រដ្ឋអនុម័តឱ្យសង់ស្ថានីយទឹកកខ្វក់ទី ៣ នៅខេត្តព្រះសីហនុហើយ គ្រោងចំណាយ២០លានដុល្លារ

រដ្ឋាភិបាលកម្ពុជា សម្រេចអនុម័តជាផ្លូវការហើយ លើគម្រោងសាងសង់ស្ថានីយប្រព្រឹត្តកម្មទឹកកខ្វក់ទី៣ នៅខេត្តព្រះសីហនុ ដោយការដ្ឋានគ្រោងនឹងចំណាយថវិកាប្រមាណ ២០លានដុល្លារអាមេរិក ដែលបានមកពីគម្រោងទេសចរណ៍នាគរាជ។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គអឆក) កាលពីថ្ងៃទី១៣ ខែសីហា ឆ្នាំ២០២១។ បើតាមផែនការ ក្រោយពិនិត្យទីតាំង និងសិក្សាជាបន្តបន្ទាប់កន្លងមក ស្ថានីយទី៣នេះ នឹងសាងសង់ក្នុងភូមិ៤ សង្កាត់លេខ៤ ក្រុងព្រះសីហនុ ដែលមានសមត្ថភាពចម្រោះទឹកបានដល់ទៅ ២០ ០០០ ម៉ែត្រគូប ក្នុងមួយថ្ងៃ។ គួរបញ្ជាក់ថា នៅក្នុងខេត្តព្រះសីហនុមានស្ថានីយប្រព្រឹត្តកម្មទឹកកខ្វក់ចំនួន ២កន្លែងរួចមកហើយ គិតត្រឹមខែកក្កដា ស្ថានីយទី១ សាងសង់សម្រេចបាន៩៨% និងទី២ សម្រេចបាន១០០%។ (អានបន្ថែម)

អាន​បន្ថែម

ឆ្នេរភក់ពីផ្សារក្តាមដល់ព្រៃកោងកាង នៅកែប នឹងត្រូវប្ដូរមុខមាត់ទៅជាឆ្នេរកម្សាន្តស្ដង់ដា

រដ្ឋាភិបាលកម្ពុជា សម្រេចអនុម័តជាផ្លូវការហើយ លើគម្រោងប្ដូរមុខមាត់ឆ្នេរភក់ប្រវែង ២,៧ គីឡូម៉ែត្រ ចាប់ពីផ្សារក្តាម ទៅដល់ព្រៃកោងកាង ដែលស្ថិតក្នុងភូមិថ្មីនៃក្រុងកែប ទៅជាឆ្នេរខ្សាច់កម្សាន្តសាធារណៈកម្រិតខ្ពស់។ នេះបើតាមសេចក្តីប្រកាសព័ត៌មានរបស់គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (គអឆក) កាលពីថ្ងៃទី១៣ ខែសីហា ឆ្នាំ២០២១។ ការកែលម្អនេះ សំដៅលើកកម្ពស់សោភ័ណភាព និងបរិស្ថាន ពីតំបន់មិនមានការអភិវឌ្ឍន៍ទៅជាតំបន់ទេសចរណ៍ ដើម្បីលើកស្ទួយសេដ្ឋកិច្ចប្រជាពលរដ្ឋក្នុងតំបន់ និងប្រទេសជាតិ។ តាមផែនការ គអឆក នឹងរៀបចំកែលម្អឆ្នេរដែលមានទទឹងប្រវែងយ៉ាងតិច ៣០ម៉ែត្រ និងបណ្ដោយប្រវែង ២៧០០ម៉ែត្រ ក៏ដូចជារៀបចំសួនច្បារសាធារណៈ និងដាំដើមឈើនៅលើដីចំណីឆ្នេរសមុទ្រ ដែលមានទទឹងប្រវែង ៥០ម៉ែត្រ និងបណ្ដោយប្រវែង ២៧០០ម៉ែត្រផងដែរ។ ដោយឡែក ថវិកាសម្រាប់អនុវត្តគម្រោងខាងលើនេះ នឹងបានមកពីការចូលរួមរបស់ម្ចាស់ដីនៅជាប់ឆ្នេរសមុទ្រ ជាថ្នូរនឹងការទទួលបានដីប្រវែង ៥០ម៉ែត្រ បន្តពីព្រំដីកម្មសិទ្ធិខ្លួនឆ្ពោះទៅសួនច្បារ។ គួរបញ្ជាក់ថា ការអនុញ្ញាតនេះធ្វើឡើងក្រោយពេលមានសំណើរបស់ឯកជនលើគម្រោងបង្កើតរមណីយដ្ឋានឆ្នេរខ្សាច់កម្សាន្តកម្រិតខ្ពស់នៅភូមិថ្មី ខេត្តកែបនេះ។ (អានបន្ថែម)

