Meridian International Holding ជ្រើសរើស CBRE ជាភ្នាក់ងារលក់គម្រោងនៅភ្នំពេញ

• 27 ខែ​កក្កដា 2021
• ព័ត៌មានអចលនទ្រព្យ
• 9 មើល

ក្រុមហ៊ុនអន្តរជាតិល្បី Meridian International Holding កាលព្រឹកថ្ងៃអង្គារនេះ បានចុះហត្ថលេខាផ្ដល់សិទ្ធឱ្យក្រុមហ៊ុន CBRE Cambodia ក្លាយជាភ្នាក់ងារលក់ និងជួលផ្ដាច់មុខ លើគម្រោងអគារពាណិជ្ជកម្មកម្ពស់ ៤១ជាន់ កណ្ដាលក្រុង Flatiron by Meridian។

កិច្ចព្រមព្រៀងនេះត្រូវបានចុះហត្ថលេខា រវាងលោក Gene Gong នាយកប្រតិបត្តិការ ក្រុមហ៊ុន Meridian International Holding និងលោក James Hodge នាយកគ្រប់គ្រងក្រុមហ៊ុន CBRE Cambodia។

គម្រោង Flatiron by Meridian គឺជាការអភិវឌ្ឍន៍ចម្រុះកម្ពស់ ៤១ជាន់ ដែលសាងសង់លើផ្ទៃដីប្រមាណ ៣២០០ម៉ែត្រក្រឡា នៅក្នុងតំបន់បឹងកក់ ឬស្គាល់ទូទៅថា Phnom Penh City Centre ។

អគារទាំងមូល រួមមាន ការិយាល័យសហកម្មសិទ្ធ ឬ Strata-title office ចំនួន ៣០០ យូនីត ផ្សារទំនើបសម្រាប់ជួល និងសណ្ឋាគារចំនួន ១៣ជាន់។

គម្រោងនេះទៀតសោត គឺជាគម្រោងថ្មីចុងក្រោយបង្អស់របស់ Meridian International Holding នៅកម្ពុជា ដែលគ្រោងនឹងបញ្ចប់ការសាងសង់នៅត្រីមាសទី១ ឆ្នាំ២០២២ ខាងមុខនេះ។

ភាគីទាំងពីររំពឹងថា ការសហការណ៍គ្នានេះនឹងនាំយកអចលនទ្រព្យដែលមានគុណភាព ក៏ដូចជាផ្ដល់សេវាកម្រិតខ្ពស់ដល់អតិថិជននៅកម្ពុជា។

លោក James Hodge លើកឡើងថា នៅក្នុងទីផ្សារមិននឹងនរបែបនេះ អ្នកទិញ និងអ្នកជួល កំពុងស្វែងរកកន្លែងដែលមានសុវត្ថិភាព ដូច្នេះការវិនិយោគជាមួយក្រុមហ៊ុនលំដាប់អន្តរជាតិដូចជា Meridian International Holding គឺជាជម្រើសមួយគួរឱ្យកក់ក្ដៅ។

នាយកប្រតិបត្តិក្រុមហ៊ុន Meridian International Holding លោក Murry Ko លើកឡើងថា តាមរយៈកិច្ចសហការនេះ ក្រុមហ៊ុនកំពុងសំឡឹង និងបង្កើតឱកាសបន្ថែមទៀត សម្រាប់ការរីកចម្រើន និងអភិវឌ្ឍន៍នៅកម្ពុជា។

• អត្ថបទផ្សព្វផ្សាយ
• ធុរកិច្ច និងទីផ្សារ
• អត្ថបទផ្សព្វផ្សាយ
• ធុរកិច្ច និងទីផ្សារ