ប្រធានបទក្តៅ៖ ផលវិជ្ជមាននិងអវិជ្ជមាននៃពន្ធចំណេញមូលធន២០%ដល់ទីផ្សារអចលនទ្រព្យកម្ពុជា

• ១១ កញ្ញា ២០២០
• ព័ត៌មានក្នុងស្រុក
• 5430 មើល

ការប្រមូលចំណូលមូលធន ២០% ចាប់ពីខែមករាឆ្នាំក្រោយនេះ បានក្លាយជាប្រធានបទពិភាក្សាដ៏ក្ដៅគគុកមួយ ជាពិសេសក្នុងវិស័យអចនទ្រព្យ។ (អានបន្ថែម)

អ្នកខ្លះរិះគន់ថាពន្ធនេះគឺខ្ពស់ពេក ដោយនឹងប៉ះពាល់យ៉ាងធ្ងន់ធ្ងរទៅលើរចន្តទិញលក់អចនទ្រព្យ។ ខ្លះទៀតថា នេះមិនមែនជាកាលៈទេសៈសមរម្យទេក្នុងការប្រមូលពន្ធ ដោយសារប្រទេសកំពុងរងវិបត្តិកូវីដ។ ដោយឡែក អ្នកខ្លះទៀតបង្ហាញពីសុទិដ្ឋិនិយមថា ពន្ធគឺជាវីធីដ៏មានប្រសិទ្ធិភាពមួយដើម្បីគ្រប់គ្រងការបំប៉ោងតម្លៃទ្រព្យសម្បត្តិ និងជាការរកចំណូលរបស់រដ្ឋក្នុងស្ថានភាពសេដ្ឋកិច្ចបែបនេះ។

ទស្សនាវដ្ដីសំណង់ និងអចលនទ្រព្យ បានជួបសម្ភាសជាមួយអ្នកជំនាញច្រើនរូប ដើម្បីវែកញែកថាតើពន្ធនេះមានផលវិជ្ជមាន និងអវិជ្ជមានអ្វីខ្លះ? តើពន្ធនេះមានចំណុចលើកលែងត្រង់ណាខ្លះ? និងតើត្រូវកំណត់ក្នុងកម្រិតណាដើម្បីឱ្យសមស្របជាពិសេសក្នុងពេលដែលពិភពលោកកំពុងជួបប្រទះវិបត្តិកូវីដ ១៩ ដូច្នេះ?

តើការផ្ទេរឬលក់ អចលនទ្រព្យប្រភេទអ្វីខ្លះ ដែលត្រូវបានលើកលែងពន្ធចំណេញមូលធន ២០%?

យោងតាមសេចក្ដីប្រកាសរបស់ក្រសួងសេដ្ឋកិច្ច និងហិរញ្ញវត្ថុ នឹងមានការលើកលែងពន្ធចំពោះការលក់ ឬផ្ទេរទ្រព្យមួយចំនួនដូចជា៖
• ប្រភេទទ្រព្យ ដែលជាកម្មសិទ្ធិ ស្ថាប័នរដ្ឋ
• ទ្រព្យកម្មសិទ្ធិបេសកកម្មការទូតបរទេស ឬកុងស៊ុលបរទេស និង អង្គការអន្តរជាតិ ឬ ទីភ្នាក់ងារប្រតិបត្តិការបច្ចេកទេសនៃរដ្ឋាភិបាលដទៃ
• ប្រភេទទ្រព្យជានិវាសនដ្ឋាន ពោលគឺទ្រព្យដែលកាន់កាប់ និងរស់នៅរយៈពេលយ៉ាងតិច ៥ឆ្នាំ។ ប៉ុន្តែការលើកលែងពន្ធគឺសម្រាប់តែនិវាសនដ្ឋានគោលឬទីមួយប៉ុណ្ណោះ មិនលើកលែងសម្រាប់អចលនទ្រព្យទី២ ឬ ទី៣ ឡើយ។
• អចលនទ្រព្យក្នុងវង្វង់ញាតិដែលបានចែងក្នុងបទបញ្ញត្តិស្ដីពីពន្ធប្រថាប់ត្រា
• ទ្រព្យដែលត្រូវផ្ទេរនឹងលក់ដើម្បីប្រយោជន៍សាធារណៈ ស្របតាមច្បាប់ស្តីពីអស្សាមិករណ៍។

