អនាគតនៃការអភិវឌ្ឍការិយាល័យចំណែកឯកជននៃអគារសហកម្មសិទ្ធ

• ១២ មករា ២០១៨
• ព័ត៌មានក្នុងស្រុក
• 2295 មើល

អចលនទ្រព្យចំណែកឯកជននៃអគារសហកម្មសិទ្ធ គឺជាអចលនទ្រព្យនៃចំណែកឯកជនក្នុងអគារសហកម្មសិទ្ធត្រូវបានលក់ដោយអ្នកប្រើប្រាស់ចុងក្រោយ ឬវិនិយោគិន។ ថ្មីៗនេះមានការចាប់អារម្មណ៍កាន់តែច្រើនឡើងៗពីវិនិយោគិនស្វែងរកផលចំណេញ ដោយពួកគេស្វែងរកនូវជម្រើសវិនិយោគលើអគារការិយាល័យជំនួសឲ្យការវិនិយោគលើអគារខុនដូ។

កាលពីមុន គេស្ទើរតែមិនឃើញមានចំណែកឯកជននៃអគារការិយាល័យក្នុងអគារសហកម្មសិទ្ធត្រូវបានដាក់លក់នៅលើទីផ្សារនោះទេ ខណៈដែលមានយូនីតខុនដូលំនៅឋានថ្មីៗរាប់ពាន់ត្រូវបានដាក់លក់។ តាមលោកស្រី ចាន់ ម្លប់សុខា មកពីក្រុមហ៊ុនមេធាវី សុខា បានឲ្យដឹងថា “អត្រាផលចំណេញកំពុងកើនឡើងនៅក្នុងអត្រាខ្ពស់ជាង បើសិនវិនិយោគិនទិញអចលនទ្រព្យប្រភេទផ្សេងក្រៅពីយូនីតខុនដូលំនៅឋាន”។

ការិយាល័យចំណែកឯកជនក្នុងអគារសហកម្មសិទ្ធនឹងកើនដល់ ៣០ភាគរយ នៃចំណែកអគារសហកម្មសិទ្ធនាពេលអនាគតនៅក្រុងភ្នំពេញ ដោយមានទំហំអគារការិយាល័យជាង ១០០,០០០ម៉ែត្រការ៉េ នៅទីតាំងក្រៅតំបន់ពាណិជ្ជកម្ម (CBD)។ យូនីតការិយាល័យចំណែកឯកជននាពេលអនាគតអាចជាអគារកម្រិត A ឬអគារកម្រិត B។ ជាទូទៅកម្រិតនៃការកាន់កាប់ ឬជួលនូវយូនីតការិយាល័យចំណែកឯកជន គឺទាបជាងអាគារឯកកម្មសិទ្ធិដែលមានថ្លៃជួលទាបជាង។

នេះក៏ព្រោះតែអ្នកជួល ជាពិសេសក្រុមហ៊ុនពហុជាតិ ចូលចិត្តអគារឯកកម្មសិទ្ធច្រើនជាង។ ពួកគេយល់ថាការគ្រប់គ្រងអចលនទ្រព្យគឺល្អប្រសើរជាង ដោយសារពួកគេមិនចាំបាច់ត្រូវដោះស្រាយជាមួយភតិបតីច្រើនដែលជាម្ចាស់ទីតាំងជួលរបស់ពួកគេ។ ម៉្យាងទៀត ប្លង់តាមជាន់នៃការិយាល័យចំណែកឯកជនក្នុងអគារសហកម្មសិទ្ធមិនសូវមានប្រសិទ្ធភាពច្រើនទេ ដោយយូនីតទាំងនេះមិនអាចបែងចែកបន្តទៀតដោយសារតែឧបសគ្គខាងការរចនាប្លង់។ នេះមានន័យថាមានតែភតិកៈដែលត្រូវការកន្លែងជាក់លាក់ដែលផ្តល់ជូនដោយអគារនៃចំណែកឯកជនប៉ុណ្ណោះដែលចាប់អារម្មណ៍ ខណៈដែលនៅក្នុងអាគារឯកកម្មសិទ្ធមានភាពបត់បែនច្រើនសម្រាប់ភតិបតីក្នុងការបែងចែកទីកន្លែងបន្តដើម្បីឆ្លើយតបនឹងតម្រូវការរបស់ភតិកៈ។

លើសពីនេះ តម្រូវការពីអ្នកទិញចុងក្រោយសម្រាប់កន្លែងចំណែកឯកជននៅមានកម្រិត ដោយសារថាក្រុមហ៊ុនពហុជាតិភាគច្រើន ចូលចិត្តជួលជាងធ្វើជាម្ចាស់ទីកន្លែង។ អាជីវកម្មជាច្រើនជឿថាដើមទុនរបស់ពួកគេគួរត្រូវបានប្រើនៅក្នុងអាជីវកម្មស្នូលរបស់ពួកគេ មិនមែននៅក្នុងការវិនិយោគលើទីកន្លែងនោះទេ។ ដូចគ្នាដែរ ក្រុមហ៊ុនពហុជាតិទាំងនេះចង់មានភាពបត់បែនក្នុងការពង្រីក ឬបង្រួមតម្រូវការទំហំការិយាល័យរបស់ពួកគេ។ ពួកគេចូលចិត្តជួលជាជាងធ្វើជាម្ចាស់កម្មសិទ្ធិទីកន្លែង ព្រោះពួកគេមិនចាំបាច់ត្រូវជាប់គាំងជាមួយនិងទីកន្លែងដែល គេធ្វើជាម្ចាស់។ ដើម្បីឆ្លើយតបនឹងតម្រូវការនាពេលអនាគត ក្រុមហ៊ុនតូចៗចង់បានភាពបត់បែនក្នុងការជួល ខណៈដែលក្រុមហ៊ុនធំៗប្រហែលជាចង់បានកម្មសិទ្ធលើអចលនទ្រព្យ ដែលជាកម្មសិទ្ធលើអគារទាំងមូលជាជាងកម្មសិទ្ធលើប៉ុន្មានជាន់នៃអគារការិយាល័យចំណែកឯកជន។

