បញ្ហាបូរីធំៗខ្លះបញ្ឈប់ការសាងសង់ នឹងបង្កហានិភ័យដល់ទីផ្សារអចលនទ្រព្យកម្ពុជាទេ?

• ១ មេសា ២០២៣
• ព័ត៌មានក្នុងស្រុក
• 2305 មើល

ថ្មីៗនេះ គម្រោងបូរីមួយចំនួន ដែលភាគច្រើនជាបូរីផ្ដោតលើអតិថិជនចំណូលទាប និងមធ្យម បានបញ្ឈប់ការសាងសង់  ដែលបង្កជាបញ្ហាចម្រូងចម្រាសជាខ្លាំងរវាងម្ចាស់បុរី និងអតិថិជន រហូតដល់មានការធ្វើបាតុកម្មបិទផ្លូវសាធារណៈជាដើម។

បើក្រឡេកមើលមួយភ្លែត  នេះហាក់គ្រាន់តែជាបញ្ហា​ឯកជន ឬជម្លោះផ្ទាល់ខ្លួនរវាងអតិថិជន និងម្ចាស់បូរិ ប៉ុន្តែបើស្ថានភាពដូចខាងលើ កើតឡើងលើបូរីផ្សេងៗ ជាបន្ដបន្ទាប់ តើទីផ្សារអចលនទ្រព្យកម្ពុជាទាំងមូលនឹងរងហានិភ័យឬទេ? ជនរងគ្រោះជានរណា? ហើយសំខាន់ជាងនេះ តើមានច្រកចេញទេសម្រាប់បញ្ហានេះ?

លោក សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បាន​ឱ្យដឹងថា បញ្ហាដែលកើតមាន គឺបង្កពីឥទ្ធិពលអវិជ្ជមានសេសសល់ពីវិបត្តិកូវីដ បញ្ហាសេដ្ឋកិច្ចពិភពលោក និងវិបត្តិសង្គ្រាម ដែលធ្វើឱ្យអត្រាការលក់មានការថមថយជាខ្លាំង។

«បូរីខ្លះគាត់ រំពឹងយកសាច់ប្រាក់ពីការកក់ ឬការលក់ ដើម្បីមកចំណាយលើថ្លៃដី និងសាងសង់ផ្ទះ ដូច្នេះ ដោយសារការលក់មិនសូវដើរទៅមុខ គាត់ត្រូវពន្យារពេលសាងសង់ ហើយបើនៅតែលក់មិនបាន គាត់ត្រូវបង្ខំចិត្តបញ្ឈប់គម្រោងតែម្ដង។ នេះជាបញ្ហាដែលយើងឃើញនាពេលបច្ចុប្បន្ន»។

ប៉ុន្តែ លោកយល់ថា បញ្ហាដែលកើតមានគឺកើតឡើងលើត្រឹម ២ ទៅ ៣ ប៉ុណ្ណោះ ហើយបញ្ហានៅជាកម្រិតតូច ពោលគឺរវាងអ្នកលក់ និងអ្នកទិញ។ ដូច្នេះ ក្នុងដំណាក់កាលនេះ នឹងមិនទាន់ប៉ះពាល់ ដល់ទីផ្សារទាំងមូលទេ។

ដូចគ្នានេះ អ្នកស្រីអាន សុធីតា អគ្គនាយិកាក្រុមហ៊ុន PropNex Cambodia បានយល់ឃើញថា វិបត្តិនេះជាការជម្រុះចោលនូវអ្នកអភិវឌ្ឍដែលមិនសូវមានសេ្ថរភាពហិរញ្ញវត្ថុ និងជំនាញច្បាស់លាស់ពីទីផ្សារ ដែលជាកត្តាល្អដល់ទីផ្សារទៅវិញទេ។

លោកស្រីថា បញ្ហាដែលកំពុងកើតមានលើបូរីទាំងនេះ គឺជាមេរៀនដល់អតិថិជនឱ្យមានភាពប្រុងប្រយ័ត្នជាងមុន ក្នុងការវិនិយោគ។

«អ្នកអភិវឌ្ឍខ្លះគាត់ឃើញគេធ្វើអាជីវកម្មបូរីហើយរីកចម្រើន គាត់ក៏ចង់ចូលប្រឡូកដែរ ដោយខ្វះទាំងជំនាញ បទពិសោធន៍ និងខ្វះទាំងហិរញ្ញវត្ថុ។ ដោយសារគាត់ថ្មី គាត់ត្រូវលក់ក្នុងតម្លៃទាប ដើម្បីទាក់ទាញអ្នកទិញ។  ដូច្នេះនៅពេលគ្មានអ្នកទិញ គាត់នឹងស្ទះចរន្តសាច់ប្រាក់ ហើយមិនអាចសាងសង់បាន» អ្នកស្រីមានប្រសាសន៍។