ពន្ធមូលធន ២០% នឹងគ្រប់គ្រងមិនឱ្យមានការបំប៉ោងតម្លៃអចលនទ្រព្យ

លោក លី សុខឆាយ អគ្គនាយក ក្រុមហ៊ុន អិល អេស ស៊ី ជី រៀលអ៊ីស្តេតប្រាប់ទស្សនាវដ្ដីសំណង់ និងអចនទ្រព្យថា ពន្ធចំណេញមូលធន ២០%នេះ នឹងធ្វើឱ្យការទិញលក់អចលនទ្រព្យនឹងកើនចំណាយជាងមុន។

«មូលហេតុនៃការកើនចំណាយហ្នឹង បើយោងតាមច្បាប់ គឺគេមិនចង់ឱ្យអ្នកទិញអចលនទ្រព្យទុកដើម្បីចំណេញ ហើយលក់វិញក្នុងរយៈពេលខ្លី ដែលជាហេតុអាចធ្វើឱ្យតម្លៃអចនទ្រព្យឡើងចុះ ពិបាកនឹងគ្រប់គ្រង ឬក៏ឡើងខ្ពស់ខ្លាំងពេកខុសពីការពិត»។

លោកបានបន្ថែមទៀតថា៖ «នេះជាវិធីមួយ ដើម្បីរក្សារស្ថិរភាពតម្លៃ។ ក្នុងច្បាប់នេះ ក៏បានជួយសម្រួលយើងដែរ បើសិនជាការទិញលក់ហ្នឹងលើសពី ៥ ឆ្នាំ ក៏មិនតម្រូវឱ្យបង់ពន្ធ ២០% ដែរ។ អញ្ចឹងនេះគឺជាការជួយគ្រប់គ្រងទៅលើតម្លៃអចនទ្រព្យនៅប្រទេសកម្ពុជា កុំឱ្យកើនឡើងខ្លាំងជ្រុល»។

ជាមួយគ្នានេះដែរ លោកបណ្ឌិត គីម ហ៊ាង ប្រធានក្រុមហ៊ុន KW Cambodia បានឱ្យដឹងថា រាល់គោលនយោបាយទាំងអស់ តែងតែមានគុណសម្បតិ្តនិងគុណវិបត្តិ។

«នៅពេលអនុវត្តច្បាប់ តែងតែមានមតិ២ ផ្ទុយគ្នា ទី១ គឺក្រុមមនុស្សដែរគិតអវិជ្ជមាន។ ក្រុមនេះ គឺពួករកស៊ីមិនទម្លាប់បង់ពន្ធ ចឹងគាត់ប្រាកដជារិះគន់ថា បង់ពន្ធច្រើន ក៏ប៉ុន្តែអ្នករិះគន់ហ្នឹង ពីដើមឡើយគាត់មិនដែលបង់ពន្ធទេ គាត់រិះគន់គ្រប់យ៉ាង ប៉ុន្តែយើងកុំខ្វល់»។

«រឿងទី២ ក្រុមមនុស្សដែរគិតវិជ្ជមាន គឺអ្នករកស៊ីដែលទម្លាប់បង់ពន្ធជាប្រចាំ។ ចឹងមនុស្សដែលធ្លាប់តែបង់ពន្ធជាប្រចាំ នៅពេលដែលរដ្ឋតម្រូវឱ្យបង់ពន្ធថែមទៀត ក៏ពួកគាត់មិនមានអ្វីចំឡែកដែរ»។

កំឡុងកូវីដ ១៩ មិនមែនជាពេលវេលាសមស្របសម្រាប់ការប្រមូលតពន្ធចំណេញមូលធន២០% នេះទេ

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោក ច្រឹក សុខនីម បានឱ្យដឹងថាលោកគាំទ្រលើការអនុវត្តពន្ធនេះ ព្រោះនៅបណ្ដាប្រទេសផ្សេងៗ ក៏គេអនុវត្តដែរ ប៉ុន្តែកាលៈទេសៈនេះមិនមែនជាពេលវេលាសមរម្យទេ។

លោកបានប្រាប់ទស្សនាវដ្ដីសំណង់ និងអចលនទ្រព្យថា៖ «ការបន្ថែមពន្ធក្នុងពេលលំបាក បែបនេះអាចធ្វើឱ្យចរន្តក្នុងការទិញលក់អចលនទ្រព្យថមថយក្នុងកម្រឹតណាមួយ និងប៉ះពាល់លើវិស័យអចលនទ្រព្យក្នុងរយៈពេលវែង។