អាន​បន្ថែម

រដ្ឋអនុម័តគម្រោងវិនិយោគថ្មី ២ តម្លៃជាង ៥លានដុល្លារនៅខេត្តកណ្ដាល និងតាកែវ

ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ១៣ ខែសីហា នេះ បានអនុម័តឱ្យក្រុមហ៊ុនឯកជនវិនិយោគសាងសង់រោងចក្រចំនួន ២កន្លែង តម្លៃសរុប ៥,៥ លានដុល្លារអាមេរិក នៅខេត្តកណ្តាល និងតាកែវ។ ក្រុមហ៊ុនទី១ គឺក្រុមហ៊ុន COLLABORATION PACKAGING MATERIAL PRODUCTS CO., LTD ដែលនឹងវិនិយោគ ២,២ លានដុល្លារអាមេរិក បង្កើតរោងចក្រផលិតគ្រឿបន្សំកាបូប និងគ្រឿងបន្សំស្បែកជើង ដែលមានទីតាំងនៅភូមិថ្លើក ឃុំពើក ស្រុកអង្គស្នួល ខេត្តកណ្តាល។ ក្រុមហ៊ុនទី២ គឺក្រុមហ៊ុន CHASEFIRE OUTDOORS (CAMBODIA) CO., LTD ដែលវិនិយោគ៣,៣ លានដុល្លារអាមេរិក បង្កើតរោងចក្រកាត់ដេរសម្លៀកបំពាក់សុវត្ថិភាព ផលិតកាបូប និងឧបករណ៍សម្ភារៈសម្រាប់បោះជំរំគ្រប់ប្រភេទ ដែលមានទីតាំងស្ថិតនៅភូមិពេជចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ។ បើតាមក្រុមប្រឹក្សាអភិវឌ្ឍន៍(CDC) គម្រោងវិនិយោគទាំងពីរខាងលើ នឹងបង្កើតការងារសរុបជាង ១២០០ កន្លែង។ បើតាមរបាយការណ៍ នៅក្នុងឆមាសទី១ ឆ្នាំ២០២១ ក្រុមប្រឹក្សាអភិវឌ្ឍន៍កម្ពុជា […]

អាន​បន្ថែម

ចំណូលកំពង់ផែក្រុងព្រះសីហនុកើនឡើង ៤៥៥% ក្នុងត្រីឆមាសទី១ ខណៈចំណតថ្មីត្រៀមសាងសង់ឆាប់ៗ

ចំណូលរបស់កំពង់ផែស្វ័យតក្រុងព្រះសីហនុ មានអត្រាកំណើនខ្ពស់ គិតត្រឹមឆមាសទី១ ឆ្នាំ២០២១ នេះ ខណៈកំពង់ផែកំពុងពង្រីកបន្ថែមហេដ្ឋារចនាសម្ព័ន្ធ ដើម្បីឆ្លើយតបទៅនឹងកំណើនចរាចរណ៍ទំនិញ និងកំណើនសេដ្ឋកិច្ចជាតិ។ កំពង់ផែស្វយ័តក្រុងព្រះសីហនុ បានបង្ហាញរបាយការណ៍ហិរញ្ញវត្ថុរបស់ខ្លួន នៅថ្ងៃទី១២ ខែសីហា នេះថា គិតត្រឹមថ្ងៃទី៣០ ខែមិថុនា ចំណូលសុទ្ធសរុប ជាង ១៤,០៧៥ ប៊ីលានរៀល (សមមូលនឹង ១២,៤៨ លានដុល្លារ) កើនឡើង ៤៥៥% បើធៀបនឹងរយៈពេលដូចគ្នាកាលពីឆ្នាំមុន។ ចំណូលកំពង់ផែកើនឡើងនេះ ឆ្លុះបញ្ជាំងពីសកម្មភាពអាជីវកម្មរបស់កំពង់ផែដែលរីកចម្រើន ស្របពេលដែលកំពង់ផែគ្រោងពង្រីកហេដ្ឋារចនាសម្ព័ន្ធបន្ថែម។ តាមផែនការ កំពង់ផែស្វ័យតក្រុងព្រះសីហនុ គ្រោងកសាងចំណតនាវា ដែលមានប្រវែង ៣៥០ម៉ែត្រ និងជម្រៅ ១៤,៥ម៉ែត្រ។ គម្រោងនេះ នឹងត្រូវកសាងនៅក្រោមកម្ចីជំនួយអភិវឌ្ឍន៍ (ODA) របស់ប្រទេសជប៉ុន ដែលមានទឹកប្រាក់ ២១៨លានដុល្លារ។ (អានបន្ថែម) តាមការគ្រោងទុក គម្រោងនេះ នឹងចាប់ផ្តើមសាងសង់នៅក្នុងឆ្នាំ២០២១នេះ ដែលបច្ចុប្បន្ន កំពុងស្ថិតនៅក្នុងការគូសប្លង់ និងគ្រោងបញ្ចប់ការសាងសង់នៅឆ្នាំ២០២៤។

