អនាគតនៃការអភិវឌ្ឍន៍ហេដ្ឋារចនាសម្ព័ន្ធ និងឧស្សាហកម្មសំណង់នៅប្រទេសកម្ពុជា

• ២៣ កក្កដា ២០១៩
• ព័ត៌មានក្នុងស្រុក
• 4582 មើល

នៅក្នុងប៉ុន្មានទសវត្សរ៍កន្លងមកនេះ ប្រទេសកម្ពុជាបានចាប់ផ្តើមអនុវត្តការអភិវឌ្ឍន៍ហេដ្ឋារចនាសម្ព័ន្ធប្រកបដោយមហិច្ឆតាខ្ពស់ ដោយឆ្ពោះទៅកាន់ការកសាងអាកាសយានដ្ឋាន ស្ពាន ទំនប់អគ្គិសនី ផ្លូវ និងកំពង់ផែសមុទ្រដែលចាំបាច់នានា។ ទោះជាយ៉ាងនេះក្តី ប្រទេសកម្ពុជានៅតែជាប់ចំណាត់ថ្នាក់លេខ ១១២ ក្នុងចំណោមប្រទេសចំនួន ១៣៧ លើផ្នែកហេដ្ឋារចនាសម្ព័ន្ធ ដែលនេះគឺស្ថិតនៅពីក្រោយប្រទេសជិតខាងក្នុងតំបន់អាស៊ីអាគ្នេយ៍ នេះបើយោងតាមរបាយការណ៍ចុងក្រោយរបស់វេទិកាសេដ្ឋកិច្ចពិភពលោកស្តីអំពីការប្រកួតប្រជែងក្នុងសកល។ របាយការណ៍មួយនេះបានបង្ហាញបន្ថែមទៀតថា ហេដ្ឋារចនាសម្ព័ន្ធនៅកម្ពុជានៅមិនទាន់គ្រប់គ្រាន់នៅឡើយទេ ហើយត្រូវបានចាត់ទុកថា ជាបញ្ហាចម្បងមួយក្នុងចំណោមបញ្ហាសំខាន់បំផុតសម្រាប់ការធ្វើអាជីវកម្មនៅក្នុងប្រទេសកម្ពុជា។

នៅក្នុងប៉ុន្មានឆ្នាំចុងក្រោយនេះ ប្រទេសចិនបានផ្តល់មូលនិធិដល់គម្រោងហេដ្ឋារចនាសម្ព័ន្ធជាច្រើននៅប្រទេសកម្ពុជា ចាប់ពីបណ្តាញផ្លូវហាយវ៉េទៅដល់ផ្លូវដែក និងកំពង់ផែ។ ការវិនិយោគទាំងនេះបានផ្តល់ឱកាសសម្រាប់កម្ពុជាក្នុងការវិនិយោគលើគម្រោងហេដ្ឋារចនាសម្ព័ន្ធក្នុងស្រុក ដែលមិនត្រឹមតែធ្វើឲ្យប្រសើរឡើងនូវប្រសិទ្ធភាពក្នុងស្រុកនោះទេ តែថែមទាំងបង្កើនការតភ្ជាប់ជាមួយប្រទេសជិតខាងដូចជាប្រទេសថៃ និងវៀតណាម។ រហូតមកដល់ពេលនេះ ការដឹកជញ្ជូនតាមផ្លូវគោកគឺមានចំណែកលើសពី ៨០ ភាគរយនៃទំហំដឹកជញ្ជូនសរុបរបស់កម្ពុជា។ សម្រាប់ការអភិវឌ្ឍន៍ផ្លូវដែក ប្រព័ន្ធផ្លូវដែកដែលមានប្រសិទ្ធភាពនឹងមិនត្រឹមតែជួយក្នុងការធ្វើដំណើររបស់អ្នកដំណើរទេ ប៉ុន្តែថែមទាំងជួយជំរុញការដឹកជញ្ជូនទំនិញផងដែរ។