លើសពីនេះទៀត ការិយាល័យចំណែកឯកជនក្នុងអគារសហកម្មសិទ្ធ គឺខុសគ្នាខ្លាំងពីយូនីតខុនដូសម្រាប់ជួល។ ប្រាក់ចំណូលពីភតិកៈលំនៅឋានគឺមានខ្ពស់ជាង ព្រោះថាការជួលជាធម្មតាមានរយៈពេលត្រឹមតែមួយឆ្នាំ។ ផ្ទុយទៅវិញ ការជួលការិយាល័យភាគច្រើននៅភ្នំពេញគឺសម្រាប់រយៈពេល៣ឆ្នាំ ហើយភតិកៈដែលជួលការិយាល័យទាំងនោះទំនងជានៅទីកន្លែងជួលនោះក្នុងរយៈពេលយូរ ព្រោះថាពួកគេបានវិនិយោគដើមទុនច្រើននៅក្នុងការរៀបចំទីកន្លែងនេះ។ នេះមានន័យថាប្រាក់ចំណូលពីការជួលការិយាល័យមានស្ថិរភាពជាងប្រាក់ចំណូលពីការជួលលំនៅឋានព្រោះវិនិយោគិនមិនចាំបាច់ស្វែងរកភតិកៈថ្មីរៀងរាល់ឆ្នាំ ពោលគឺលំហូរប្រាក់ចំណូលពីការជួលរបស់ពួកគេមានមិនដាច់នោះទេ នៅពេលដែលអចលនទ្រព្យនៅទំនេរ។ ម៉្យាងទៀត ពួកគេមិនចាំបាច់ចំណាយថ្លៃឈ្នួលភ្នាក់ងារញឹកញាប់ដើម្បីស្វែងរកភតិកៈថ្មីនោះទេ។

ការគ្រប់គ្រងយូនីតការិយាល័យចំណែកឯកជនក្នុងអគារសហកម្មសិទ្ធជាទូទៅក៏មានភាពងាយស្រួលជាង។ សម្រាប់ភតិកៈដែលជួលការិយាល័យ ពួកគេត្រូវទទួលខុសត្រូវក្នុងការជួសជុលអាគារឡើងវិញឲ្យដូចសភាពមុនពេលប្រគល់នៅពេលពួកគេចាកចេញពីអគារ (ថ្លៃចំណាយលើការតុបតែងឡើងវិញសម្រាប់ការិយាល័យចំណែកឯកជននេះនឹងទាបជាងតម្លៃចំណាយសម្រាប់អចលនទ្រព្យលំនៅឋាន)។

លោក ឆាយ លាងងួន នាយកប្រតិបត្តិក្រុមហ៊ុន Ratanaka Realty បានលើកឡើថថា “ខ្ញុំគិតថា ទីកន្លែងការិយាល័យគឺជាការវិនិយោគដ៏ល្អ។ ក្រុមហ៊ុនកាន់តែច្រើនឡើងៗកំពុងផ្លាស់ចេញពីការិយាល័យនៅផ្ទះវីឡាទៅរកអគារបែបវិជ្ជាជីវៈ ព្រោះតែវាមានតម្លៃថោកជាងសម្រាប់ការជួលអគារបែបវិជ្ជាជីវៈ បើគិតពីការទទួលបានសេវាសន្តិសុខ កន្លែងចំណតយានយន្ត និងកន្លែងផ្តល់សេវាផ្សេងៗទៀតរួមគ្នា។”

ក្នុងប៉ុន្មានឆ្នាំថ្មីៗនេះ មានវិនិយោគិនកាន់តែច្រើនឡើងៗចាប់ផ្តើមទិញយូនីតការិយាល័យចំណែកឯកជនក្នុងអគារសហកម្មសិទ្ធ។ តាមទស្សនវិស័យរបស់វិនិយោគិន ពួកគេចាប់អារម្មណ៍នឹងផលទទួលបានមកវិញដែលមានស្ថិរភាពជាង និងខ្ពស់ជាងខុនដូលំនៅឋាន ហើយដែលមានការផ្គត់ផ្គង់ថ្មីតិចជាងបើធៀបទៅនឹងយូនីតខុនដូលំនៅឋាន។

ខ្ញុំរំពឹងថានឹងមានអ្នកអភិវឌ្ឍន៍ច្រើនឡើងចាប់ផ្ដើមបើកយូនីតការិយាល័យចំណែកឯកជនក្នុងអគារសហកម្មសិទ្ធថ្មីៗ។ ទោះជាយ៉ាងណា និន្នាការនេះមិនមានចំពោះគ្រប់យូនីតការិយាល័យចំណែកឯកជននោះទេ ព្រោះថាអាគារដែលពិបាកចូលទៅដល់ ឬគ្រប់គ្រងមិនបានល្អនឹងទទួលបានការចាប់អារម្មណ៍តិចក្នុងការជួល។

• អត្ថបទវិភាគ
• ចំណេះដឹង និង បទពិសោធន៍