Makro គ្រោងថែមទុនជាង ៨០០លានដុល្លារ ដើម្បីពង្រីកអាជីវកម្មលក់រាយរបស់ខ្លួន

• 16 ខែ​មេសា 2023
• Uncategorized @km
• 6 មើល

ក្រុមហ៊ុន Siam Makro Plc ដែលជាប្រតិបត្តិករផ្សារទំនើប Makro និងផ្សារទំនើប Lotus បានបោះទុនចន្លោះពី២៥,៣ ទៅ ២៧.៥ពាន់លានបាត ឬ ប្រមាណ ៧៤០លានដុល្លារ ទៅ ៨០៣,៥លានដុល្លារ នៅឆ្នាំ២០២៣នេះ ដើម្បីពង្រីកអាជីវកម្មលក់រាយ និងលក់បោះដុំរបស់ខ្លួន។

លោកស្រី Saowaluck Thithapant ប្រធាននាយកប្រតិបត្តិក្រុមហ៊ុន Siam Makro បានលើកឡើងថា បន្ទាប់ពីបើកប្រទេសឡើងវិញពេញលេញហើយ សេដ្ឋកិច្ច និងទេសចរណ៍ថៃបានស្ទុះងើបឡើង ដែលជាកត្តាជះផលជាវិជ្ជមានដល់អាជីវកម្មលក់ដុំ និងរាយ ក៏ដូចជាសណ្ឋាគារ ភោជនីយដ្ឋាន និងឧស្សាហកម្មចំណីអាហារ ដែលសុទ្ធសឹងតែជាអតិថិជនរបស់ផ្សារម៉ាក្រូ។

ក្នុងចំណោមទុនវិនិយោគសរុប ប្រមាណ ៣៨៤លានដុល្លារ ទៅ៤១២លានដុល្លារនេះ នឹងត្រូវវិនិយោគលើអាជីវកម្មបោះដុំ នៃផ្សារទំនើប Makro ខណៈទឹកប្រាក់ប្រមាណ ៣៥៧លានដុល្លារ ទៅ៣៩២លានដុល្លារ នឹងត្រូវប្រើប្រាស់សម្រាប់អាជីវកម្មលក់រាយ នៅផ្សារទំនើប Lotus រួមទាំង ការពង្រីកសាខា និងការអភិវឌ្ឍមជ្ឈមណ្ឌលចែកចាយ ប្រព័ន្ធឌីជីថល និងអាជីវកម្មថ្មីៗ។ លោកស្រី Saowaluck បានបញ្ជាក់បន្ថែម។

លោកស្រីបានបន្តថា នៅក្នុងឆ្នាំ២០២៣នេះ ផ្សារទំនើប Makro គ្រោងនឹងបើកសាខាថ្មីចំនួន១២សាខាក្នុងប្រទេសថៃ និងប្រមាណពី៤ ទៅ៦សាខា នៅក្នុងបណ្តាប្រទេសផ្សេងទៀត ដែលផ្សារទំនើប Makro មានវត្តមានអាជីវកម្មរួចហើយ។ ចំណែក ផ្សារទំនើប Lotus គ្រោងនឹងបើកផ្សារទំនើបចំនួនប្រមាណ ១៣ ទៅ១៨សាខា ​ក្នុងប្រទេសថៃ និងម៉ាឡេស៊ី ព្រមទាំងសាខា Go Fresh នៃផ្សារទំនើប Lotus ពី១០០ ទៅ១៥០សាខាផងដែរ៕

• Business and Market
• Economy and Finance