អាន​បន្ថែម

ក្រសួងបរិស្ថាននឹងបញ្ចូលបច្ចេកវិទ្យាបៃតង ក្នុងប្លង់មេតំបន់សេដ្ឋកិច្ចពហុបំណងព្រះសីហនុ

ក្រសួងបរិស្ថាន កំពុងវាយតម្លៃ និងសិក្សារុករកបច្ចេកវិទ្យាថ្មីៗ ដើម្បីយកទៅប្រើប្រាស់ ធ្វើផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណង អនុវត្តទៅដោយរលូន មានប្រសិទ្ធិភាព និងមិនប៉ះពាល់ដល់បរិស្ថាន។ នេះបើយោងតាមកិច្ចប្រជុំផ្សព្វផ្សាយគម្រោង រៀបចំកាលពីថ្ងៃទី១១ ខែសីហា ដែលដឹកនាំដោយឯកឧត្តម វ៉ាន់ មុនីនាថ អគ្គលេខាធិការក្រុមប្រឹក្សាជាតិអភិវឌ្ឍន៍ដោយចីរភាព។ ឯកឧត្តម បានឱ្យដឹងថា គម្រោងនេះនឹងជួយពង្រឹងសមត្ថភាពធនធានមនុស្ស ក៏ដូចជារិះរកដំណោះស្រាយ និងបច្ចេកវិទ្យាថ្មីៗនានា ដើម្បីធ្វើឱ្យការអភិវឌ្ឍ ចំណេញដល់សេដ្ឋកិច្ច បរិស្ថាន វប្បធម៌ និងសង្គម។ ផែនការសកម្មភាព នឹងផ្តោតសំខាន់លើការកាត់បន្ថយឥទ្ធិពលអវិជ្ជមានដល់បរិស្ថាន ដោយគ្រប់គ្រងយ៉ាងហ្មត់ចត់លើវិស័យថាមពល ដំណើរការឧស្សាហកម្ម ការប្រើប្រាស់ទឹក ការបញ្ចេញសំណល់ និងការងារផ្សេងៗទៀតក្នុងគ្រប់ដំណើរការអភិវឌ្ឍខេត្តព្រះសីហនុ។ និយាយជារួម ផែនការមេដ៏ធំមួយនេះ ត្រូវតែធ្វើឡើងដោយមានភាពបៃតង និងផ្ដល់ប្រយោជន៍ដល់គ្រប់ផ្នែក។ គួរបញ្ជាក់ផងដែរថា ផែនការមេជំរុញឱ្យខេត្តព្រះសីហនុក្លាយជាតំបន់សេដ្ឋកិច្ចពិសេសគំរូពហុបំណង ត្រូវបានរដ្ឋាភិបាលប្រកាសមួយរយៈធំមកហើយ។ កាលពីខែមិថុនា កន្លងមកនេះ សម្ដេចនាយករដ្ឋមន្រ្តី ហ៊ុន សែន បានសម្រេចចេញអនុក្រឹត្យថ្មីមួយបង្កើតគណៈកម្មធិការបច្ចេកទេសអន្តរក្រសួង ដាក់រដ្ឋមន្រ្តីជើងចាស ៣រូប ធ្វើការរួមគ្នាពន្លឿនការងារនេះ។ (អានបន្ថែម) លើសពីនេះ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា បច្ចុប្បន្នក៏កំពុងប្រមូលរូបភាពពីលើអាកាសនៅខេត្តព្រះសីហនុហើយ ដើម្បីប្រើប្រាស់ជាឯកសារជំនួយក្នុងពេលរៀបចំផែនការមេផងដែរ។ (អានបន្ថែម)