ការកសាងហេដ្ឋារចនាសម្ព័ន្ធក៏បើកផ្លូវយ៉ាងទូលាយលើឱកាសអាជីវកម្ម និងការវិនិយោគសម្រាប់សហគ្រាសក្នុងស្រុក និងសហគ្រាសបរទេសផងដែរ។ ឱកាសពាណិជ្ជកម្ម និងការវិនិយោគនៅកម្ពុជាកំពុងទាក់ទាញចំណាប់អារម្មណ៍វិនិយោគិនបរទេស ដោយប្រទេសនេះ ទទួលបានការវិនិយោគផ្ទាល់ពីបរទេសខ្ពស់ក្នុងឆ្នាំ ២០១៨។ លើសពីនេះ ដើម្បីឱ្យកម្ពុជារក្សាតំណែងរបស់ខ្លួនជាមជ្ឈមណ្ឌលផលិតកម្ម រដ្ឋាភិបាលគួរតែសង្កត់ធ្ងន់លើការដឹកជញ្ជូន និងការអភិវឌ្ឍន៍អគ្គិសនីនៅតំបន់ឧស្សាហកម្ម។ ការវិនិយោគដោយផ្ទាល់នឹងកើនឡើង បើសិនជាវាត្រូវបានសំដៅឆ្ពោះទៅរកអគ្គីសនី សំណង់ ផលិតកម្ម និងសកម្មភាពអចលនទ្រព្យ។

ដោយសារតែឧស្សាហកម្មសំណង់របស់ប្រទេសកម្ពុជាត្រូវបានព្យាករណ៍ថានឹងពង្រីកបន្ថែម វាក៏បានបង្កើតឱ្យមានតម្រូវការយ៉ាងខ្លាំងសម្រាប់គ្រឿងចក្រសំណង់ដូចជា ម៉ាស៊ីនស្ទូច ម៉ាស៊ីនជីក និងគ្រឿងចក្រធុនធ្ងន់ផ្សេងទៀត។ ដើម្បីរក្សាការប្រកួតប្រជែង កម្ពុជាក៏ត្រូវធ្វើឲ្យប្រសើរឡើងនូវការវិនិយោគហេដ្ឋារចនាសម្ព័ន្ធ ដែលត្រូវបានរាំងស្ទះដោយការចំណាយលើហេដ្ឋារចនាសម្ព័ន្ធមិនគ្រប់គ្រាន់ ឱនភាពសារពើពន្ធជាប់លាប់ និងការកើនឡើងបំណុលសាធារណៈ។ លុះត្រាតែកម្ពុជាកែលម្អការដឹកជញ្ជូនរបស់ខ្លួន កម្ពុជានឹងមិនអាចធ្វើសមាហរណកម្មជាមួយបណ្តាប្រទេសសេដ្ឋកិច្ចក្នុងតំបន់អាស៊ីអាគ្នេយ៍ដទៃទៀតបានឡើយ។

រហូតមកដល់ពេលនេះ ប្រទេសកម្ពុជាមានទំនាក់ទំនងយ៉ាងជិតស្និទ្ធទៅនឹងប្រទេសដែលមានសេដ្ឋកិច្ចធំបំផុតនៅអាស៊ីដូចជា ប្រទេសចិន និងប្រទេសជប៉ុន។ កម្ពុជាអាចទទួលបានជោគជ័យ បើសិនជាប្រទេសនេះធ្វើឱ្យមានទំនាក់ទំនងគ្នាទៅវិញទៅមក និងធ្វើឱ្យប្រសើរឡើងនូវផលិតកម្ម និងហេដ្ឋារចនាសម្ព័ន្ធរបស់ខ្លួន។ លើសពីនេះទៀត លទ្ធផលដែលកាន់តែមានឥទ្ធិពលថែមទៀតនោះ គឺអាចសម្រេចបានប្រសិនបើកម្ពុជាអាចធ្វើទំនាក់ទំនងសេដ្ឋកិច្ចយ៉ាងជិតស្និទ្ធជាមួយទាំងប្រទេសចិន និងប្រទេសជប៉ុន។ ប្រសិនបើប្រទេសកម្ពុជាកាន់តែមានការប្រកួតប្រជែងនៅក្នុងតំបន់អាស៊ីអាគ្នេយ៍ និងមានផលិតភាពក្នុងស្រុកកាន់តែច្រើននោះ វានឹងនាំមកនូវការងារល្អប្រសើរ និងប្រាក់ចំណូលខ្ពស់សម្រាប់ប្រជាជនក្នុងស្រុក។ វាអាចបើកនូវជំពូកថ្មីនៃឱកាសវិនិយោគ និងការបង្កើតទ្រព្យសម្បត្តិសម្រាប់អាជីវកម្ម និងសហគ្រិនក្នុងស្រុក និងបរទេស។ ជាលទ្ធផល វិស័យប្រពៃណីដូចជា សំណង់ និងអចលនទ្រព្យទាំងអស់នឹងទទួលបានប្រយោជន៍។

• អត្ថបទវិភាគ
• ធុរកិច្ច និងទីផ្សារ
• គម្រោងអភិវឌ្ឍន៍
• នគរូបនីយកម្ម និងស្ថាបត្យកម្ម