«ក្នុងកំឡុងវិបត្តិកូវីដ ១៩ វិស័យអចលនទ្រព្យនៅតែជាឆ្អឹងរឹងមាំនៃកំណើនសេដ្ឋកិច្ច តែប្រសិនជារដ្ឋឆាប់បន្ថែមពន្ធដូច្នេះ ចរន្តទិញលក់អចលនទ្រព្យអាចនឹងថមថយខ្លះ ហើយរដ្ឋក៏បាត់បង់ចំណូលខ្លះដូចគ្នាដែរ»។

យ៉ាងណាមិញ លោកគិតថាគួរតែពន្យារពេលក្នុងការអនុវត្តប្រសិនបើរដ្ឋាភិបាលអាចពិចារណាបាន ឬគួរតែចាំរហូតដល់ផុតកូវីដ ១៩ សិនទើបល្អ។

បណ្ឌិត គីម ហ៊ាង ក៏គាំទ្រលើការពន្យារពេលអនុវត្តពន្ធនេះដែរ ដោយព្រួយបារម្ភពីចរន្តទិញលក់អចលនទ្រព្យ។

«ខ្ញុំគិតថា វាជាការប្រញាប់ពេកដែរ យើងគួរតែទុករហូតដល់អ្វីៗ ត្រឡប់ទៅភាពដើមវិញ មានន័យទុកពេលឱ្យការរកស៊ីដីធ្លីល្អសិនទៅ ចាំយើងយក»។

លោកបានបន្ថែមថា៖ «បើអាចចាំ ២០២២ ទៅ នៅពេលដីធ្លីមានហាងឆេង មានចរន្តទិញ-លក់ច្រើន បរទេសមកវិញ លក់ដូរបានច្រើន មានលុយច្រើន ចាំយើងយកដូចជាមិនអីទេ»។

លោក លី សុខឆាយ អគ្គនាយក ក្រុមហ៊ុន អិល អេស ស៊ី ជី រៀលអ៊ីស្តេត បានយល់ស្របផងដែរថា ការអនុវត្តនេះដូចជាលឿនពេក ជាពិសេសក្នុងស្ថានភាពសេដ្ឋកិច្ចនាពេលបច្ចុប្បន្ន។

កម្រិតពន្ធគួរតែទាបជាង ២០% ក្នុងដំណាក់កាលដំបូង

តាមទស្សនៈរបស់លោក ច្រឹក សុខនឹម លោកយល់ថា គួរតែអនុវត្តសន្សឹមៗ។ លោកបានឱ្យដឹងថា៖ «ពាក់ព័ន្ធជាមួយភាគរយ ខ្ញុំមើលឃើញថាយើងនៅចំណុចកណ្ដាលព្រោះភាគច្រើនបណ្ដាប្រទេសផ្សេងៗនៅអាស៊ានគេគិតពីចន្លោះពី ១០ ទៅ ២៥%។ ប៉ុន្តែ ខ្ញុំគិតថាបើយើងយក ដំបូងអាចចន្លោះ ១៥% គឺសមរម្យ។»

ជាសរុប រាល់គោលនយោបាយទាំងអស់ដែលដាក់ចេញ គឺតែងតែមានគុណសម្បត្តិ និងគុណវិបត្តិ ដែលរដ្ឋត្រូវពិចារណា សិក្សា និងថ្លឹងថ្លែងឱ្យច្បាស់លាស់ ថាតើនឹងចំណេញ ឬក៏ខាត មុននឹងអនុវត្ត។ បើតាមអ្នកជំនាញ ទោះបីជាច្បាប់នេះ មានចេតនាវិជ្ជមានដើម្បីជួយគ្រប់គ្រងការបំប៉ោងតម្លៃអចលនទ្រព្យ ក៏ដូចជាជួយរកចំណូលបន្ថែមជូនរដ្ឋក្ដី តែកាលៈទេសៈវិបត្តិកូវីដដូច្នេះ មិនមែនជាពេលវេលាសមស្របទេសម្រាប់ការអនុវត្តិច្បាប់នេះ៕

• អត្ថបទវិភាគ
• ចំណេះដឹង និង បទពិសោធន៍
• ច្បាប់ និងបញ្ញាត្តិ
• គោលនយោបាយ និងផែនការយុទ្ធសាស្រ្ត