ព័ត៌មានអចលនទ្រព្យ
ការផ្លាស់ប្តូរឥរិយាបថរបស់អ្នកជួលក្នុ្ងងទីផ្សារអចលនទ្រព្យ ក្នុងអំឡុងវិបត្តិកូវីដ
ទីផ្សារខុនដូក្នុងរាជធានីភ្នំពេញកំពុងរងសម្ពាធយ៉ាងខ្លាំងពីវិបត្តិកូវីដ ពិសេសក្នុងពេលបិទខ្ទប់ ៣សប្តាហ៍កន្លងមកនេះ។ អ្នកអភិវឌ្ឍន៍ខ្លះ បានធ្វើការបញ្ចុះតម្លៃយ៉ាងខ្លាំង ដើម្បីធ្វើយ៉ាងណាលក់ខុនដូក្នុងស្ដុកដែលជាប់គាំងឱ្យបាន ឯអ្នកខ្លះទៀតប្រើវិធីសាស្រ្ត «ចាំមើលសិន» ដោយផ្លាស់ប្តូរអត្រាការលក់ទៅតាមទីផ្សារប្រចាំថ្ងៃ ហើយរង់ចាំឱ្យទីផ្សារប្រសើរឡើង។ ទីផ្សារខុនដូនៅភ្នំពេញពឹងផ្អែកយ៉ាងខ្លាំងទៅលើវិនិយោគិនបរទេស ពិសេសខុនដូដែលមានធានាការជួលត្រឡប់មកវិញ។ ដោយសារតែតម្រូវការក្នុងស្រុកមានតិចតួច ហើយបរទេសមិនអាចចូលមកម្ពុជាដើម្បវិនិយោគបាននៅពេលនេះ យុទ្ធសាស្ត្រទីផ្សារចាស់ៗដែលធ្លាប់ប្រើប្រាស់ទាំងនេះ គឺប្រើលែងបានផលទៀតហើយសម្រាប់កាលៈទេសៈនេះ។ ទន្ទឹមនឹងនេះ ការផ្គត់ផ្គង់លើសតម្រូវការនៅតែបន្តដាក់សម្ពាធលើវិស័យខុនដូ។ តម្លៃជួលខុនដូ ក៏កំពុងរងសម្ពាធ ពោលគឺត្រូវប្រកួតប្រជែងជាមួយនឹងសណ្ឋាគារដែលបើកឱ្យជួលប្រចាំខែក្នុងតម្លៃទាបខ្លាំង ដើម្បីទាក់ទាញអ្នកជួលទាំងខ្មែរ និងជនបរទេសដែលស្នាក់នៅកម្ពុជា។ សម្ពាធនេះគឺកាន់តែធ្ងន់ធ្ងរ ព្រោះមនុស្សមួយចំនួនធំចូលចិត្តស្នាក់នៅសណ្ឋាគារ ដែលមានតំលៃសមរម្យជាជាងជួលយូនីតខុនដូ។ តម្លៃ បានក្លាយជាកត្តាសំខាន់ ក្នុងការជ្រើសរើសជួលអចលនទ្រព្យ។ ដូច្នេះ សណ្ឋាគារលំដាប់ខ្ពស់ នៅរាជធានីភ្នំពេញ មានភាពប្រកួតប្រជែងជាងសណ្ឋាគារកម្រិតទាប និងមធ្យម ដោយសារពួកគាត់អាចបញ្ចុះតម្លៃបានច្រើនជាង។ ស្ទើរគ្រប់សណ្ឋាគារលំដាប់ផ្កាយ ៥ ក្នុងរាជធានីភ្នំពេញទាំងអស់ កំពុងផ្តល់ការបញ្ចុះតម្លៃជាច្រើន ជាមួយនឹងកញ្ចប់ស្នាក់នៅពិសេសផ្សេងៗ។ ការធ្វើបែបនេះ ឃើញថាជោគជ័យ ព្រោះគ្រួសារអ្នកមានលុយមួយចំនួនដែលមិនអាចធ្វើដំណើរទៅក្រៅប្រទេសបាន គឺបែរទៅស្នាក់នៅសណ្ឋាគារប្រចាំខែដើម្បីទទួលសេវាកម្មបែបផ្កាយ ៥ ក្នុងតម្លៃទាប។ ក្នុងស្ថានភាពបច្ចុប្បន្ន តម្លៃទាបមួយមុខគឺមិនគ្រប់គ្រាន់ទេ ត្រូវមានកត្តាជាច្រើនទៀតដូចជាទីតាំងនិងការផ្តល់ជូនដែលគួរឱ្យចាប់អារម្មណ៍ ដើម្បីទាក់ទាញភ្ញៀវ។ ហើយដោយសារតែ ទីផ្សារជួលខុនដូពេលនេះងាកមកផ្ដោតលើទីផ្សារក្នុងស្រុក ខុនដូ និងសណ្ឋាគារ បែរជាត្រូវមកក្លាយជាគូប្រកួតប្រជែងគ្នាទៅវិញ […]
អានបន្ថែម
តើអ្នកអភិវឌ្ឍន៍ដោះស្រាយបញ្ហាការផ្គត់ផ្គង់លំនៅឋានដែលជាប់គាំងយ៉ាងដូចម្ដេចក្នុងគ្រាលំបាកនេះ?
វិបត្តិកូវីដ១៩ នៅតែបន្តជះឥទ្ធិពលអវិជ្ជមានលើទីផ្សារលំនៅឋាន ជាក់ស្ដែងនៅត្រីមាសដំបូងនៃឆ្នាំ ២០២១ ទីផ្សារគឺគ្មានការកើនឡើងគួរឱ្យកត់សម្គាល់នោះទេ។ ស្ទើរតែគ្មានគម្រោងខុនដូថ្មីដែលបើកលក់ ក្នុងរយៈពេល៣ ខែដំបូងនៃឆ្នាំនេះ ព្រោះក្រុមហ៊ុនអភិវឌ្ឍន៍ធំៗជាច្រើន បែរទៅផ្តោតលើយុទ្ធសាស្ត្រដើម្បីដោះស្រាយស្ដុកដែលជាប់គាំង ពោលគឺដើម្បីរកចំណូលសាច់ប្រាក់មកទប់នឹងស្ថានភាពក្នុងគ្រាលំបាកនេះ។ ចំពោះលំនៅឋានដែលសាងសង់រួច ឃើញថា អ្នកអភិវឌ្ឍន៍គម្រោងខ្លះមានប្រូម៉ូសិនបញ្ចុះតម្លៃដល់ទៅ២០% ទៅ ៣៥% ឯណោះ។ ទន្ទឹមនឹងនេះ ហានិភ័យមួយដែលទីផ្សារកំពុងប្រឈម គឺអ្នកទិញបរទេសជាច្រើន អាចខកខាន ឬផ្ដូរចិត្តមិនចង់បង់លុយផ្ដាច់ដើម្បីផ្ទេរកម្មសិទ្ធិ ដោយសារតែការបិទការចេញចូលពីប្រទេសមួយទៅប្រទេស។ នេះជាបញ្ហាប្រឈមដ៏ធំមួយសម្រាប់អ្នកអភិវឌ្ឍន៍ជាច្រើន លើកលែកតែក្រុមហ៊ុនណាដែលមានការិយាល័យលក់នៅក្រៅប្រទេស ហើយអាចធ្វើការផ្ទេរកម្មសិទ្ធិនៅក្រៅស្រុកបាន។ លើសពីនេះ មានអ្នកទិញខ្លះទៀតដែលមានលុយត្រៀមសម្រាប់បង់ផ្ដាច់ហើយ ប៉ុន្តែមិនអាចធ្វើដំណើរមកបាន ទោះបីពួកគេចង់មកក្ដី។ ជាលទ្ធផល ពួកគាត់អាចនឹងមិនបង់ផ្ដាច់ទិញផ្ទះទាំងនោះទៀតទេ ដែលនឹងធ្វើឱ្យផ្ទះទាំងនោះវិលចូលមកក្នុងស្ដុកទីផ្សារបន្ថែមទៀត។ ដូច្នេះ កត្តាមួយដែលនឹងជួយឱ្យទីផ្សារងើបឡើងវិញ គឺរង់ចាំឱ្យមានការបើកឱ្យមានការដំណើរពីបរទេសចូលស្រុកវិញ។ ការបើកប្រទេសឡើងវិញនេះ មិនត្រឹមតែជួយដល់ការលក់ទីផ្សារលំនៅឋានប៉ុណ្ណោះទេ ប៉ុន្តែនឹងជួយសេដ្ឋកិច្ច និងទីផ្សារអចលនទ្រព្យទាំងមូលផងដែរ។ ទោះស្ថិតក្នុងគ្រាលំបាកបែបនេះក្ដី ទីផ្សារអចលនទ្រព្យក៏នៅមានសង្ឃឹម។ បច្ចុប្បន្ន មានអចលនទ្រព្យជាច្រើន ដែលដាក់លក់តម្លៃសមរម្យសម្រាប់អ្នកទិញទាំងនៅភ្នំពេញ និងគោលដៅទេសចរណ៍សំខាន់ៗ ដូចជាក្រុងព្រះសីហនុ កំពត និងកែបជាដើម។ ចំណុចនេះ បង្ហាញថាអ្នកអភិវឌ្ឍមិនគួរផ្ដោតលើទីផ្សារក្រៅស្រុកតែមួយមុខទេ តែគួរផ្ដោតលើទីផ្សារក្នុងស្រុកពិសេសអ្នកមានចំណូលកណ្ដាល និងខ្ពស់ ដែលចង់មានផ្ទះនៅតំបន់ទាំងនោះ។ និយាយឱ្យខ្លី […]
អានបន្ថែម
អាជ្ញាធរខេត្តសៀមរាបសម្រេចយកវិទ្យាល័យអង្គរធ្វើជាកន្លែងព្យាបាលអ្នកជំងឺកូវីដ កម្រិតស្រាល
មន្ទីរសុខាភិបាលខេត្ដសៀមរាប បានសម្រេចយកវិទ្យាល័យអង្គរ ដែលស្ថិតនៅក្នុងសង្កាត់សាលាកំរើក ក្រុងសៀមរាប ធ្វើជាមជ្ឈមណ្ឌលសម្រាប់ព្យាបាលជំងឺកូវីដ-១៩ កម្រិតស្រាល ចាប់ពីថ្ងៃទី ២៨ ខែមិថុនា ឆ្នាំ២០២១ តទៅ។ លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលនៃរដ្ឋបាលខេត្ដសៀមរាបបានឱ្យដឹងថា វិទ្យាល័យអង្គរនេះ មានជាង១០០បន្ទប់ ដែលអាចដាក់បានអ្នកជំងឺបានពី ៥០០ ទៅ ៦០០នាក់ ។ លោកបន្តថា ការយកវិទ្យាល័យអង្គរជាទីតាំងព្យបាល នឹងជួយសម្រួលដល់កន្លែងព្យាបាល ២ទៀត នៅមន្ទីរពេទ្យបង្អែកខេត្ដសម្រាប់អ្នកជំងឺមានកំរិតធ្ងន់ និងសង្គ្រោះបន្ទាន់ និងនៅសាលាគរុកោសល្ យនិងវិក្រឹតការខេត្ដសម្រាប់អ្នកជំងឺកម្រិតមធ្យម។ សូមបញ្ជាក់ថា ការបន្ថែមកន្លែងព្យបាលនេះ គឺដោយសារតែចំនួនការឆ្លងនៅខេត្តសៀមរាបកើនឡើងជាបន្តបន្ទាប់។ គិតត្រឹមយប់ថ្ងៃទី២៨ ខែមិថុនា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ១.០៣៤នាក់ ក្នុងនោះបានព្យាបាលជាសះស្បើយចំនួន៣៩១នាក់ និង ស្លាប់ចំនួន ១០នាក់ ៕
អានបន្ថែម
រដ្ឋគ្រោងអភិវឌ្ឍតំបន់ទេសចរណ៍ខ្នាតធំ ៦ កន្លែង ដើម្បីប្រែក្លាយខេត្តមណ្ឌលគិរីជាប៉ូលសេដ្ឋកិច្ចទី ៤
