NBC៖ ការទិញ-លក់ផ្ទះឆ្នាំនេះថយចុះខ្លាំង ប៉ុន្តែការលក់ខុនដូបែរជាកើនគួរឱ្យកត់សម្គាល់

7 ខែសីហា 2023
Uncategorized @km
7 មើល

សកម្មភាពលក់លំនៅឋាន រួមមាន ផ្ទះល្វែង វីឡាភ្លោះ និងទោស មានការថយចុះ ខណៈការលក់ខុនដូ មានកំណើនវិជ្ជមាន នៅក្នុងឆមាសទី១ឆ្នាំ២០២៣។ នេះបើតាមរបាយការណ៍ប្រចាំឆមាសទី១របស់ធនាគារជាតិនៃកម្ពុជា ដែលបានចេញផ្សាយកាលពីដើមសប្តាហ៍មុន។

របាយការណ៍ ដែលត្រូវបានយោងតាមនិយ័តករអាជីវករអចលនវត្ថុ និងបញ្ចាំ រួមទាំងការគណនារបស់មន្ត្រីធនាគារជាតិនៃកម្ពុជា បង្ហាញថា សកម្មភាពលក់ផ្ទះល្វែង វិឡាភ្លោះ និងទោល ថយចុះប្រមាណ ៦៤,៧ភាគរយ ខណៈការលក់ខុនដូ មានកំណើនវិជ្ជមានឡើងវិញក្នុងអត្រា១២,៩ភាគរយ។

របាយការណ៍ដដែល បង្ហាញថា សន្ទស្សន៍ថ្លៃលំនៅឋាន (RPPI) បង្ហាញថា តម្លៃលំនៅឋាននៅកម្ពុជាពុំសូវមានការប្រែប្រួលខ្លាំងនោះទេ ដោយនៅភ្នំពេញ មានការកើនឡើង៦,៩ភាគរយ ស្របពេលដែលនៅតាមបណ្តាខេត្តផ្សេងៗទៀតកើន ៥,៣ភាគរយ។

ធនាគារជាតិនៃកម្ពុជា លើកឡើងថា វិស័យសំណង់ បានងើបឡើងមកវិញ ដែលឆ្លុះបញ្ជាំងតាមរយៈកំណើននៃការនាំចូលសម្ភារៈ និងបរិក្ខារសំណង់ ក្នុងកំណើន ០,៤ភាគរយ ឬស្មើនឹងទឹកប្រាក់ប្រមាណជាង៩០០លានដុល្លារ។

របាយការណ៍ខាងលើ បង្ហាញថា ចំពោះគម្រោងសំណង់ដែលអនុម័តដោយក្រសួងរៀបចំដែនដី នគរូបនីយកម្ម និងសំណង់, តម្លៃ និងផ្ទៃក្រឡាគម្រោងសាងសង់ ត្រូវបានប៉ាន់ស្មានថាមានកំណើន ១,៣ភាគរយ ខណៈចំនួនគម្រោងថយចុះ ៩ភាគរយ។

របាយការណ៍របស់ Propnexkh ដែលជាក្រុមហ៊ុនអចលនទ្រព្យក្នុងស្រុកចេញផ្សាយកាលពេលថ្មីៗនេះ បានបង្ហាញថា វិស័យដីធ្លីបានមើលឃើញពីការធ្លាក់ចុះនៃអត្រាកំណើនដល់ទៅ ៦ភាគរយក្នុងឆ្នាំ ២០២២ ហើយបន្តធ្លាក់ចុះមកត្រឹម ១០ភាគរយ នៅក្នុងឆមាសទីមួយនៃឆ្នាំ ២០២៣ ដែលជាការធ្លាក់ចុះជាលើកដំបូងនៃអត្រាកំណើននៅក្នុងរយៈពេលបួនទសវត្សរ៍ចុងក្រោយនេះ។

- Video Advertisement -