«ប៉ុន្តែ មិនមែនបូរី ២ ទៅ ៣ គម្រោង ផ្អាកគម្រោង បានន័យថាទីផ្សារទាំងមូលនឹងរលំនោះទេ ព្រោះបូរីខ្លះនៅតែមានការលក់បានល្អ និងមានភាពនឹងនរ។ នេះជាការបង្ហាញថា អ្នកអភិវឌ្ឍដែលគ្មានស្ថិរភាពនឹងបាត់ខ្លួនទៅម្ដងមួយៗ ហើយអ្នកដែលអាចនៅឈរជើងបានគឺសុទ្ធជាអ្នកអភិវឌ្ឍមានគុណភាព» លោកស្រីបន្ដ។​

យ៉ាងណាមិញ លោកស្រីក៏បានលើកទឹកចិត្តឱ្យអ្នកទិញពិចារណាឱ្យបានច្បាស់លាស់ និងត្រួតពិនិត្យប្រវត្តិ បទពិសោធន៍ កម្មសិទ្ធិដី អាជ្ញាបណ្ណ និងឯកសារស្របច្បាស់របស់អ្នកអភិវឌ្ឍឱ្យច្បាស់មុននឹងសម្រេចចិត្តទិញ។

ទោះជាវិបត្តិនេះ នៅមិនទាន់ជះឥទ្ធិពលដល់វិស័យអចលទ្រព្យទាំងមូលក្ដី ប៉ុន្តែអ្នករងគ្រោះគឺប្រជាជនដែលមានចំណូលទាប និងមធ្យម ដែលខំសន្សំប្រាក់កាស ដើម្បីទិញផ្ទះជ្រកកោនសមរម្យមួយ ប៉ុន្តែចុងក្រោយមកជួបនឹងវិបត្តិ ព្រោះការដោះស្រាយតាមផ្លូវច្បាប់នឹងប្រើរយៈពេលយូរ ដែលនឹងប៉ះពាល់ដល់ជីវភាពរស់នៅរបស់ពួកគាត់។

បើវិភាគឱ្យជ្រៅ បញ្ហានេះកើតចេញពីច្បាប់និងបទបញ្ញត្តិ ដែលនៅធូររលង់ ពោលគឺអ្នកណាក៏អាចធ្វើជាអ្នកអភិវឌ្ឍបាន។

ជាក់ស្ដែង លក្ខន្តិកៈដើម្បីក្លាយជាអ្នកអភិវឌ្ឍ ត្រូវតែតឹងរឹងជាងមុន ពិសេសលើស្ថានភាពហិរញ្ញវត្ថុ និងបទពិសោធន៍។ រដ្ឋាភិបាលត្រូវមានបទបញ្ញត្តិដែលធានាថា អ្នកវិនិយោគនឹងមានហិរញ្ញវត្ថុគ្រប់គ្រាន់  មុ​​​នអនុម័តឱ្យពួកគាត់ក្លាយជាម្ចាស់គម្រោង ឬមុនអនុញ្ញាតឱ្យពួកគាត់ចាប់ផ្ដើមលក់គម្រោង។

លើសពីនេះ រដ្ឋាភិបាលក៏ត្រូវបន្តឹងការអនុវត្ត ដោយច្បាប់ចុះបង្រ្កាបម្ចាស់គម្រោង ដែលមិនស្របច្បាប់ចេញពីទីផ្សារឱ្យអស់ ដើម្បីបង្ការបញ្ហា។ បើមិនមានច្បាប់តឹងរឹងទេ បញ្ហាដូចខាងលើនឹងកើតមានជាបន្ដបន្ទាប់ ហើយមិនមែនត្រឹមតែបូរីនោះទេ ដីឡូតិ៍ក៏ប្រឈមនឹងវិបត្តិដូចគ្នាដែរ ហើយជនរងគ្រោះ គឺប្រជាជនដែលមានចំណូលទាប និងមធ្យម។ (អានបន្ថែម)

យ៉ាងណាមិញ  ឃើញថារដ្ឋាភិបាលបាន និងកំពុងចេញបទបញ្ញត្តិនានាជាបន្តបន្ទាប់ហើយ ដើម្បីដោះស្រាយបញ្ហាទាំងនេះ។

• អត្ថបទវិភាគ