និន្នាការសំខាន់ ៧យ៉ាង ដែលនឹងកើតឡើងក្នុងទីផ្សារអលចនទ្រព្យឆ្នាំ ២០២៣

• ២១ មករា ២០២៣
• ព័ត៌មានក្នុងស្រុក
• 3087 មើល

ទីផ្សារអលចនទ្រព្យកម្ពុជានៅឆ្នាំ ២០២៣ នៅតែបន្តរងសម្ពាធ ហើយនឹងមិនទាន់អាចងើបឡើងវិញដូចគ្រប់គ្នាគិតនោះទេ ខណៈស្ថានភាពតឹងតែងបែបនេះ នឹងបន្ដយូរជាងការរំពឹងទុក ដែលភាគច្រើនគឺបង្កពីផលប៉ះពាល់ដែលបន្សល់ទុកពីវិបត្តិកូវីដ និងស្ថានភាពសង្គ្រាមរុស្ស៊ី-អ៊ុយគ្រែន ក៏ដូចជាការធ្លាក់ចុះនៃសេដ្ឋកិច្ចសកលលោកជាដើម។

ស្ថានភាពទីផ្សារអចលទ្រព្យឆ្នាំ ២០២៣ នេះ គឺប្រៀបដូចនឹងស្ថានក្រោយព្យុះភ្លៀងធំមួយមេរួច មេឃក៏ស្រឡះចែស តែក៏នៅមានបញ្ហារំខានផ្សេងៗដូចជាទឹកជំនន់ និងស្ទះលូជាដើម ពោលគឺនៅមានបញ្ហាបន្សល់ទុកពីវិបត្តិជាង ៣ ឆ្នាំ កន្លងមកនេះច្រើន។ លើសពីនេះ វិបត្តិដែលនៅសេសសល់នេះ គឺគ្មាននរណាអាចព្យាករណ៍ថានឹងអាចបញ្ចប់វិញពេលណាច្បាស់លាស់នោះទេ។

នេះបើយោងតាមការព្យាករណ៍ របស់ លោក Marc Townsend ប្រធានក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia ក្នុងកម្មវិធី Fearless Forecast 2023: Onto A New Cycle ដែលរៀបចំឡើងកាលពីថ្មីៗនេះ។

លោក Marc Townsend បានបង្ហាញពីនិន្នការសំខាន់ៗដែលនឹងកើតមានក្នុងទីផ្សារអចលនទ្រព្យក្នុងឆ្នាំ ២០២៣ នេះផងដែរ។

១) មា​នសាច់ប្រាក់ មានឱកាស តែត្រូវសំឡឹងឱ្យបានវែងឆ្ងាយ

សម្រាប់អ្នកមានទុន និងសាច់ប្រាក់ក្នុងដៃច្រើន នេះជាឱកាសល្អ ក្នុងការទិញអចលនទ្រព្យក្នុងតម្លៃទាប ដើម្បីទុកចំណេញ ប៉ុន្តែមិនមែនចំណេញពេលនេះនោះទេ គឺត្រូវចាំយ៉ាងហោចណាស់ក៏ ៥ ទៅ ១០​ឆ្នាំទៀតដែរ។ ក្នុងកាលៈទេសៈនេះ សាច់ប្រាក់គឺជាដង្ហើមនៃគ្រប់យ៉ាង។

២) ទិញដី អាចមិនមែនជាជម្រើសល្អបំផុតទៀតទេ

និន្នាការសំខាន់ដែលនឹងកើតឡើងក្នុងឆ្នាំ ២០២៣ គឺ ការវិនិយោគទិញដីមិនមែនជាជម្រើសល្អបំផុតសម្រាប់គ្រប់គ្នាទៀតទេ តែការទិញអចលនទ្រព្យដែលអាចបង្កើតចំណូលបានតាមរយៈការជួល ដូចជាផ្ទះ អគារ ការិយាល័យ ឬផ្សារទំនើប គឺជាឱកាសថ្មី។ វិនិយោគលើដីនៅពេលនេះ អ្នកអាចនឹងកប់លុយចោលយ៉ាងហោច  ៥ ឬ​ ទើបអាចចំណេញ ប៉ុន្តែ​បើទិញអគារ ឬផ្ទះ ដែលអាចដាក់ជួលបាន  យ៉ាងហោចក៏អាចផ្ដល់លំហូរសាច់ប្រាក់ខ្លះវិញដែរ។

៣) ចង់លក់អចលនទ្រព្យចេញបែប Secondary Sale ក្នុងឆ្នាំនេះ គឺពិបាក

លោកបន្តថា ក្នុងឆ្នាំ ២០២៣  ការលក់បែប Secondary Sale ឬការលក់ពីអ្នកទិញទូទៅ និងអ្នកទិញទូទៅ នឹងមិនសូវមានទៀតទេ។ ឧទាហរណ៍ ពេលយើងទិញផ្ទះពីបូរី ហើយយើងចង់លក់ផ្ទះនោះវិញទៅឱ្យអ្នកទិញផ្សេងទៀត វានឹងពិបាកលក់ខ្លាំង ឬស្ទើតែលក់មិនចេញតែម្ដង ព្រោះមានបូរីថ្មីៗ រីកដូចផ្សិត ព្រមនឹងតម្លៃសមរម្យជាងមុន ដូច្នេះ នឹងគ្មាននរណាមកទិញផ្ទះ ដែលប្រើរួច ជាជាងទៅទិញបូរីទើប សង់ថ្មី ជាមួយនឹងម៉ូតថ្មីៗ នោះទេ។ ដូច្នេះ អ្នកដែលមានផ្ទះ ឬខុនដូ ហើយចង់លក់ចេញ អាចនឹងពិចារណាជួលសិន ហើយរង់ចាំឱកាសលក់ពេលក្រោយ។