រដ្ឋាភិបាលកាលពីថ្មីៗនេះ បានចេញផែនការមេកំណត់អភិវឌ្ឍ ៦ តំបន់ធំៗ នៅក្នុងខេត្តមណ្ឌលគិរីទៅជាទិសដៅទេសចរណ៍ស្ដង់ដាសម្រាប់ទាំងភ្ញៀវជាតិ និងអន្តរជាតិ ពោលគឺដើម្បីកែប្រែខេត្តភាគឦសានមួយនេះឱ្យក្លាយទៅប៉ូលសេដ្ឋកិច្ចទី ៤ បន្ទាប់ពីភ្នំពេញ តំបន់ឆ្នេរ និងសៀមរាប។ នេះបើយោងតាមកិច្ចពិភាក្សាលើសេចក្តីព្រាងផែនការមេអភិវឌ្ឍន៍ទេសចរណ៍ ខេត្តមណ្ឌលគិរី (២០២១-២០៣០) កាលពីថ្ងៃទី២៨ ខែមិថុនា កន្លងទៅនេះ។ តំបន់អាទិភាពសំខាន់ៗទាំង ៦ ដែលត្រូវបានជ្រើសរើស រួមមាន៖ ១) តំបន់របៀងអេកូទេសចរណ៍នៃដែនជម្រកសត្វព្រៃទាំង ៥ (ដែនជម្រកសត្វព្រៃភ្នំព្រេច ណាមលៀរ លំផាត់ កែវសីមា និងស្រែពក) ដែលអនុញ្ញាតឱ្យមានតែការវិនិយោគ និងអភិវឌ្ឍសកម្មភាពទេសចរណ៍ ដែលមានការគិតគូរច្បាស់លាស់អំពីបរិស្ថានប៉ុណ្ណោះ ២) តំបន់ប៊ូស្រា-ដាក់ដាំ ដែលលើកទឹកចិត្តឱ្យមានការអភិវឌ្ឍតែសកម្មភាពអេកូទេសចរណ៍ ទេសចរណ៍ធម្មជាតិ និងវប្បធម៌ជនជាតិដើមភាគតិច។ ៣) ក្រុងសែនមនោរម្យ ដែលជាបណ្តុំសកម្មភាពទេសចរណ៍ពហុបំណង ៤) តំបន់ស្រុកអូររាំង ភ្ជាប់ជាមួយគម្រោងអភិវឌ្ឍព្រលានយន្តហោះខេត្តមណ្ឌលគិរី ដែលអាចអភិវឌ្ឍន៍ ជាតំបន់ប្រជុំជនរណប ភ្ជាប់ជាមួយក្រុងសែនមនោរម្យ (អានបន្ថែម) ៥) តំបន់ប្រជុំជននៃស្រុកកោះញែក ដែលមានសក្តានុពលក្នុងការរៀបចំអភិវឌ្ឍន៍ជាមណ្ឌលទេសចរណ៍នាពេល អនាគត ៦) តំបន់តាមច្រកព្រំដែន ដែលអនុញ្ញាតឱ្យមានការអភិវឌ្ឍជារមណីយដ្ឋានសមាហរណ ជាមួយនឹងផែនការថ្មីនេះ […]
អានបន្ថែម
ក្រុមហ៊ុនកាស៊ីណូម៉ាកាវ ពន្យារការទិញដី ១២០០ ហិកតានៅសៀមរាបម្ដងទៀត ក្រោយមានបញ្ហាជាច្រើនសារ
ក្រុមហ៊ុនកាស៊ីណូម៉ាកាវ Macau Legend ជាថ្មីម្ដងទៀត បរាជ័យលើកិច្ចព្រមព្រៀងទិញដីទំហំ ១២០០ ហិកតានៅក្នុងខេត្តសៀមរាប ដោយបញ្ជាក់ថា បច្ចុប្បន្នខ្លួនកំពុងចរចាជាមួយអ្នកលក់ ដើម្បីរកដំណោះស្រាយ។ នេះបើយោងតាមរបាយការណ៍របស់ក្រុមហ៊ុនចេញផ្សាយកាលពីថ្ងៃទី ២៨ មិថុនា។ ជាក់ស្ដែងក្រុមហ៊ុនយក្សមួយនេះ បានបង្ហាញពីផែនការបង្កើតរមណីយដ្ឋានចម្រុះមួយនៅសៀមរាបចាប់តាំងពីឆ្នាំ ២០១៨ មកម្ល៉េះ ហើយក៏បានចុះហត្ថលេខាទិញយកក្រុមហ៊ុន Howing Enterprises Co. Ltd ព្រមទាំងទិញដី ១២០០ ហិកតា ក្នុងតម្លៃ ៩០លានដុល្លារ ផងដែរ។(អានបន្ថែម) យ៉ាងណាក្ដី កាលពីខែមិថុនា ឆ្នាំ ២០២០ ក្រុមហ៊ុនបានពន្យារពេលការទិញ ដោយបញ្ជាក់ថាក្រុមហ៊ុនមិនអាចបញ្ចប់ដំណើរការវាយតម្លៃ និងការបំពេញលក្ខខណ្ឌលទ្ធកម្ម កម្មសិទ្ធិទាន់ពេល ដោយសារតែវិបត្តិកូវីដ ១៩។ (អានបន្ថែម) ជាមួយនឹងកិច្ចព្រមព្រៀងថ្មី ភាគីទាំងពីរ មានពេលដល់ថ្ងៃទី២៦ ខែមិថុនា ឆ្នាំ២០២១ ដើម្បីបញ្ចប់ការផ្ទេរកម្មសិទ្ធិ។ ប៉ុន្តែក្រុមហ៊ុនបានឱ្យដឹងកាលពីម្សិលមិញថា ការទិញដីនេះគឺមានបញ្ហាទៀតហើយ ដោយពេលក្រុមហ៊ុនកំពុងចរចាជាមួយអ្នកលក់ដើម្បីរកដំណោះស្រាយ។ គួរបញ្ជាក់ផងដែរថា ក្រុមហ៊ុនមានគោលបំណងសាងសង់រីសតចម្រុះ រួមមានជាកាស៊ីណូ និងសេវាបដិសណ្ឋារកិច្ចផ្សេងៗ ក្នុងខេត្តសៀមរាប ដោយជឿជាក់ថានឹងទទួលបានការអនុម័តពីរដ្ឋ ព្រោះទីតាំងរបស់ខ្លួនមានចម្ងាយរហូតដល់ […]
អានបន្ថែម
ថៃគ្រោងកែប្រែច្បាប់ឱ្យបរទេសអាចកាន់កាប់ដី និងផ្ទះបាន ដើម្បីជំរុញទីផ្សារអចលនទ្រព្យ
រដ្ឋាភិបាលថៃកំពុងពិចារណាផ្លាស់ប្តូរច្បាប់អន្តោប្រវេសន៍របស់ខ្លួន ដើម្បីផ្តល់សិទ្ធិឱ្យជនបរទេសគោលដៅមានសិទ្ធិទិញកាន់កាប់ដី និងផ្ទះបាន ព្រមជាមួយនឹងទិដ្ឋការរស់នៅរយៈពេលវែងដល់ទៅ ១០ឆ្នាំ ក្នុងគោលបំណងដើម្បីជំរុញសេដ្ឋកិច្ច និងទីផ្សារអចលនទ្រព្យដែលនៅទ្រឹង។ នេះបើយោងតាមសារព័ត៌មានបាងកកប៉ុស្តិ៍កាលពីថ្មីៗនេះ។ គោលនយោបាយអន្តោប្រវេសន៍ថ្មី គឺផ្ដោតលើបរទេសក្រុមអាទិភាពចំនួន ៤ រួមមាន អ្នកចូលនិវត្តន៍ដែលមានទ្រព្យសម្បត្ដិខ្ពស់ អ្នកមានទ្រព្យសម្បត្ដិខ្ពស់ទូទៅ អ្នកជំនាញធ្វើការនៅប្រទេសថៃដែលមានទ្រព្យសម្បត្ដិស្តុកស្តម្ភ និងអ្នកជំនាញខ្ពស់ទូទៅដែលធ្វើការនៅប្រទេសថៃ។ ក្រុមទាំង ៤ នឹងត្រូវមានលក្ខខណ្ឌផ្សេងៗគ្នាក្នុងការស្នើសុំ។ ជាក់ស្ដែងដូចជា អ្នកចូលនិវត្តន៍បរទេស ត្រូវមានអាយុលើសពី ៥០ ឆ្នាំ បានវិនិយោគយ៉ាងហោចណាស់ ២៥០ពាន់ដុល្លារអាមេរិក លើអចលនទ្រព្យ ឬមូលបត្របំណុលរដ្ឋាភិបាល។ អ្នកចូលនិវត្តន៍បរទេសទាំងនេះ ក៏នឹងអនុញ្ញាតឱ្យធ្វើការ ២០ម៉ោង ក្នុងមួយសប្តាហ៍ ដោយមិនចាំបាច់មានលិខិតអនុញ្ញាតធ្វើការងារទេ ប៉ុន្តែនឹងត្រូវជាប់លើប្រាក់ចំណូល ១៧%។ បើត្រូវបានអនុម័តមែន វានឹងក្លាយជាការផ្លាស់ប្តូរដ៏ធំមួយ ដែលអនុញ្ញាតឱ្យជនបរទេសទាំង ៤ ក្រុម ដែលមិនត្រឹមតែអាចទិញខុនដូបានទេ តែថែមទាំងទិញដី និងផ្ទះបានដូចជនជាតិថៃដូច្នោះដែរ។ ជុំវិញរឿងនេះ ក្រុមហ៊ុនអភិវឌ្ឍអចលនទ្រព្យថៃជាច្រើន បានសំដែងសុទិដ្ឋិនិយមថាការផ្ដាស់ប្ដូរនេះនឹងជួយជំរុញទីផ្សារអចលនទ្រព្យបានមួយកម្រិតធំ។
អានបន្ថែម
កិច្ចសន្យាទិញលក់ដីតំបន់ការពារនៅកោះកុង ដែលចុះហត្ថលេខាត្រឹមភូមិឃុំ ត្រូវមោយៈទាំងអស់
អភិបាលខេត្តកោះកុង លោកជំទាវ មិថុនា ភូថង កាលពីថ្មីៗនេះ បានបញ្ជាឱ្យមន្រ្តីរដ្ឋបាលឃុំសង្កាត់ បញ្ឈប់ការចុះហត្ថលេខាទទួលស្គាល់លើឯកសារដីធ្លីមួយចំនួនដូចជា លិខិតផ្ទេរសិទ្ធិ ពាក្យស្នើសុំកាន់កាប់ និងប្រើប្រាស់ដី លិខិតទិញលក់ដីរដ្ឋ និងការបញ្ជាក់លើប្លង់បង្ហាញទីតាំងដី ដែលធ្វើឡើងក្នុងតំបន់ការពារធម្មជាតិ និងរបៀងអភិរក្សជីវៈចម្រុះទាំងអស់ នៅខេត្តកោះកុង។ លោកជំទាវ បញ្ជាទៀតថា ឯកសារដែលបានរៀបរាប់ខាងលើ ដែលធ្លាប់បានចុះហត្ថលេខារួចហើយ ក៏នឹងត្រូវបដិសេធ និងទុកជាមោឃៈទាំងអស់ផងដែរ។ លិខិតចុះថ្ងៃទី ២៤ មិថុនា ២០២១ បានបន្តទៀតថា អភិបាលក្រុង ស្រុក ក៏នឹងត្រូវចាត់វិធានការយ៉ាងម៉ឺងមាត់ លើមន្រ្តីរដ្ឋបាលឃុំសង្កាត់ ពោលគឺហាមមិនឱ្យពួកគាត់បន្តចុះហត្ថលេខាលើឯកសារដូចដែលបានរៀបរាប់ខាងលើទៀតទេ។ លើសពីនេះ បើមន្រ្តីរដ្ឋបាលឃុំសង្កាត់នៅតែបន្ត រដ្ឋាភិបាលនឹងចាត់វិធានការធ្ងន់ធ្ងរតាមផ្លូវច្បាប់ទាំងលើម្ចាស់ដី និងលើមន្រ្តី។
អានបន្ថែម
ពេលរដ្ឋពង្រីកផ្លូវចូលដីឯកជន តើអ្នកនឹងទទួលបានសំណងឬទេ?