អាន​បន្ថែម

ផ្លូវល្បឿនលឿនភ្នំពេញ-ក្រុងព្រះសីហនុ សម្រេចការសាងសង់ប្រមាណ ៦៤% ហើយ

គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដែលមានប្រវែងសរុបជាង ១៩០គីឡូម៉ែត្រ គិតត្រឹមខែកក្កដា ឆ្នាំ២០២១ សម្រេចការសាងសង់បាន ៦៤% ហើយ។ នេះបើយោងតាម លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន។ លោកបានឱ្យដឹងទៀតថា ទោះបីជាប្រទេសកម្ពុជា ប្រឈមនឹងការីករាលដាលនៃជំងឺកូវីដ១៩ យ៉ាងណាក៏ដោយ ដំណើរការសាងសង់ផ្លូវល្បឿនលឿននេះនៅតែបន្តដដែល មិនមានការប៉ះពាល់នោះទេ។ ប៉ុន្តែ គម្រោងនេះជាក់ស្ដែង គឺនឹងបញ្ចប់មុនផែនការទៅទៀត ពោលគឺប្ដូរពីខែមីនា ឆ្នាំ២០២៣ មកត្រឹមខែកញ្ញា ឆ្នាំ២០២២ វិញ ព្រមជាមួយនឹងការបើកឱ្យជិះសាកល្បងឥតគិតថ្លៃ ១អាទិត្យ ឬ ១ខែដំបូង។ នេះបើយោងតាមរដ្ឋមន្រ្តីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល កាលពីខែមិថុនា។ (អានបន្ថែម) លើសពីនេះ ក្រសួងក៏កំពុងចរចាឱ្យក្រុមហ៊ុនយកតម្លៃសេវាបើកបរលើផ្លូវនេះទាបផងដែរ ពោលគឺចង់បានតម្លៃទាបជាង ១០សេន ក្នុង១គម។ គួរបញ្ជាក់ផងដែរថា គម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ប្រវែងសរុបជាង ១៩០គីឡូម៉ែត្រ ភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ។ […]

អាន​បន្ថែម

រដ្ឋដកហូតគម្រោងវិនិយោគកំពង់ផែទេសចរណ៍ចុងឃ្នៀសខេត្តសៀមរាប ពីឯកជនមកជាសម្បត្តិរដ្ឋវិញ

រដ្ឋាភិបាលបានសម្រេច លុបចោល និងដកហូតទីតាំងវិនិយោគសាងសង់កំពង់ផែទេសចរណ៍ចុងឃ្នៀស នៅខេត្តសៀមរាប របស់ក្រុមហ៊ុន ស៊ូ ជីង អ៊ិនវេសមិន មកជាសម្បត្តិរដ្ឋវិញ ក្រោមការគ្រប់គ្រងជាបណ្ដោះអាសន្ន របស់រដ្ឋបាលខេត្ត និងគ្រឹះស្ថានអង្គរ។ នេះបើតាមលិខិតទីស្ដីការគណៈរដ្ឋមន្ត្រី ជម្រាបជូនក្រសួងសេដ្ឋកិច្ច និងហិរញ្ញវត្ថុ ចុះផ្សាយជាផ្លូវការកាលពីថ្ងៃទី២៩ ខែកក្កដា ឆ្នាំ២០២១។ លិខិតដដែល បានបន្ថែមថា រាល់ទ្រព្យសម្បត្តិ និងហេដ្ឋារចនាសម្ពន្ធនានានៅលើទីតាំងវិនិយោគ ស្ថិតនៅតំបន់ចុងឃ្នៀស សង្កាត់ចុងឃ្នៀស ក្រុងសៀមរាប ត្រូវបានចាត់ទុកជាសម្បត្តិរដ្ឋ។ លើសពីនេះ រដ្ឋក៏នឹងបង្កើតគណៈកម្មការអន្តរក្រសួងមួយ ដឹកនាំដោយក្រសួងសេដ្ឋកិច្ច និងចូលរួមដោយស្ថាប័នជំនាញពាក់ព័ន្ធ ដើម្បីត្រៀមដោះស្រាយសំណើសុំទូទាត់សំណងគម្រោងវិនិយោគរបស់ក្រុមហ៊ុន ព្រមនឹងការទូទាត់បំណុលពន្ធរបស់ក្រុមហ៊ុន។ លោក សុខ ថុល នាយករដ្ឋបាលខេត្តសៀមរាប បានបញ្ជាក់ប្រាប់សារព័ត៌មានខេមបូណូមីស ថា មូលហេតុដែលរដ្ឋសម្រេចលុបចោលគម្រោងខាងលើ ដោយសារតែក្រុមហ៊ុនមិនបានអនុវត្តត្រឹមត្រូវតាមគោលការណ៍កំណត់ការបង់ពន្ធ និង ស.ជ.ណ ដែលរដ្ឋបានកំណត់។ អ្នកនាំពាក្យរដ្ឋបាលខេត្ត និងជាអភិបាលរងខេត្តសៀមមរាប លោក លី សំរិទ្ធិ កាលពីថ្ងៃទី១១ ខែសីហា បានឲ្យដឹងថា ខាងរដ្ឋបាលខេត្តបានទទួលហើយ ដោយនៅរង់ចាំតែការអនុវត្តប៉ុណ្ណោះ ប៉ុន្តែមិនទាន់កំណត់បានពីការអនុវត្តនៅពេលណា ឬថ្ងៃណានោះបានឡើយ៕

