២០២១ នេះ ដែលកើនឡើងជាង ១១ដង បើធៀបនឹងតម្លៃត្រឹម ២០០ ដុល្លារ កាលពីឆ្នាំ២០១៣។

ដោយឡែក សម្រាប់តម្លៃអចលនទ្រព្យប្រភេទលំនៅឋានវិញ នៅតំបន់ផ្លូវមហាវិថីសម្តេចតេជោ មានតម្លៃចាប់ពី ៥០០ដុល្លារ ក្នុងមួយការ៉េ ទៅ ២០០០ ដុល្លារ ក្នុងមួយម៉ែត្រការ៉េ។

យ៉ាងណាមិញ សម្រាប់តម្លៃដីក្នុងតំបន់ក្នុងខណ្ឌដង្កោ ជាទូទៅ មានចាប់ពី ៨០ដុល្លារ ដល់ ២៨០ដុល្លារ ក្នុងមួយម៉ែត្រការ៉េ ខណៈដីនៅក្រុងតាខ្មៅមានតម្លៃចាប់ពី ៥០០ដុល្លារ ទៅ ២០០០ ដុល្លារក្នុងមួយការ៉េ។

សម្រាប់តម្លៃអចលនទ្រព្យឧស្សាហកម្មវិញ ថ្លៃចាប់ពី ៥០ដុល្លារ ទៅ១០០ដុល្លារ ក្នុងមួយម៉ែត្រការ៉េ សម្រាប់តំបន់នៅក្បែរគម្រោងអាកាសយានដ្ឋានភ្នំពេញថ្មី និង ៨០ដុល្លារ ទៅ ២៤០ដុល្លារ នៅក្បែរផ្លូវក្រវាត់ក្រុងទី៣ ត្រង់ចំណុចផ្លូវជាតិលេខ២។

គួរបញ្ជាក់ថា ភ្នាក់ងារអចលនទ្រព្យអន្តរជាតិនេះក៏ព្យាករថា ទីតាំងភាគត្បូងនេះរួមមាន ខណ្ឌដង្កោ និងខណ្ឌមានជ័យនៃរាជធានីភ្នំពេញ ក៏ដូចជាក្រុងតាខ្មៅ ស្រុកកណ្តាលស្ទឹង និងស្រុកស្អាង នៃខេត្តកណ្តាល នឹងក្លាយទៅជាច្រករបៀងសេដ្ឋកិច្ចថ្មីរបស់ប្រទេសកម្ពុជានៅពេលអនាគត ដែលរួមផ្ដុំទៅដោយគម្រោងលំនៅឋាន ពាណិជ្ជកម្ម និងឧស្សាហកម្ម។

ភាពរីកចម្រើននេះ គឺជំរុញការវិនិយោគលើហេដ្ឋារចនាសម្ព័ន្ធយ៉ាងសន្ធឹកសន្ធាប់ ឬស្មើនឹងទឹកប្រាក់សរុបប្រមាណយ៉ាងហោច ២,២ ពាន់លានដុល្លារ។ (អានបន្ថែម)

• អត្ថបទវិភាគ
• អត្ថបទវិភាគ