ពហុកីឡដ្ឋានស្ដង់ដាអន្តរជាតិថ្មីមួយតម្លៃខ្ទង់លានដុល្លារនឹងបង្ហាញខ្លួននៅខេត្តពោធិ៍សាត់

15 ខែកុម្ភៈ 2022
Uncategorized
11 មើល

គម្រោងសាងសង់មជ្ឈមណ្ឌលពហុកីឡដ្ឋានសម្តេចតេជោ ហ៊ុន សែន ឬ Samdach Hun Sen Sport Center ដែលមានតម្លៃខ្ទង់លានដុល្លារ នឹងបើកការដ្ឋានសាងសង់ ក្នុងស្រុកក្រគរ ខេត្តពោធិ៍សាត់ ក្នុងឆ្នាំ២០២២ នេះ។

យោងតាមរដ្ឋបាលខេត្តពោធិ៍សាត់ មជ្ឈមណ្ឌលពហុកីឡដ្ឋាននេះ នឹងត្រូវសាងសង់នៅលើផ្ទៃដីប្រមាណ ២៥ហិកតា ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។

គម្រោងនេះធ្វើឡើងដើម្បីឆ្លើយតបទៅនឹងភាពរីកចម្រើន នៃវិស័យកីឡានៅកម្ពុជា និងបន្សល់ទុកជាកេរ្តិ៍មរតកសម្រាប់ខេត្ត។

គម្រោងនេះត្រូវបានប្រកាសដោយ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី កាលពីពេលថ្មីៗនេះ។

ឯកឧត្តម កែវ រតនៈ បានគូសបញ្ជាក់ថា ក្រុមការងារ បានឈូសឆាយ ចាក់ដីរួចរាល់ និងបន្តធ្វើរបងឱ្យបានឆាប់បំផុត មុននឹងឈានដល់ការសាងសង់។

ពហុកីឡាដ្ឋាននេះ រួមមានទីលានបាល់ទាត់ខ្នាតអន្តរជាតិ ទីលានមហោស្រព ទីលានបាល់ទះ ទីលានបាល់បោះ ទីលានរត់ប្រណាំង ទីលានវាយសី កន្លែងអង្គុយទស្សនា កន្លែងហាត់ប្រាណ ប្រព័ន្ធផ្លូវខ្វាត់ខ្វែង វាលស្មៅ កន្លែងក្មេងលេង កន្លែងអង្គុយលេង ស្រះទឹក និងកន្លែងចតរថយន្ត ៕

- Video Advertisement -