អាន​បន្ថែម

ការសាងសង់ស្ពានអាកាស និងផ្លូវក្រោមដីចោមចៅ សម្រេចបាន ៧៥%

គម្រោងសាងសង់ស្ពានអាកាស និងផ្លូវក្រោមដីចោមចៅតម្លៃ ២២លានដុល្លារ គិតត្រឹមដើមខែសីហានេះ សម្រេចបាន ៧៥% ហើយ ដោយគ្រោងនឹងបញ្ចប់តាមផែនការនៅពេលឆាប់ៗខាងមុខនេះ។ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានឱ្យដឹងថា ស្ពានអាកាស និងផ្លូវក្រោមដីនេះ ត្រូវបានបើកឱ្យដំណើរការជាបណ្តោះអាសន្ន នៃផ្នែកខ្លះហើយដែរ ដើម្បីសម្រួលចរាចរណ៍ជូនប្រជាពលរដ្ឋ។ នេះបើយោងតាមការចុះផ្សាយរបស់កាសែតរស្មីកម្ពុជា នៅថ្ងៃទី១២ ខែសីហា។ ស្ពានអាកាស និងផ្លូវក្រោមដីនេះ កំពុងសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដែលបានបើកការដ្ឋានតាំងពីខែ មិថុនា ឆ្នាំ ២០១៨ ដោយប្រើពេលសាងសង់ ៣០ខែ។ បច្ចុប្បន្ននេះទីក្រុងភ្នំពេញមានស្ពានអាកាសចំសនួន ៥ រួចមកហើយ ដែលកំពុងដាក់ឱ្យប្រើប្រាស់ដូចជា ស្ពានអាកាសក្បាលថ្នល់ នអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា (តិចណូ) និង ស្ពានអាកាសផ្សារដីហ៊ុយ។  

អាន​បន្ថែម

ក្រសួងដែនដីបញ្ជាឱ្យរឹតបន្ដឹងសុវត្ថិភាពក្នុងការដ្ឋានសំណង់ទូទាំងប្រទេស ទោះក្នុងវិបត្តិកូវីដក្ដី

ក្រសួងរៀបចំដែនដី នគរូបនីយកម្ម និងសំណង់ បានដាក់បញ្ជាឱ្យម្ចាស់សំណង់ទាំងអស់ ត្រូវរឹតបណ្តឹងសុវត្ថិភាពក្នុងការដ្ឋានរបស់ខ្លួន ទោះបីការដ្ឋានផ្អាក ឬបន្ថយការងារក្ដី ដោយហាមដាច់ខាតមិនឱ្យមានការធ្វេសប្រហេសបង្កគ្រោះថ្នាក់ដល់សាធារណជន និងកម្មករ។ នេះបើតាមលិខិតលេខ១០៨ ចុះថ្ងៃទី ១១ ខែសីហា ឆ្នាំ២០២១។ បទបញ្ជានេះធ្វើឡើងក្រោយពីក្រសួងសង្កេតឃើញថា ការដ្ឋានសំណង់មួយចំនួនបានផ្អាកដំណើរការ ឬបានកាត់បន្ថយសកម្មភាពសាងសង់ខ្លះ ហើយម្ចាស់ការដ្ឋានភ្លេចខ្លួន មិនគិតគូរពីរឿងសុវត្ថិភាព ព្រោះយល់ថាការដ្ឋានមានទ្រង់ទ្រាយតូចជាងមុន។ ប៉ុន្តែ បើទោះបីជាមានការផ្អាកសាងសង់ ឬសង់តិចតួចក៏ដោយ ម្ចាស់សំណង់ និងអ្នកម៉ៅការសាងសង់ ក៏នៅតែមានកាតព្វកិច្ចធានាសុវត្ថិភាព និងសណ្តាប់ធ្នាប់ក្នុងការដ្ឋានសំណង់របស់ខ្លួន។ តួយ៉ាងដូចជា បើគ្មានការសាងសង់ទេ ម្ចាស់ការដ្ឋានត្រូវហ៊ុំព័ទ្ធសំណាញ់សុវត្ថិភាព ព្រមទាំងទុកដាក់សម្ភារផ្សេងៗឱ្យបានត្រឹមត្រូវ ដើម្បីជៀសវាងការបង្កហានិភ័យ និងគ្រោះថ្នាក់ជាយថាហេតុដល់កម្មករសាងសង់ និងសាធារណៈជនដទៃទៀត។

