CVEA៖ ក្រោយចូលឆ្នាំចិន វិស័យអចលនទ្រព្យនឹងស្ទុះខ្លាំង វិនិយោគិនបរទេសអាចកើន៣០-៤០%

• 10 ខែ​វិច្ឆិកា 2021
• ព័ត៌មានអចលនទ្រព្យ
• 15 មើល

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក ច្រឹក សុខនីម បានព្យាករថា វិស័យអចលនទ្រព្យនៅកម្ពុជានឹងមានសន្ទុះខ្លាំងឡើងវិញនៅឆ្នាំ ២០២២ ពិសេសក្រោយពិធីចូលឆ្នាំប្រពៃណីចិន ដោយរំហូរវិនិយោគិនបរទេសអាចនឹងមានដល់ ៣០ ទៅ ៤០%។

លោក ច្រឹក សុខនីម បានវិភាគដូច្នេះ ក្នុងកម្មវិធីសន្និសីទសារព័ត៌មានស្តីពីការរៀបចំសមាជិកលើកទី២៣ នៃសមាគមអ្នកវាយតម្លៃអចលនវត្ថុអាស៊ាន (AVA) និងកាលពីថ្ងៃទី ៣ ខែវិច្ឆិកា កន្លងទៅ។

លោក មានប្រសាសន៍ថា៖ «ការងើបឡើងវិញនេះ គឺដោយសារតែរដ្ឋាភិបាលសម្រេចបើកប្រទេសឡើងវិញ ខណៈករណីឆ្លងក៏ធ្លាក់ចុះជាបណ្ដើរៗហើយ ដែលនឹងធ្វើឱ្យចរន្តសេដ្ឋកិច្ចដើរឡើងវិញ ដូច្នេះអ្នកវិនិយោគបរទេសក៏នឹងចាប់ផ្ដើមចូលមកវិញដែរ។

«ខ្ញុំនិយាយថា ក្រោយចូលឆ្នាំចិន ព្រោះវិនិយោគិនអចលនទ្រព្យភាគច្រើនគឺមកពីប្រទេសចិន ភាគច្រើនពួកគេនឹងវិនិយោគក្រោយឆ្នាំថ្មី។ តាមការវិភាគ វិនិយោគិនបរទេសអាចនឹងមានដល់ ៣០% ទៅ ៤០%» លោក បានបន្ដ។

គួរបញ្ជាក់ថា សមាគម CVEA និង AVA ក៏បានបានបង្ហាញពីទិសដៅ ចង់លើកកម្ពស់សមត្ថភាពភ្នាក់ងារអចលនទ្រព្យរបស់ខ្លួន ដោយគ្រោងចង់បង្កើតគោលការណ៍តែមួយ ដើម្បីគ្រប់គ្រងស្ដង់ដារភ្នាក់ងារអចលនទ្រព្យប្រទេសសមាជិកទាំងអស់។ (អានបន្ថែម)

• អត្ថបទវិភាគ
• អត្ថបទវិភាគ