រដ្ឋាភិបាលប្រទេសជប៉ុន និងសហរដ្ឋអាមេរិក សុទ្ធតែបានបន្តផ្តល់ជំនួយជាថវិកាសរុបប្រមាណ ១.១៥០.០០០ ដុល្លាអាមេរិក ដើម្បីបន្តអនុវត្តគម្រោងអភិរក្ស និងជួសជុសប្រាសាទខ្មែរ។ នេះបើតាមលទ្ធផលនៃកិច្ចប្រជុំបច្ចេកទេសលើកទី៤២ នៃអាយស៊ីស៊ី-អង្គរ/សំបូរពគុក កាលថ្ងៃទី ៩ ដល់ទី ១០ ខែមិថុនា ឆ្នាំ ២០២៦ ដឹកនាំដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងតំណាងឯកអគ្គរាជ/រដ្ឋទូត ក្រសួង/ស្ថាប័នជាតិ និងអន្តរជាតិសរុប៣០០នាក់។
អង្គប្រជុំនោះ បានឱ្យដឹងថា រដ្ឋាភិបាលប្រទេសជប៉ុន បានបន្តផ្តល់ជំនួយថវិកាចំនួន ៩០០.០០០ដុល្លារអាម៉េរិក ដើម្បីបន្តអនុវត្តគម្រោងអភិរក្ស និងជួសជុសប្រាសាទបាយ័ន សម្រាប់ដំណាក់កាលទីប្រាំពីរ។ ចំណែកឯ រដ្ឋាភិបាលសហរដ្ឋអាមេរិក ក៏បានប្រកាសបន្តផ្តល់ជំនួយថវិកាចំនួន ២៥០.០០០ដុល្លារអាម៉េរិក ជូនអង្គការមូលនិធិប្រាសាទពិភពលោក (WMF) ដើម្បីបន្តអនុវត្តគម្រោងអភិរក្ស និងជួសជុលប្រាសាទភ្នំបាខែងផងដែរ។
សូមជម្រាបដែរថា តាមរយៈជំនួបខាងលើ ភាគីពាក់ព័នបានសម្តែងការពេញចិត្តចំពោះលទ្ធផលនៃគម្រោងអភិរក្ស និងជួសជុលប្រាសាទមេបុណ្យខាងលិច ដែលជាកិច្ចសហការគំរូរវាងរដ្ឋាភិបាលប្រទេសបារាំង និងអាជ្ញាធរជាតិអប្សរា បន្ទាប់ពីដំណើរការរយៈពេល ១៤ឆ្នាំ ក្រោមជំនួយថវិកាប្រទេសបារាំងចំនួន ១២លានអឺរ៉ូ។ អាជ្ញាធរជាតិអប្សរា ក៏បានបញ្ជាក់ថា៖ «គម្រោងនេះគ្រោង នឹងបិទបញ្ចប់នៅក្នុងខែវិច្ឆិកា ឆ្នាំ២០២៦ ខាងមុខ និងគ្រោងប្រារព្ធពិធីសម្ពោធដាក់ឱ្យប្រើប្រាស់ជាផ្លូវការ ក្នុងអំឡុងកិច្ចប្រជុំកំពូលហ្វ្រង់កូហ្វូនី លើកទី២០ ក្នុងខែវិច្ឆិកា ឆ្នាំ២០២៦ ព្រមទាំងគម្រោងអភិរក្ស និងអភិវឌ្ឍន៍ដទៃទៀត ដែលអនុវត្តដោយសា្ថប័នដៃគូអន្តរជាតិនានា»៕ (អានបន្ថែម)
ជំនួយជាយុទ្ធសាស្ត្រផ្តោតលើការដោះមីន និងការស្តារសហគមន៍ឡើ […]
English 
ខ្មែរ