មួយរយៈពេលចុងក្រោយនេះ ឃើញថាមានគម្រោងស្ថាបនា និងពង្រីកហេដ្ឋារចនាសម្ព័ន្ធផ្លូវជាច្រើន។ ស្របគ្នានេះ ក៏ឃើញថា មានផ្ទះសម្បែង និងសំណង់ជាច្រើន ត្រូវបានវាយកម្ទេច ឬបញ្ជាឱ្យរុះរើក្នុងអំឡុងពេលសាងសង់។ លើសពីនេះ ឃើញថាអ្នកខ្លះទទួលបានសំណងពីរដ្ឋ ឯអ្នកខ្លះទៀតមិនបានអ្វីទាំងអស់។ មកស្វែងយល់ថា មូលហេតុអ្វី? បើតាមផ្លូវច្បាប់ លោកអ្នកអាចនឹងទទួលបានសំណង ឬមិនបានសំណង គឺវាអាស្រ័យលើច្រើនកត្តា ដោយផ្អែកលើច្បាប់ ៣ ធំៗ គឺ៖ ១) ច្បាប់ភូមិបាលឆ្នាំ២០០១ ២) អនុក្រឹត្យលេខ ១៩៧ ស្តីពីការគ្រប់គ្រងដីចំណីតាមបណ្តាញផ្លូវជាតិ និងផ្លូវរថភ្លើង ឆ្នាំ២០០៩ ៣) អនុក្រឹត្យលេខ ៨៦ អនក្រ.បក ឆ្នាំ១៩៩៧ ស្តីពីលិខិតអនុញ្ញាតសាងសង់ ក្នុងករណីដែលរដ្ឋត្រួតពិនិត្យឃើញថា ការកាន់កាប់ដី ឬសំណង់របស់អ្នកផ្ទុយនឹងច្បាប់ទាំង ៣ខាងលើ ជាស្វ័យប្រវត្តិ អ្នកនឹងមិនទទួលបានសំណងឡើយ។ ប៉ុន្តែក្នុងករណីដែលការកាន់កាប់ដី ឬសំណង់របស់អ្នក ស្របតាមច្បាប់ទាំង ៣ខាងលើ អ្នកនឹងទទួលបានសំណងពីរដ្ឋទាំងសម្រាប់តម្លៃដី និងតម្លៃសំណង់លើដី។ ប៉ុន្តែករណីខ្លះវានឹងស្មុគស្មាញ ឧទាហរណ៍ដូចជានៅពេលដែលការកាន់កាប់ដី ឬសំណង់ របស់អ្នកគឺស្របតាមច្បាប់ណាមួយ តែបែរជាទៅផ្ទុយនឹងច្បាប់ណាមួយផ្សេងទៀតទៅវិញ។ ក្នុងករណីនេះ អ្នកអាចនឹងបានសំណងខ្លះ-អត់ខ្លះ […]
អានបន្ថែម
ពលរដ្ឋក្រីក្រជាង ១,៥ ម៉ឺនគ្រួសារ នឹងទទួលបានដីឥតគិតថ្លៃពីរដ្ឋក្រោយគម្រោង LASED បញ្ចប់
ក្រសួងរៀបចំដែនដី នគរូបនីយកម្ម និងសំណង់ កាលពីព្រឹកមិញនេះ បានបើកសិក្ខាសាលាចាប់ផ្តើមអនុវត្តគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣ ឬ LASED III ដោយរំពឹងថាពលរដ្ឋក្រីក្រប្រមាណ ១៥ ០០០ គ្រួសារ នឹងទទួលបានដីសម្រាប់រស់នៅ ក្រោយបញ្ចប់គម្រោងនៅឆ្នាំ ២០២៦។ សិក្ខាសាលានេះ ចូលរួមដោយ ឯកឧត្តម ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងលោកស្រី