CDC អនុម័តគម្រោងអភិវឌ្ឍន៍ធំៗ ៣ កន្លែងតម្លៃជាង១៦០លានដុល្លារ

• 4 ខែ​មេសា 2020
• Uncategorized @km
• 14 មើល

កាលពីពេលថ្មីៗនេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តលើគម្រោងវិនិយោគ ជូនដល់ក្រុមហ៊ុនចំនួន ៣ កន្លែងនៅក្នុងទំហំទឹកប្រាក់វិនិយោគទុនប្រមាណជាង ១៦០ លានដុល្លារ សាងសង់រោងចក្រ មន្ទីរពេទ្យ និងសណ្ឋាគារផ្កាយ៣ ក្នុងរាជធានីភ្នំពេញ និងខេត្តព្រះសីហនុ។

គម្រោងទី១ គឺការវិនិយោគប្រមាណ ៧,៧ លានដុល្លារអាមេរិក ក្នុងការសាងសង់រោងចក្រផលិត និងផ្គុំដំឡើងបន្ទះសូឡា ដែលមានទីតាំងវិនិយោគស្ថិតនៅភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ដោយក្រុមហ៊ុន JINTEK CELLS TECHNOLOGY CO., LTD  និងអាចបង្កើតការងារបានចំនួន ៣៤៨កន្លែង។

គម្រោងទី២ គឺការវិនិយោគប្រមាណ ៥៩,២ លានដុល្លារអាមេរិក ក្នុងការសាងសង់ និងអាជីវកម្មសណ្ឋាគារថ្នាក់ផ្កាយ៣ ចំនួន៧១០បន្ទប់ ដែលមានទីតាំងវិនិយោគស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ ដោយក្រុមហ៊ុន XIGANGYIHAO INTERNATIONAL INVESTMENT CO., LTD និងអាចបង្កើតការងារបានចំនួន ៦៦០កន្លែង។​

ចំណែកឯ គម្រោងទី៣ គឺគម្រោងសាងសង់ និងអាជីវកម្មមន្ទីរពហុព្យាបាលជម្ងឺ ចំនួន ៥០ គ្រែ ក្នុងទឹកប្រាក់ប្រមាណ៩៦,១លានដុល្លារអាមេរិក ដែលមានទីតាំងវិនិយោគស្ថិតនៅផ្ទះលេខ៥ ផ្លូវលេខ៨១ ភូមិ១០ សង្កាត់បឹងរាំង ខណ្ឌដូនពេញ រាជធានីភ្នំពេញ ដោយក្រុមហ៊ុន SING-SPECIALISTS MEDICAL CENTRE CO., LTD និងអាចបង្កើតការងារបានចំនួន ៤៣៣ កន្លែង។

កាលពីកុម្ភៈកន្លងទៅនេះ ក្រុមប្រឹក្សាអភិវឌ្ឍន៍កម្ពុជា ឬ CDC ទើបតែបានអនុម័តគម្រោងសាងសង់សណ្ឋាគារលំដាប់ផ្កាយ៥ និងមជ្ឈមណ្ឌលពាណិជ្ជកម្ម តម្លៃប្រមាណ ៦១,៣លានដុល្លារអាមេរិកថ្មីមួយកន្លែងនៅខេត្តព្រះសីហនុផងដែរ។ (អានបន្ថែម)

ដោយឡែក ចំពោះសេវាកម្មមន្ទីរពេទ្យវិញ កាលពីថ្មីៗនេះ មន្ទីរពេទ្យលំដាប់ពិភពលោកThe Prestige Hospital តម្លៃប្រមាណ៧ លានដុល្លារបានប្រកាសបើកដំណើរការ កាលពីទី៣០ ខែមីនា ឆ្នាំ២០២០ ដើម្បីផ្តល់នូវសេវាកម្មថែទាំសុខភាព និងព្យាបាលដល់ពលរដ្ឋកម្ពុជាតាមស្តង់ដារអន្តរជាតិ។ មន្ទីរពេទ្យ The Prestige Hospital នេះមានទីតាំងស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ មានគ្រែសម្រាកព្យាបាលចំនួន ១០០គ្រែ៕ (អានបន្ថែម)

• គម្រោងអភិវឌ្ឍន៍
• Projects Development
• គម្រោងអភិវឌ្ឍន៍