អាន​បន្ថែម

IMF នឹងចាក់លុយ២៤០លានដុល្លារ ចូលសេដ្ឋកិច្ចកម្ពុជា ដោយមិនបាច់សងវិញសូម្បីតែ ១សេន

ស្ថាប័នរូបីយវត្ថុអន្តរជាតិ IMF បានសម្រេចផ្តល់ជំនួយឥតសំណង ២៤០លានដុល្លារ ដល់កម្ពុជា ដើម្បីដោះស្រាយផលប៉ះពាល់ពីវិបត្តិកូវីដ១៩ និងស្តារសេដ្ឋកិច្ចរបស់ខ្លួនឡើងវិញ ក្នុងលក្ខខណ្ឌដោយមិនតម្រូវឱ្យកម្ពុជាសងវិញនោះទេ។ នេះបើតាមប្រកាសព័ត៌មានរបស់អង្គការអុកស្វាម( OXFAM)។ IMF កាលពីដើមខែសីហា បានអនុម័តថវិកាសម្រាប់ស្រោចស្រង់សេដ្ឋកិច្ចពិភពលោកសរុប ៦៥០ពាន់លានដុល្លារ ពីគណនីមូលនិធិពិសេស ឬ Special Drawing Rights (SDRs) ដែលជាថវិកាធំបំផុតមិនធ្លាប់អនុម័តក្នុងប្រវត្តិសាស្រ្ត។ កម្មវិធី SDR នេះនឹងចាប់ផ្ដើមអនុវត្តនៅថ្ងៃទី២៣ ខែសីហា ខាងមុខនេះ ដោយកម្ពុជានឹងទទួលបាន ២៤០លានដុល្លារ ពីកញ្ចប់ទឹកប្រាក់ទាំងមូល។ នាយិកាប្រចាំប្រទេសនៃអង្គការអុកស្វាម(Oxfam) លោកស្រី លីម សូលីន មានប្រសាសន៍ថា កញ្ចប់ជំនួយនេះ គឺផ្តល់អាទិភាពលើការថែទាំសុខភាពជាសកល និងការវិនិយោគលើកិច្ចគាំពារសង្គម ដែលអាចកាត់បន្ថយវិសមភាព ដើម្បីសម្រេចបានការងើបឡើងវិញរួចផុតពីជំងឺរាតត្បាត។ យោងតាមរបាយការណ៍ ILO បច្ចុប្បន្ន វិស័យសេដ្ចកិច្ចក្រៅប្រព័ន្ធ តំណាងឱ្ យ៨៧,៥% នៃសេដ្ឋកិច្ចកម្ពុជា ហើយកម្មករសេដ្ឋកិច្ចក្រៅប្រព័ន្ធចំនួនជាង ៦លាននាក់ កំពុងប្រឈមនឹងការបាត់បង់មុខរបរ ក្នុងអំឡុងកូវីដនេះ។ ដូច្នេះ ទាមទារឱ្យរដ្ឋាភិបាលកម្ពុជា ត្រូវផ្តោតការយកចិត្តទុកដាក់ជាពិសេសលើការគាំទ្រកម្មករសេដ្ឋកិច្ចក្រៅប្រព័ន្ធ និងអាជីវកម្មធុនតូច និងមធ្យម […]

អាន​បន្ថែម