Mariam J. Sherman នាយិកាធនាគារពិភពលោកប្រចាំប្រទេសកម្ពុជា ឡាវ និងមីយ៉ាន់ម៉ា ព្រមទាំងភាគីពាក់ព័ន្ធប្រមាណជា ៥៥០នាក់។ គម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ឬស្គាល់ជាទូទៅថា LASED គឺជាកម្មវិធីផ្ដល់ដីធ្លីជូន ប្រជាជនក្រីក្រ និងជនជាតិដើមភាគតិចនៅតាមបណ្ដាខេត្តនានាទូទាំងប្រទេស។ (អានបន្ថែម) គម្រោងនេះ ចាប់អនុវត្តដោយបែងចែកជា៣ដំណាក់កាល គឺដំណាក់កាលទី១ (LASED-I ) ឆ្នាំ២០០៨-២០១៥ ដំណាក់កាលទី២ (LASED-II) […]
អានបន្ថែម
រដ្ឋចេញបទបញ្ជាថ្មី សម្រេចលែងឱ្យលក់ផ្តាច់ដីសម្បទានសេដ្ឋកិច្ច និងដីចំការកៅស៊ូអវិនិយោគ ទៀតហើយ
រាជរដ្ឋាភិបាលកម្ពុជា កាលពីថ្មីៗនេះ បានចេញបទបញ្ជាថ្មីសម្រេចបិទបញ្ជប់លែងឱ្យមានការលក់ផ្តាច់ និងដោះដូរដីសម្បទានសេដ្ឋកិច្ច និងដីចំការកៅស៊ូអវិនិយោគ* ទាំងអស់ទូទាំងប្រទេស ក្នុងគោលបំណងដើម្បីពង្រឹងការគ្រប់គ្រង បែងចែក និងប្រើប្រាស់ដី។ នេះបើតាមបទបញ្ជាលេខ ០១ បប ចុះថ្ងៃទី ០៧ ខែមេសា ឆ្នាំ២០២១។ ដោយឡែក បើយោងតាមប្រភពដដែល ក៏មានករណីលើកលែងមួយចំនួនផងដែរ។ ក្រុមហ៊ុនខ្លះក៏អាចទិញផ្តាច់ ឬដោះដូរសម្បទានដីសេដ្ឋកិច្ចបាន ប៉ុន្តែត្រូវផ្តល់សំណងសមស្របទៅនឹងទំហំដីជូនប្រជាពលរដ្ឋ និងត្រូវមានគម្រោងជាក់លាក់ក្នុងការប្រើប្រាស់ដីនោះ។ លើសពីនេះ ចំពោះការលក់ផ្តាច់ និងការដោះដូរ ដែលកើតឡើងមុនបទបញ្ជានេះចូលជាធរមាន រដ្ឋាភិបាលនៅតែបន្តអនុញ្ញាតឱ្យក្រុមហ៊ុននោះមានសិទ្ធិលើដីដដែល។ ប៉ុន្តែ ក្រុមហ៊ុនទាំងនោះត្រូវតែគោរពតាមនីតិវិធី និងកិច្ចសន្យា បើពុំដូច្នេះទេ រាជរដ្ឋាភិបាលអាចនឹងដកហូតសម្បទានដីសេដ្ឋកិច្ចនោះមកវិញបាន។ *គួរបញ្ជាក់ថា ដីចំការកៅស៊ូអវិនិយោគ ជាប្រភេទដីចំការដែលរដ្ឋឈប់ធ្វើការវិនិយោគ ដោយផ្ទេរការវិនិយោគ ទៅឱ្យឯកជនជាអ្នកអភិវឌ្ឍដែលជាដៃគូរបស់រដ្ឋ ជាអ្នកវិនិយោគវិញ។
អានបន្ថែម