វៀតណាមជាប់ជាប្រទេសមានតម្លាភាពទីផ្សារអចលនទ្រព្យទាបបំផុតនៅអាស៊ីអាគ្នេយ៍

20 ខែតុលា 2024
Uncategorized @km
16 មើល

ទីផ្សារអចលនទ្រព្យរបស់ប្រទេសវៀតណាម ត្រូវបានចាត់ថ្នាក់ថាជាប្រទេសដែលមានតម្លាភាពទាបជាងគេបំផុតនៅក្នុងតំបន់អាស៊ីអាគ្នេយ៍ ដោយជាប់ចំណាត់ថ្នាក់ទី ៤៩ ក្នុងចំណោមប្រទេសចំនួន ៨៩ នៅក្នុងសន្ទស្សន៍តម្លាភាពអចលនទ្រព្យសកលឆ្នាំ ២០២៤ របស់ស្ថាប័នស្រាជជ្រាវអចលនទ្រព្យ JLL។ របាយការណ៍នេះ បានដាក់ប្រទេសវៀតណាមនៅពីក្រោយប្រទេសសិង្ហបុរី (ទី ១៣) ថៃ (ទី៣២) ម៉ាឡេស៊ី (ទី៣៣) ឥណ្ឌូណេស៊ី (ទី ៤០) និងហ្វីលីពីន (ទី ៤៥) ក្នុងលក្ខខណ្ឌតម្លាភាព ដោយបង្ហាញពីបញ្ហាប្រឈមសំខាន់ៗសម្រាប់អ្នកវិនិយោគទាក់ទងនឹងភាពច្បាស់លាស់នៃបទប្បញ្ញត្តិ គុណផលវិនិយោគ និងបញ្ហានិរន្តរភាព។ របាយការណ៍នេះ ត្រូវបានចេញផ្សាយដោយសារៈព័ត៌មានវៀតណាម e.vnexpress.net នៅថ្ងៃទី ១១ ខែកញ្ញាឆ្នាំ ២០២៤។

គួរបញ្ជាក់ថាវិធីសាស្ត្រចាត់ចំណាត់ថ្នាក់នេះ ធ្វើឡើងដោយការវាយតម្លៃតម្លាភាពតាមរយៈការរួមបញ្ចូលទិន្នន័យបរិមាណវិស័យ (quantitative data) និងលទ្ធផលស្ទង់មតិពីទីក្រុងចំនួន ១៥១ទូទាំងពិភពលោក ដោយកំណត់ឱ្យទីផ្សារនៃប្រទេសនីមួយៗនូវពិន្ទុពី០១ទៅ ០៥ ក្នុងនោះពិន្ទុ០១បង្ហាញពីកម្រិតខ្ពស់បំផុតនៃតម្លាភាព។ ចំណាត់ថ្នាក់ពាក់កណ្តាលតម្លាភាពរបស់វៀតណាម ឆ្លុះបញ្ចាំងពីការបំពេញគុណផលទាបរបស់ខ្លួននៅក្នុងផ្នែកសំខាន់ៗដូចជាការវិនិយោគ និយតកម្ម និងក្របខ័ណ្ឌច្បាប់ ដំណើរការប្រតិបត្តិការ និងស្តង់ដារនិរន្តរភាព។

ផ្ទុយទៅវិញ ប្រទេសជប៉ុនបានក្លាយជាទីផ្សារអចលនទ្រព្យដែលមានតម្លាភាពបំផុតនៅក្នុងតំបន់អាស៊ីប៉ាស៊ីហ្វិក ដោយទទួលបានចំណាត់ថ្នាក់ទី ១១។

លើសពីនេះស្ថាប័នវាយតម្លៃ JLL បានកត់សម្គាល់ថា ទីផ្សារអាស៊ីបានបង្ហាញពីភាពប្រសើរឡើងគួរឱ្យកត់សម្គាល់បើនិយាយពីរឿងតម្លាភាព គិតចាប់តាំងពីឆ្នាំ ២០២២រៀងមក ដោយប្រទេសឥណ្ឌានាំមុខគេលើពិភពលោក។

ទោះជាយ៉ាងណាក៏ដោយ របាយការណ៍ដដែលបានបង្ហាញច្បាស់ថា បញ្ហានិរន្តរភាព នៅតែចោទជាបញ្ហា គឺគ្រប់ប្រទេសទាំងអស់នៅទូទាំងសកលលោក សុទ្ធតែទទួលបានពិន្ទុទាបចំពោះបញ្ហានេះ ដោយសារតែអវត្តមាននៃការដាក់កំហឹតលើការអនុវត្តស្តង់ដារការបំពេញគុណផលសម្រាប់អគារ អវត្តមានការបង្ហាញអំពីការប្រើប្រាស់ថាមពលសាធារណៈ និងអវត្តមានការរាយការណ៍អំពីហានិភ័យអាកាសធាតុនៅក្នុងទីផ្សារភាគច្រើន។ ម្យ៉ាងទៀត របាយការណ៍នេះបានរំលេចបន្ថែមថា “ការលាងលុយកខ្វក់នៅតែជាកង្វល់សំខាន់” នៅក្នុងបណ្តាប្រទេសជាច្រើន។

លោក Richard Bloxam នាយកប្រតិបត្តិផ្នែកទីផ្សារមូលធនប្រចាំនៅស្ថាប័ន JLL បាននិយាយថា “ទីផ្សារ (ប្រទេសណា) ដែលមានការកំណត់តម្លៃច្បាស់លាស់ មូលដ្ឋានគ្រឹះរឹងមាំ និងការកែលម្អតម្លាភាព ត្រូវបានគេរំពឹងថានឹងដឹកនាំការងើបឡើងវិញនៃវិស័យអចលនទ្រព្យ។

លោកក៏បានព្យាករណ៍ថា “ចលករសំខាន់ៗដែលកំពុងលេចវត្តមានឡើងនៅក្នុងទីផ្សារ រួមមានទាំងបញ្ញាសិប្បនិមិត្ត និងស្តង់ដារនិរន្តរភាពខ្ពស់ ដែលកត្តាទាំងអស់នេះ នឹងជំរុញអ្នកវិនិយោគឱ្យទាមទារឱ្យមានតម្លាភាពកាន់តែច្រើនបន្ថែមទៀត នៅគ្រប់ទីផ្សារអចលនទ្រព្យទូទាំងពិភពលោក”៕

- Video Advertisement -