៤) សកម្មភាពបំប៉ោងតម្លៃដី ​នឹងបញ្ចប់

ដោយសារលំហូរវិនិយោគិនមានការថមថយ សកម្មភាពបំប៉ោងតម្លៃដី ទិញលក់ដើម្បីចំណេញលឿនក៏មិនសូវមានខ្លាំងដូចមុននោះដែរ។ ដូច្នេះការទិញដី ត្រូវពិចារណា និងត្រូវធ្វើផែនការឱ្យបានច្បាស់លាស់។

៥) តម្លៃខុនដូបន្ដធ្លាក់

កត្តាខ្វះវិនិយោគិនក្រៅស្រុក ក៏នឹងធ្វើឱ្យតម្លៃខុនដូបន្តធ្លាក់នៅក្នុងឆ្នាំ ២០២៣។ ក្រៅពីមិនសូវមានវិនិយោគិនពីបរទេស ចំ​នួនការផ្គត់ផ្គង់ខុនដូ គឺមានច្រើនហួសកម្រិត ដែលធ្វើឱ្យតម្លៃកាន់តែធ្លាក់។ ម្ចាស់ខុនដូ ភាគច្រើននឹងពន្យារពេលសាងសង់គម្រោង រហូតដល់ពួកគេលក់បានគ្រប់ចំនួន ហើយករណីធ្ងន់ធ្ងរគឺនឹងមិនសង់គម្រោងតែម្ដង។ ដោយឡែក ម្ចាស់គម្រោងដែលសង់រួចហើយ អាចនឹងប្ដូរមុខងារអគារឱ្យទៅជាអ្វីផ្សេង ដើម្បីរកចំណូល។

៦) ត្រូវចេះប្ដូរមុខងារការប្រើប្រាស់អចលនទ្រព្យ

លើសពីនេះ ក្នុងឆ្នាំ ២០២៣ អ្នកប្រឡូកក្នុងវិស័យនេះត្រូវចេះប្ដូរមុខងារនៃការប្រើប្រាស់អចលនទ្រព្យដែលខ្លួនមាន ប្ដូរប្រភេទនៃការវិនិយោគ និងវិនិយោគលើអចលនទ្រព្យច្រើនប្រភេទ។

លោក Marc បានពន្យល់ថា អចលនទ្រព្យប្រភេទថ្មីៗ ដែលអាចនឹងមានសក្ដានុពលមានដូចជា អគារស្នាក់នៅសម្រាប់សិស្ស និសិ្សតមហាវិទ្យាល័យបែបទំនើប  ឃ្លាំងស្ដុកឥវ៉ាន់ទូទៅសម្រាប់ជួល អគារស្នាក់នៅបុគ្គលិកក្រុមហ៊ុនបែ​បតម្លៃសមរម្យតែមានផាសុខភាព សាលារៀនអន្តរជាតិ  ផ្ទះបាយរួមសម្រាប់ជួល (Cloud Kitchen) សួនបន្លែលើអគារខ្ពស់ កន្លែងស្ដុកឥវ៉ាន់ត្រជាក់ ផ្ទះស្នាក់អាស្រ័យមនុស្សចាស់ និងសណ្ឋាគារសម្រាប់ទេសចរបែបតម្លៃសមរម្យ ជាដើម។

៧) អនុវត្តគោលនយោបាយ Customer-Centric Strategy

ដោយឡែក និន្នាការមួយទៀត ដែលកើតឡើងក្នុងទីផ្សារអចលនទ្រព្យឆ្នាំ ២០២៣ គឺ អតិថិជននឹងមានដូច្នេះម្ចាស់គម្រោងត្រូវប្ដូរយុទ្ធសាស្រ្តមកយកចិត្តអតិថិជនជាងមុន ឬ Customer-Centric Strategy ដើម្បីបន្តរស់ក្នុងទីផ្សារ។ ឧទាហរណ៍ ម្ចាស់គម្រោងត្រូវមានការផ្ដល់ជូនពិសេសច្រើនជាងមុនដល់អតិថិជន ដើម្បីលក់ដាច់។ ដូចគ្នានេះ សម្រាប់អ្នកជាម្ចាស់Apartment  ការិយាល័យជួល ឬម្ចាស់ផ្សារទំនើប ត្រូវផ្ដល់សេវាដិតដល់ទៅអ្នកជួលច្រើនជាមុនដែរ ព្រោះអ្នកជួលបច្ចុប្បន្នមានជម្រើសច្រើន ក្នុងតម្លៃដែលទាបជាងមុនផងដែរ។ សេវាកម្មនោះមានដូចជា ការរៀបចំអគារឱ្យមានសណ្ដាប់ធ្នាប់ជាងមុន ការរៀបចំផ្នែកខាងក្នុងនិងខាងក្រៅឡើងវិញ និងការបង្កើតសុវត្ថិភាព ជាដើម។

លើសពីនេះ ការធ្វើទីផ្សារ នឹងត្រូវចំណាយពេលវែងទើបឃើញលទ្ធផល​ ហើយត្រូវមានការផ្ដោតជាងមុន។ ជាពិសេសត្រូវការប្រើប្រាស់បច្ចេកវិទ្យា មកជំនួសវិញទើបធ្វើឱ្យអាជីវកម្មដំណើរការទៅដោយមានប្រសិទ្ធភាពជាងមុន។

• អត្ថបទវិភាគ